އެމެރިކާގެ ފުރަތަމަ މުސްލިމް އަންހެން ފަނޑިޔާރު މަރުވެފައި އޮއްވާ ފެނިއްޖެ

ނިއު ޔޯކް (އެޕްރީލް 13) - އެމެރިކާގެ ފުރަތަމަ މުސްލިމް އަންހެން ފަނޑިޔާރު މަރުވެފައި އޮއްވާ ފެނިއްޖެ އެވެ.

އުމުރުން 65 އަހަރުގެ ޝީލާ އަބްދުއްސަލާމްގެ ހަށިގަނޑު ނިއު ޔޯކުގެ ހުޑްސަން ކޯރުގައި އޮއްވާ ފެނިގެން ފުލުހުންނަށް ރިޕޯޓްކުރީ އާއްމުންގެ ބައެއް ކަމަށް ނިއު ޔޯކް ޕޯސްޓުން ބުންޏެވެ. އަދި ބުދަ ދުވަހުގެ މެންދުރު ފަހުން ފެށިގެން އޭނާ ގެއްލިގެން ރިޕޯޓްކޮށްފައިވާ ކަމަށް ވެސް ނޫހުން ބުނެފައިވެ އެވެ.

ފުލުހުންނާ ހަވާލާދީ ޕޯސްޓުން ބުނީ ފަނޑިޔާރުގެ ހަށިގަނޑަށް ބޭރު ފުށުން އެއްވެސް ގެއްލުމެއް ލިބިފައި ނުވާ ކަމަށެވެ. ފުލުހުން މިހާރު ގެންދަނީ އެ ހާދިސާ ތަހުގީގު ކުރަމުންނެވެ.

ނިއު ޔޯކުގެ ގަވަރުނަރު އެންޑްރޫ ކޫމޯ ވިދާޅުވީ ނިއު ޔޯކުގެ ކޯޓް އޮފް އެޕީލްސް އަށް އައްޔަންކޮށްފައިވާ އެފްރިކާ-އެމެރިކާ ދަރިކޮޅުގެ ފަނޑިޔާރަކު އަވަހާރަވުމަކީ ލިބުނު ހިތާމައެއް ކަމަށެވެ.

އެމެރިކާގެ ފުރަތަމަ މުސްލިމް އަންހެން ފަނޑިޔާރުގެ އިތުރުން ޝީލާ އަކީ ނިއު ޔޯކުގެ ކޯޓް އޮފް އެޕީލްސް އަށް އައްޔަން ކުރި އެފްރިކާ-އެމެރިކާ ދަރިކޮޅުގެ ފުރަތަމަ އަންހެން ފަނޑިޔާރު ވެސް މެ އެވެ. ކޮލަމްބިއާ ލޯ ސްކޫލުން ގާނޫނީ ދާއިރާ އިން ޑިގްރީ ހާސިލް ކުރައްވާފައިވާ ޝީލާ ކޯޓް އޮފް އެޕީލްސްގެ ފަނޑިޔާރަކަށް ހަމަޖެއްސީ 2013 ވަނަ އަހަރު އެވެ.