ވާދަވެރި ކުޅުމަކަށް ފަހު ލިވަޕޫލް ފުރަތަމަ މެޗު ކާމިޔާބުކޮށްފި

ލިވަޕޫލް (އޮގަސްޓް 16) - މި ސީޒަނުގެ އިނގިރޭސި ޕްރިމިއާ ލީގުގެ ފުރަތަމަ މެޗުން އެންމެ ފަހުގެ ޗެމްޕިއަން ލިވަޕޫލުން ފަހު ވަގުތު ލަނޑުޖަހައި 4-2 އިން ބޯންމަތު ބަލިކޮށްފި އެވެ.

ލިވަޕޫލުން ވަނީ އަލަށް ގެނައި ހަތަރު ކުޅުންތެރިން ފުރަތަމަ 11 ގައި ހިމަނައިފަ އެވެ. އެއީ ބޯންމަތުން ގެނައި ވާތު ބެކް މިލޯސް ކާކޭޒް އާއި އެއިންޓްރަކް ފްރޭންކްފާޓުން ގެނައި ފޯވާޑް ހޫގޯ އެކިޓީކޭގެ އިތުރުން ބެޔާ ލެވަކޫސަން އިން ގެނައި ކަނާތު ބެކް ޔެރެމީ ފްރިމްޕޮންގް އާއި މިޑްފީލްޑަރު ފްލޯރިއަން ވިއެޓްޒް އެވެ.

މެޗުގެ ފުރަތަމަ 30 މިނިޓު ހަމަނުވަނީސް، ބޯންމަތުގެ ފޯވާޑް އެންޓޮއިން ސެމެންޔޯއާ، ލިވަޕޫލްގެ ސަޕޯޓަރަކު ނަސްލީގޮތުން ދިމާކޮށްލުމުން ރެފްރީ ވަނީ ދެ ޓީމުގެ ކޯޗުންނަށް އެކަން އޮޅުންފިލުވައިދިނުމަށް ކުޑަ ވަގުތުކޮޅަކަށް މެދުކަނޑާލައިފަ އެވެ. އަދި މި ހާފު ނިންމާލީ 37 ވަނަ މިނިޓުގައި އެކިޓީކޭ ޖަހައިދިން ގޯލުން ލިވަޕޫލް ކުރީގައި އޮވެ އެވެ.

ދެ ވަނަ ހާފު ފެށިގެން މާ ގިނައިތެއް ނުވެ އެކިޓީކޭގެ އެހީއާ އެކު ކޯޑީ ގަކްޕޯ ލިވަޕޫލަށް ލީޑު ފުޅާ ކޮށްދިން ނަމަވެސް، ލިވަޕޫލުން ދެ ފުލްބެކުން ބަދަލު ކޮށްލުމާ އެކު ބޯންމަތުން ގާތްގާތުގައި ދެ ގޯލު ޖަހައި ނަތީޖާ އެއްވަރު ކުރި އެވެ. މެޗުގެ 64 އަދި 77 ވަނަ މިނިޓުގައި ބޯންމަތަށް ލަނޑުތައް ޖަހައިދިނީ ސެމެންޔޯ އެވެ.

ލިވަޕޫލް އަލުން ލީޑު ނެގީ ފުރިހަމަ ވަގުތު ހަމަވާން ދެ މިނިޓަށް ވެފައި ވަނިކޮށް، ފެޑެރިކޯ ކިއޭސާ ޖެހި ގޯލުންނެވެ. ކުޅެން ނުކުތްތާ ކުޑަ އިރުކޮޅެއްތެރޭ ކިއޭސާ ޖެހި މި ލަނޑަކީ މިދިޔަ ސީޒަނުގައި ލިވަޕޫލާ ގުޅުނު ފޯވާޑް ލީގުގައި ޖަހައިދިން ފުރަތަމަ ލަނޑެވެ. އަނިޔާ އާއި ފިޓްނެސްގެ މައްސަލައިގައި މިދިޔަ ސީޒަންގައި އޭނާއަށް ކުޅުމުގެ މާ ގިނަ ފުރުސަތެއް ލިބިފައެއް ނުވެ އެވެ.

އިތުރު ވަގުތުގެ ހަތަރު ވަނަ މިނިޓުގައި ލިވަޕޫލްގެ ފަހު ލަނޑު ޖަހައިދިނީ މުހައްމަދު ސަލާހެވެ. މިއީ ލިވަޕޫލްގައި އޭނާ ކުޅޭ ނުވަ ވަނަ ސީޒަންގެ ތެރެއިން ލީގުގެ ފުރަތަމަ މެޗުގައި ލަނޑު ޖެހި އަށް ވަނަ ފަހަރެވެ. އޭނާއަށް ލަނޑު ނުޖެހުނީ 2023/2024 ސީޒަނުގައި ކުރީގެ ކްލަބް ޗެލްސީއާ ކުޅެ އެއްވަރުވި މެޗުގަ އެވެ. ނަމަވެސް އޭނާ ވަނީ ލިވަޕޫލުން އެ މެޗުގައި ލުއިސް ޑިއާޒް ޖެހި ލަނޑު އެސިސްޓް ކޮށްދީފަ އެވެ.