ފެނަކައިން ހަމައެކަނި އެސްޓީއޯ އިން ތެޔޮ ގަންނަން ނިންމައިފި

ފެނަކަ ކޯޕަރޭޝަނުން އަމިއްލަ ކުންފުނިތަކުން ތެޔޮ ގަތުން ހުއްޓާލުމަށް ފަހު، އަންނަ މަހުގެ އެއްވަނަ ދުވަހުން ފެށިގެން ހަމައެކަނި އެސްޓީއޯ އިން ތެޔޮ ގަންނަން ނިންމައިފި އެވެ.

ރާއްޖޭގެ އެންމެ ގިނަ ރަށްރަށަށް ކަރަންޓްގެ ހިދުމަތް ދެމުން އަންނަ ކުންފުނީގެ ތެޔޮ ތާނގީތައް ކެލިބްރޭޓްކޮށް، ތަރައްގީކުރަން އެސްޓީއޯއާ އެކު މިއަދު އެއްބަސްވުމެއްގައި ސޮއިކުރުމަށް ފަހު ފެނަކައިގެ މެނޭޖިން ޑިރެކްޓަރު އަހުމަދު ޝަރީފް ވިދާޅުވީ އަލަށް ސޮއިކުރި އެއްބަސްވުމާ އެކު ދެން ފެނަކައިން ތެޔޮ ގަންނާނީ އެސްޓީއޯއިން އެކަނި ކަމަށެވެ.

އޭނާ ވިދާޅުވި ގޮތުގައި މިހާރު އެ ކުންފުނިން އެސްޓީއޯ މެދުވެރިކޮށް ގަންނަނީ ބޭނުންވާ ތެލުގެ 55 ޕަސެންޓެވެ.

"މިހާރު ވެސް ފެނަކައަށް ބޭނުންވާ ތެލުގެ ބޮޑު އަދަދެއް ގަންނަމުންދަނީ އެސްޓީއޯއިން. އޭގެ މާނައަކީ ޕްރައިވެޓް ޕާޓީތަކުން ތެޔޮ ގަތުން އެކީ ހުއްޓާލީއޭ،" އޭނާ ވިދާޅުވި އެވެ.

ޝަރީފް ވިދާޅުވީ އެ ކުންފުންޏަށް މަހަކު 5.5 މިލިއަން ލީޓަރުގެ ތެޔޮ ންނަ ކަމަށާއި ނަމަވެސް އެ ތެޔޮ އަޅާ ތާނގީތަކަކީ ކެލިބްރޭޓްކޮށްފައިވާ އެއްޗެހި ނޫން ކަމަށެވެ. އަލަށް ސޮއިކުރި އެއްބަސްވުމުގެ ދަށުން ފެނަކައަށް ތެޔޮ އަޅާ ހުރިހާ ތާނގީތައް ކެލިބްރޭޓްކުރަން ނިންމާފައިވާ ކަމަށް އޭނާ ވިދާޅުވި އެވެ.

"މި އެއްބަސްވުމުގެ ދަށުން ތެޔޮ ތާނގީތައް ކެލިބްރޭޓްކުރެވި އެއަށް އެޅޭ ތެލަކީ ކިހާވަރެއްގެ ތެލެއްކަން އެނގޭނެ މިންގަނޑެއް އަދި މިހާތަނަށް އަޅުގަނޑުމެންނަށް ގާއިމުކުރެވިފައެއް ނެތް. އެސްޓީއޯއާ އެކީ އަޅުގަނޑުމެންނަށް މިވެވޭ އެއްބަސްވުމުގެ ދަށުން 50،000 އަށް ވުރެ މަތީ ސްޓޯރޭޖްތައް އަންނަ ޖޫންގެ ނިޔަލަށް ކެލިބްރޭޓްކޮށްދެއްވާނެ،" ޝަރީފް ވިދާޅުވި އެވެ.

