ކެޔޮދޫ ސްކޫލްގެ 4 ބުރީގެ އާ އިމާރާތް އަޅަން ސޮއިކޮށްފި

ވ. ކެޔޮދޫ ސްކޫލުގައި ހަތަރު ބުރީގެ އާ އިމާރާތެއް އެޅުމަށް ނިންމައި އެއްބަސްވުމުގައި ސޮއި ކޮށްފި އެވެ.

ރައީސް ޑރ. މުހައްމަދު މުއިއްޒު ވ. އަތޮޅަށް ކުރައްވާ ދަތުރުފުޅުގައި އެ އެއްބަސްވުމުގައި އެޑިއުކޭޝަން މިނިސްޓްރީން ސޮއިކުރީ އެމްޓީސީސީއާއެކު އެވެ.

މިނިސްޓްރީގެ ފަރާތުން ސޮއި ކުރެެއްވީ އެ މިނިސްޓްރީގެ ސްޓޭޓް މިނިސްޓަރު ޑރ. އަބްދުލްލަތީފް މުހައްމަދެވެ. އެމްޓީސީސީގެ ފަރާތުން ސޮއި ކުރެއްވީ އެ ކުންފުނީގެ މެނޭޖިން ޑިރެކްޓަރު އަބްދުﷲ ސައުދީ އެވެ.

އާބާދީގައި 650 އެއްހާ މީހުން ދިރިއުޅޭ އެ ރަށު ސްކޫލުގައި 200 އެއްހާ ދަރިވަރުން ކިޔަވަ އެވެ. އެ ރަށުގައި ގްރޭޑް 10 ނިންމާ ދަރިވަރުން އޯ ލެވެލްގައި ރަނގަޅު ނަތީޖާ ވެސް ހޯދަ އެވެ.

އާބާދީ މަދު އެ ރަށުގެ ކަންބޮޑުވުމަކީ އޭ ލެވެލްއަށް ކިޔަވަން، ދަރިވަރުން އެ ރަށުގައި މަޑުނުކުރުމެވެ. އާ އިމާރާތަކީ ޖާގައިގެ ދަތިކަމަށް ލިބޭނެ ވަރަށް ބޮޑު ހައްލެއް ކަމަށް ސްކޫލުން ދެކެ އެވެ.