11 ރަށެއްގެ މަގުތައް ޒަމާނީ ފެންވަރަށް ހަދަން އާރުޑީސީއާ ހަވާލުކޮށްފި

ޒަމާނީ ފެންވަރަށް 11 ރަށެއްގެ މަގުތައް ހެދުމުގެ މަޝްރޫއު ބަޔަކާ މިއަދު ހަވާލުކޮށްފި އެވެ.

ކޮންސްޓްރަކްޝަން މިނިސްޓްރީން ބުނިގޮތުގައި، 11 ރަށުގެ މަގުތައް ހެދުމުގެ މަސައްކަތް ހަވާލުކުރީ ރޯޑް ޑިވެލޮޕްމަންޓް ކޯޕަރޭޝަން (އާރުޑީސީ) އާ އެވެ.

އެކަމަށް ބޭއްވި ރަސްމިއްޔާތުގައި އެއްބަސްވުމުގައި މިނިސްޓްރީގެ ފަރާތުން ސޮއި ކުރެއްވީ ސްޓޭޓް މިނިސްޓަރު ހަސަން ރަޝީދެވެ. އާރްޑީސީގެ ފަރާތުން ސޮއިކުރެއްވީ އެ ކުންފުނީގެ މެނޭޖިން ޑިރެކްޓަކަށް މިދިޔަ ހަފުތާގައި އައްޔަން ކުރެއްވި އިބްރާހީމް ނަޒީމެވެ.

މި މަޝްރޫއުގެ ދަށުން ޒަމާނީ ފެންވަރަށް ހަމަޖެހިފައިވާ ރަށްތައް:

- ތ. ގުރައިދޫގެ މައި މަގުތައް (74 މިލިއަން ރުފިޔާ)

- ތ. ކިނބިދޫގެ މައި މަގުތައް (79 މިލިއަން ރުފިޔާ)

- މ. މުލީގެ މައި މަގުތައް (85 މިލިއަން ރުފިޔާ)

- ހއ. ތުރާކުނުގެ މައި މަގުތައް (65 މިލިއަން ރުފިޔާ)

- ހދ. ނޮޅިވަރަންފަރުގެ މައި މަގުތައް (101 މިލިއަން ރުފިޔާ)

- ތ. ހިރިލަންދޫގެ މައި މަގުތައް (70 މިލިއަން ރުފިޔާ)

- ބ. ތުޅާދޫގެ މައި މަގުތައް (70 މިލިއަން ރުފިުާ)

- ށ. މަރޮށި މައި މަގުތައް (60 މިލިއަން ރުފިޔާ)

- ހދ. ފިނޭގެ މައި މަގުތައް (65 މިލިއަން ރުފިޔާ)

- ނ. މާފަރުގެ މައި މަގުތައް (116 މިލިއަން ރުފިޔާ)

- ބ. ކުޑަރިކިލުގެ މައި މަގުތައް (53 މިލިއަން ރުފިޔާ)

އާރްޑީސީއާ މި ރަށްރަށުގެ މަގުތައް ހެދުމުގެ މަސައްކަތް ހަވާލުކޮށްފައިވަނީ 730 ދުވަސް ތެރޭގައި ނިންމާ ގޮތަށެވެ. ކޮންސްޓްރަކްޝަން މިނިސްޓްރީން ނިންމާފައި ވަނީ އެ ރަށަކުން އެދިފައިވާ ގޮތަށް ތާރު އަޅައިގެން ނުވަތަ ގާ އަތުރައިގެން މަގުތައް ހަދާށެވެ.