ޓެކްސް ނުދައްކާ މީހުންގެ އަދަބު ބޮޑުކުރަން ހުށަހެޅި ބިލް ބަލައިގަނެ، ދިރާސާއަށް

ޓެކްސް ނުދައްކާ ފަރާތްތަކާ މެދު ހަރުކަށި ފިޔަވަޅު އަޅައި، އެ ފައިސާ ހޯދުމަށް މޯލްޑިވްސް އިންލެންޑް ރެވެނިއު އޮތޯރިޓީ (މީރާ) އަށް ބޮޑެތި ބާރުތަކެއް ލިބޭ ގޮތަށް ޓެކްސް ނެގުމާބެހޭ އިދާރީ ގާނޫނަށް ގިނަ އިސްލާހުތަކެއް ގެންނަން ހުށަހަޅާފައިވާ ބިލް ރައްޔިތުންގެ މަޖިލީހުން މިއަދު ބަލައިގެންފި އެވެ.

ސަރުކާރުގެ ފަރާތުން، ވިލިމާލެ ދާއިރާގެ މެންބަރު މުހައްމަދު އިސްމާއީލް ރައްޔިތުންގެ މަޖިލީހަށް ހުށަހެޅުއްވި ބިލު ހުށަހެޅުމުގެ މަގްސަދުގެ ގޮތުގައި ހިމަނާފައިވަނީ ޓެކްސްގެ ގޮތުގައި ލިބެންވާ ފައިސާ ހޯދުމުގައި މީރާ އަށް ލިބޭ ބާރުތައް މުރާޖައާކޮށް، ޓެކްސްއާ ގުޅޭ ކުށްތަކުގެ އަދަބު ބޮޑުކުރުމެވެ.

މަޖިލީހުގެ މިއަދުގެ ޖަލްސާގައި އެ ބިލު ބަލައިގެންފައިވަނީ، އެކަމަށް ނެގި ވޯޓުގައި ބައިވެރިވެވަޑައިގެންނެވި 60 މެމްބަރުންގެ އިއްތިފާގުންނެވެ.

އެ ބިލު ބަލައިގަތުމާއެކު، މަޖިލީހުގެ ރިޔާސަތުން ވަނީ އެ ބިލު ދިރާސާކުރަން މަޖިލީހުގެ އިގުތިސާދީ ކޮމިޓީއަށް ފޮނުވައިފަ އެވެ.

އެ ބިލުގައި ޓެކްސް ދެއްކުމުން ރެކުމުގެ ނިޔަތުގައި ކުރާ ކުށުގެ އަދަބު، ތިން މަހާއި އެއް އަހަރާ ދެމެދުގެ މުއްދަތަކަށް ގޭބަންދު ކުރުމުގެ އަދަބެއްގެ ގޮތުގައި އޮތްއޮތުން، ތިން މަހާއި ދެ އަހަރާ ދެމެދުގެ މުއްދަތުގެ ޖަލު އަދަބަކަށް ބަދަލުކުރަން ބިލުގައިވަނީ ހިމަނައިފަ އެވެ.

މީގެ އިތުރުން ޓެކްސް ދައްކަންޖެހޭ މުއްދަތުގައި ޓެކްސް ނުދައްކާ ފަރާތްތައް، ގިނަވެގެން ހަ މަސް ދުވަހަށް ގޭބަންދު ކުރެވޭ ގޮތަށް އޮތް އަދަބު، ހަ މަސް ދުވަހުގެ ޖަލު އަދަބަކަށް ބަދަލުކޮށް އަދި 250،000ރ. އާ ހަމައަށް ޖޫރިމަނާ ކުރެވޭ ގޮތަށް ވެސް ބިލުގައިވަނީ ހިމަނައިފަ އެވެ.

މީގެ އިތުރުން، ޓެކްސް ދައްކަންޖެހޭ މުއްދަތުން ހަމަވާ ދުވަހުން ފެށިގެން ޖޫރިމަނާގެ ގޮތުގައި ނަގަމުން އައި 0.05 ޕަސެންޓުގެ ޖޫރިމަނާ ދެ ގުނަ ބޮޑުކޮށް، ނުދައްކާ އޮތް އަދަދުގެ 0.1 ޕަސެންޓުން ޖޫރިމަނާ ކުރަން ބިލުގައި ވަނީ ހިމަނައިފަ އެވެ.

އެ ބިލުގައި، މީރާ އަށް ދައްކަންޖެހޭ ޓެކްސް ފައިސާއާ ގުޅޭގޮތުން ޓެކްސް އެޕީލް ޓްރައިބިއުނަލަށް އިސްތިއުނާފު ހުށަހެޅުމުގެ އުސޫލު ވެސް ބަދަލުކުރަން ވަނީ ހުށަހަޅައިފަ އެވެ. އެ ބިލުގައިވާ ގޮތުން، މީރާ އަށް ދައްކަންޖެހޭ ފައިސާގެ އަދަދާ ގުޅޭގޮތުން، ޓްރައިބިއުނަލަށް އިސްތިއުނާފު ހުށަހެޅޭނީ އިއުތިރާޒު ކުރާ އަދަދުގެ މަދުވެގެން 25 ޕަސެންޓަށްވާ ފައިސާ މީރާ އަށް ދައްކައި، ހަލާސް ކުރުމުންނެވެ.

ޓެކްސް ނުދައްކާ ފަރާތްތަކުގެ އަތުން ފައިސާ ހޯދުމަށް، މީރާ އަށް އިތުރު ފިޔަވަޅުތައް އެޅުމުގެ ބާރު ދިނުމަށް ވެސް ބިލުގައި ހުށަހަޅާފައިވެ އެވެ. އެގޮތުން ދައުލަތުގެ އިދާރާތަކުން ދޭ ހިދުމަތް ހުއްޓުވުމާއި ބިން ބިމާއި މިލްކިއްޔާތު ހިފެހެއްޓުމާއި ބޭންކު އެކައުންޓްތައް ބެލުމާއި ތިން ވަނަ ފަރާތެއްގެ އަތުން އެ ފައިސާ ހޯދުމުގެ އިތުރުން ބޭރު ގައުމުތައް މެދުވެރިކޮށް ފައިސާ ހޯދުމުގެ ބާރު މީރާ އަށް ދޭން ވަނީ ހުށަހަޅައިފަ އެވެ.

މީރާ އިން ފޮނުވާ ނޯޓިސްތައް ރައްދު ކުރުމުގައި މިހާރު ދިމާވާ ދަތިތައް ހައްލު ކުރުމުގެ ގޮތުން، މީރާއަށް ދީފައިވާ އެޑްރެހަށް ނުވަތަ އީމެއިލް އެޑްރެހަށް އެ ލިޔުމެއް ފޮނުވުމުން އެ ފަރާތަށް ލިޔުން ރައްދުވީ ކަމަށް ބެލެވޭނެ ކަމަށް އާ އިސްލާހުގައި ބަޔާންކޮށްފައިވެ އެވެ.