ލޯކަލް ޓޫރިޒަމް ހިންގަންވާނީ ވެސް ދީނީ އިމުން ބޭރުނުވެ: ރައީސް

ލޯކަލް ޓޫރިޒަމްގެ ވިޔަފާރިން މުއްސަނދިކަން ހޯދާއިރު، އެކަން ކުރަން ވާނީ އިސްލާމް ދީނުގެ ހަމަތަކާ އެއްގޮތަށް ކަމަށް ރައީސް ޑރ. މުހައްމަދު މުއިއްޒު ރޭ ވިދާޅުވެއްޖެ އެވެ.

ރާއްޖޭގައި ލޯކަލް ޓޫރިޒަމް އެންމެ ފުޅާ ދާއިރާއެއްގައި ކުރާ އއ. އުކުޅަހަށް ވަޑައިގެން އެ ރަށު ރައްޔިތުންނާ ވާހަކަ ދައްކަވަމުން އެމަނިކުފާނު ވިދާޅުވީ މީހުން ދިރިއުޅޭ ރަށްރަށުގައި ލޯކަލް ޓޫރިޒަމް ހިންގުމުގައި އިންތައް ހިފަހައްޓަން ވަރަށް ބޮޑަށް ވިސްނަން ޖެހޭނެ ކަމަށެވެ.

އުކުޅަހުގައި ވެސް ލޯކަލް ޓޫރިޒަމް ތަރައްގީކުރުމަށް ސަރުކާރުން އެއްބާރުލުން ދޭނެކަން ފާހަގަކުރައްވައި ރައީސް ވިދާޅުވީ އެ އިންޑަސްޓްރީ ފުޅާކޮށް ރައްޔިތުންނަށް ފުދުންތެރިކަން ހޯދައިދޭން ބޭނުންވާ ކަމަށެވެ.

ނަމަވެސް އެކަމުގެ ތެރެއަށް، ދީނުގައި ގަބޫލުނުކުރާ ކަންކަމާއި އިސްލާމްދީން ހުއްދަ ނުކުރާ ކަންކަން ވަދެގެން ދިޔުމަކީ ކޮށްގެންވާނެ ކަމެއް ނޫން ކަމަށް ވިދާޅުވި އެވެ. އިސްލާމް ދީން ބުނެދޭ ހަމަތަކުގެ މަތިން މުއްސަނދިކަން ހޯދަން މަސައްކަތް ކުރުމުން އެކަމުގައި ބަރަކާތް ލައްވާނެ ކަމަށް އެމަނިކުފާނު ވިދާޅުވި އެވެ.

"ރަށާ ކައިރީގައި އޮންނަ ސަފާރީއަކަށް، ރަށުގެ އިހުތިސާސް މިންކޮށްފައި 700 މީޓަރު އެޅޭ ހިސާބުން އެއް ފޫޓު ބޭރުގައި ސަފާރީ ބާއްވައިގެން އެއަށް ސިއްރު ސިއްރުން ގެސްޓުން ގެންގޮސްގެން ރާ ވިއްކައި ރާ ދީ ހަދައިގެން، އަނެއްކާ އަނބުރާ ރަށަށް ވެސް އެބަ ގެނޭ. މިކަހަލަ ކަންތައްތައް ވެސް އެބަކުރޭ،" ލޯކަލް ޓޫރިޒަމް ހިންގާ ބައެއް ރަށްރަށުގައި ހިނގާ ނޭދެވޭ ކަންކަމަށް އިޝާރާތްކުރައްވަމުން ރައީސް ވިދާޅުވި އެވެ.

"މިއީ ހަމައެކަނި މި އަތޮޅު އެކަންޏެއް ނޫން. އެހެން އަތޮޅުތަކުގައި ވެސް ކުރާ ކަމެއް. ހެއްދެވި ފަރާތަށް ހުރިހާ ކަމެއް ސާފު. އެކަލާނގެ ނުރުއްސަވާ މަގަކުން ކޮން މުއްސަނދިތަކެއްތޯ ހޯދަން މި އުޅެނީ؟ ކޮން ޝޯޓްކަޓެއްތޯ ނަގަން މި އުޅެނީ. ފުރުސަތުގެ ބޭނުން ހިފަން ޖެހޭނީ އަމިއްލަ ނަފްސަށް އިހްލާސްތެރިވުމަށް. ސިކުނޑި ތަރައްގީ ނުވަންޏާ ކޮންމެ އުމްރާނީ ތަރައްގީގެއް ކުރިއަށް ގެންދިޔަސް ކުރާނެ އެއްވެސް ފައިދާއެއް ނޯންނާނެ."

ރަށްރަށުގައި ޓޫރިސްޓް އެނދުތައް އިތުރު ކުރަންވީ ކަމަށާއި ނަމަވެސް އެކަން ކުރަންވީ ރާއްޖޭގެ ގާނޫނާއި ގަވައިދުތަކާ އެއްގޮތްވާ ގޮތަށް ކަމަށް އެމަނިކުފާނު ވިދާޅުވި އެވެ.

ރައީސް މި ވާހަކަ ދައްކަވާފައި ވާއިރު ސަރުކާރުން މިހާރު ވަނީ ހަލާލް ޓޫރިޒަމް ކުރިއަރުވަން ނިންމައި އެކަމަށް ހާއްސަކޮށް ފަސް ރަށެއް ވެސް ކަނޑައަޅައިފަ އެވެ.

ޓޫރިޒަމް މިނިސްޓްރީން ބުނެފައި ވަނީ ހަލާލު ޓޫރިޒަމްގެ ރަށްތަކުގައި ރަލާއި އޫރު މަހުގެ މުއާމަލާތްތައް ނުހިންގޭނެ ކަމަށެވެ. އެފަދަ ރަށްރަށުގައި ކެއުން ބުއިމުގައި ބޭނުން ކުރަން ޖެހޭނީ ވެސް ހަލާލު ކާބޯތަކެއްޗެވެ.

އިސްލާމް ދީނާ ގުޅޭ ފަދަ ތަންތަން ރަށު ތެރޭގައި ހުންނަން ޖެހޭނެ ކަމަށާއި މިސްކިތް ފަދަ ތަންތަން ވެސް ހަދަންވާނީ، އެ ރަށުގެ އެންމެ އައިކޮނިކް ބިލްޑިންތަކުގެ ގޮތުގައި ކަމަށް މިނިސްޓްރީން ބުނެފައި އެވެ. މީގެ އިތުރުން ޓޫރިސްޓުންނަށާއި ސްޓާފުންނަށް ހާއްސަ ދެ މިސްކިތް ހުރުމާއި ހަލާލް ސެޓިފިކޭޝަން ހޯދުމަކީ ވެސް ބައެއް ހިދުމަތްތަކުގައި އެފަދަ ރަށްރަށުން ކުރަންޖެހޭ ކަމެއްގެ ގޮތުގައި ވަނީ ކަނޑައަޅައިފަ އެވެ.