އޭނާ ވިދާޅުވީ އެ ކުންފުނިން ކަރަންޓުގެ ހިދުމަތް ދެމުން އަންނަ 150 އަށް ވުރެ ގިނަ ރަށުގައި ގާއިމުކޮށްފައިވާ ހުރިހާ ތެޔޮ ތާނގީތައް އަންނަ ސެޕްޓެމްބަރު މަހުގެ ނިޔަލަށް ކެލިބްރޭޓްކޮށްދޭން ނިންމާފައިވާ ކަމަށެވެ. އަދި ކެލިބްރޭޓްކުރުމަށް ފަހު މަހަކަށް ބޭނުންވާ މިންވަރަށް ސްޓޯރޭޖް ގާއިމުކުރަން ނިންމާފައިވާ ކަމަށް ވެސް ޝަރީފް ވިދާޅުވި އެވެ.

"މިކަމުގެ ސަބަބުން އަޅުގަނޑުމެންނަށް އިތުރު ވަރަށް ބައިވަރު ފައިދާތަކެއް ލިބިގެންދާނެ. އެންމެ ބޮޑު ކަމަކީ އަޅުގަނޑުމެންގެ ކުންފުނި ތެރޭގައި އޮއިލް މެނޭޖްކުރުމުގެ މަސައްކަތްތަކަށް ވަރަށް ބޮޑު ލުއި ފަސޭހަތަކެއް ލިބިގެންދާނެ،" އޭނާ ވިދާޅުވި އެވެ.

ޝަރީފް ވިދާޅުވީ މިހާތަނަށް އެ ކުންފުންޏަށް ތެޔޮ ބޭނުންވާ ސީދާ މިންވަރެއް ބެލިފައިނުވާ ކަމަށާއި ތެލުގެ ތެރެއިން ނާޖާއިޒު ފައިދާ ނެގުން އެއްކޮށް ހުއްޓިގެންދާނެ ކަމަށެވެ. އަދި ކުރިޔަށް އޮތް ތަނުގައި ސްޓޭޝަންތަކުގައި ތެޔޮ ބޭނުންކުރެވޭ މިންވަރު ބެލުމަށް ފްލޯ މީޓަރު ހަރުކުރަން ނިންމާފައިވާ ކަމަށް ވެސް އޭނާ ވިދާޅުވި އެވެ.

އެސްޓީއޯގެ މެނޭޖިން ޑިރެކްޓަރު އަހުމަދު ޝަހީރު ވިދާޅުވީ އެ އެއްބަސްވުމުގެ ދަށުން އަތޮޅު ތެރޭގައި ފެނަކައިން ހިންގާ ހުރިހާ އިންޖީނުގެތަކަށް ބޭނުންވާ ތެޔޮ މެދުކެނޑުމެއް ނެތި ބަރާބަރަށް ފޯރުކޮށްދިނުމާއި އެ ރަށްރަށުގައި ހަދާފައިވާ ޓޭންކްތައް ކެލިބްރޭޓްކުރުމުގެ އިތުރުން ތެޔޮ އެޅޭމިންވަރު ޔަގީންކޮށްދެވޭނެ ކަމަށެވެ. އަދި އެ ކުންފުނީގެ ސްޓޯރޭޖް ތަރައްގީކުރުން ވެސް ހިމެނޭ ކަމަށް އޭނާ ވިދާޅުވި އެވެ.

"އެސްޓީއޯއަކީ ރާއްޖެއަށް ބޭނުންވާ ތެޔޮ އެތެރެކުރުމަށް މެންޑޭޓްކުރެވިފައިވާ ކުންފުނި. އެގޮތުން ރާއްޖެއަށް އެތެރެކުރާ ތެލުގެ 75 ޕަސެންޓް އެތެރެކުރަނީ އެސްޓީއޯ އިން،" ޝަހީރު ވިދާޅުވި އެވެ.

އޭނާ ވިދާޅުވީ އެ ކުންފުނީގެ ސަބްސިޑަރީ ކުންފުންޏެއް ކަމަށްވާ ފިއުލް ސަޕްލައިސް މިދިޔަ ދެ އަހަރުގެ ތެރޭގައި ޑިސްޓްރިބިއުޝަން ނެޓްވޯކް ފުޅާކޮށް އިތުރު ހަތަރު ބާޖު ގެނެސްފައިވާ ކަމަށެވެ. އަދި އެކަމާ ގުޅޭ ޓެކްނިކަލް މުވައްޒަފުން ހޯދައި ތަމްރީނުކޮށް ނިންމާފައިވާ ކަމަށް ވެސް ޝަހީރު ވިދާޅުވި އެވެ.