ތަރައްގީގެ ޕްލޭން ހަދަން ނެކްސިއާ ކުންފުންޏާ ހަވާލުކުރީ 17.9 މިލިއަން ރުފިޔާއަށް

ރާއްޖޭގެ 20 އަހަރުގެ ތަރައްގީގެ ޕްލޭން ހެދުމަށް ނެކްސިއާ މޯލްޑިވްސް ކުންފުންޏާ ހަވާލުކުރީ 17.9 މިލިއަން ރުފިޔާއަށް ކަމަށް ފިނޭންސް މިނިސްޓްރީން ބުނެފި އެވެ.

އެ މިނިސްޓްރީގެ ވެބްސައިޓުގައި އާއްމުކޮށްފައިވާ ޕްރޮކިއުމަންޓް ތަފްސީލުގައި ބުނީ ތަރައްގީގެ ޕްލޭން ހަދައިދޭނެ ބަޔަކު ހޯދަން އިއުލާންކުރިއިރު ތިން ފަރާތަކުން ކުރިމަތިލި ކަމަށެވެ. އެއީ، އެންމެ މަތިން މާކްސް ލިބުނު ނެކްސިއާ މޯލްޑިވްސް އާއި ރިޔާން ޕްރައިވެޓް ލިމިޓެޑް އަދި ސީޑީއީ ޕްރައިވެޓް ލިމިޓެޑެވެ.

އޭގެ ތެރެއިން، ރިޔާން އަދި ސީޑީއީ ކުންފުންޏަށް ޓެކްނިކަލް ބައިން މަދުން ޕޮއިންޓު ލިބުމުން ފެއިލްވީ އެވެ.

އެހެންވެ ނެކްސިއާއަށް މިދިޔަ ޖޫން 25 ގައި އެ މަސައްކަތް ހަވާލުކުރީ އެއް އަހަރުގެ ތެރޭގައި ނިންމާ ގޮތަށް 17.9 މިލިއަން ރުފިޔާ އަށެވެ.

ތަރައްގީގެ ޕްލޭން ހަދަން އެ ކުންފުނިން ވަނީ މީހުން ދިރިއުޅޭ ހުރިހާ ރަށަކަށް ދަތުރުކުރަން ފަށައިފަ އެވެ. އަމާޒަކީ މި އަހަރު ނިމުމުގެ ކުރިން މީހުން ދިރިއުޅޭ ހުރިހާ ރަށަކަށް ޒިޔާރަތްކޮށް އެ މީހުންގެ ހިޔާލު ހޯދުމެވެ.

އެ މަސައްކަތްތަކުގެ މައުލޫމާތު ދޭން، ނޭޝަނަލް ޑިވެލޮޕްމަންޓުގެ ޕަބްލިކް ރިލޭޝަންސް ޓީމުން އިއްޔެ ބޭއްވި ބައްދަލުވުމުގައި، ޕްރޮޖެކްޓު ލީޑު މުހައްމަދު ނަޒީފު ވިދާޅުވީ އަންނަ ޖެނުއަރީ މަސް ނިމޭ ހިސާބުގައި އެ ޕްލޭން ލޯންޗުކުރާނެ ކަމަށެވެ.

އޭނާ ވިދާޅުވި ގޮތުގައި ތަފާތު އެކި ޕްލެޓްފޯމުތައް މެދުވެރިކޮށް އާއްމުންގެ ހިޔާލު ހޯދޭނެ ކަމަށެވެ. އޭގެ ބައްދަލުވުންތައް ކުރިއަށް އޮތް ދުވަސްތަކުގައި ބާއްވާނެ ކަމަށް ނަޒީފު ވިދާޅުވި އެވެ.

ރައީސް ޑރ. މުހައްމަދު މުއިއްޒުގެ ރިޔާސީ ވައުދެއް ކަމަށްވާ ތަރައްގީގެ މި ޕްލޭނަށް، ގާނޫނީ ބާރުވެރިކަން ދިނުމަށް ބަދަލުތައް ގެންނާނެކަން ވަނީ އިއުލާންކުރައްވައިފަ އެވެ. އޭގެ ދަށުން މޮނިޓަރިން ފްރޭމްވޯކާއި ފައިނޭންޝަލް ޕްލޭން އަދި އިމްޕްލިމެންޓޭޝަން ފްރޭމްވޯކެއް ހަދާނެ އެވެ.