އދ.ގެ ޓެކްސްއާ ގުޅޭ މާހިރުންގެ ކޮމިޓީގައި ރާއްޖޭގެ މަންދޫބަކު ފުރަތަމަ ފަހަރަށް ހިމަނައިފި

އދ.ގެ ޓެކްސްއާ ގުޅޭ މާހިރުންގެ ކޮމިޓީގައި ރާއްޖެ ތަމްސީލުކުރާ މަންދޫބަކު ފުރަތަމަ ފަހަރަށް ހިމަނައިފި އެވެ.

އދ.ގެ ސެކްރެޓަރީ ޖެނެރަލް އެންޓޯނިޔޯ ގުޓެރޭސް، "ޔޫއެން ކޮމިޓީ އޮފް އެކްސްޕާޓްސް އޮން އިންޓަނޭޝަނަލް ކޯޕަރޭޝަން އޮން ޓެކްސް މެޓާސް"ގެ ކުރިއަށް އޮތް ހަތަރުގެ ދައުރަކަށް އައްޔަނުކުރެއްވި 25 މެމްބަރުންގެ ތެރޭގައި، ރާއްޖޭގެ ފަރާތުން ހިމަނުއްވާފައިވަނީ، މީރާގެ އެސިސްޓެންޓް ކޮމިޝަނާ ޖެނެރަލް މުހައްމަދު އަލީ ވަހީދެވެ.

އޭނާ މިހާރު އަދާކުރައްވަމުން ގެންދަވަނީ މީރާގެ ޓެކްނިކަލް އަދި ލީގަލް އެންމެ އިސް ވެރިޔާގެ ދައުރެވެ.

މި ތަޖުރިބާކާރުން ގައުމުތަކުގެ އިޖުތިމާއީ، ތިމާވެށި، އަދި އިގްތިސާދީ ތަރައްގީގެ މަގުސަދުތައް ކުރިއަރުވައި، ޓެކްސް ސިޔާސަތުތައް އެކުލަވާލައި، އެ ކަންކަން ކާމިޔާބުކަމާއެކު ތަންފީޒުކުރުމަށް އެހީތެރިވެދޭނެ އެވެ.

މި ކޮމިޓީން ޑިޖިޓަލް އިގްތިސާދާއި ކްރިޕްޓޯ އެސެޓްތަކުގައި އުފެދިފައިވާ ނުރައްކާތަކާ އެކު ޑަބަލް ޓެކްސް ނެގުން ފަދަ ގޮންޖެހުންތަކަށް ހައްލެއް ހޯދައިދިނުމަށް އެކި ގައުމުތަކަށް އަމަލީ އިރުޝާދުތައް ދޭނެ އެވެ.

ރާއްޖެއަށް މި ލިބުނު ތާރީހީ ފަހުރު ފާހަގަކުރައްވައި، ފޮރިން މިނިސްޓަރު އެކްސްގައި ވިދާޅުވީ، އދ. ފަދަ ބައިނަލްއަގުވާމީ މައިދާނުގައި ދިވެހިންނަށް ފައިތިލަ ހަމަކޮށްގެން ކުރިއަށް ދެވޭނެކަން މިކަމުން ހާމަވެގެންދާ ކަމަށެވެ.

އަލަށް އައްޔަނުކުރެއްވި މެމްބަރުންނާ އެކު ކޮމިޓީގެ ފުރަތަމަ ބައްދަލުވުން ބޭއްވުމަށް ހަމަޖެހިފައިވަނީ އަންނަ އޮކްޓޯބަރު މަހު، ޖެނީވާގައި ހުންނަ އދ.ގެ މަރުކަޒުގަ އެވެ.