ސަޕްލައި ދޯންޏެއް ބަންޑުން ޖަހާލައި ކަނޑުވި މީހުންގެ ތެރެއިން އެކަކު މަރުވެއްޖެ

ހދ. ކުމުންދޫ ކައިރިއަށް ސަޕްލައި ދޯންޏެއް ބަންޑުން ޖަހާލައި މިއަދު ކަނޑުވި މީހުންގެ ތެރެއިން އެކަކު މަރުވެއްޖެ އެވެ.

އެ ދޯނިން ދަތުރުކުރި ހަތަރު މީހުންގެ ތެރެއިން މަރުވީ 66 އަހަރުގެ ދިވެއްސެކެވެ.

ފުލުހުން ބުނި ގޮތުގައި ހދ. ކުޅުދުއްފުށިން ފުރައިގެން ށ. ފުނަދުއަށް ދަތުރުކުރި ދޯނި ބަންޑުން ޖަހާލައި ކަނޑުވި މީހުން ސަލާމަތްކޮށްގެން އެމްއެންޑީއެފުން ގެންދިޔައީ، ކުޅުދުއްފުއްޓަށެވެ.

އޭގެއިން ދަތުރުކުރި އެކަކު މަރުވީ، ހާލު ދެރަވެގެން ކުޅުދުއްފުށީ ހޮސްޕިޓަލުގައި ފަރުވާ ދެމުން ދަނިކޮށެވެ. އަނެއް ތިން މީހުންގެ ހާލު ރަނގަޅު ކަމަށް ފުލުހުން ބުންޏެވެ.

ފުލުހުން ބުނީ އެ ދޯނި ދަތުރުކުރަމުން ދިޔައީ ޖަންބޯ ބޭގުތަކެއް އަރުވައިގެން ކަމަށް މައުލޫމާތު ލިބިފައިވާ ކަމަށެވެ.

ހުޅަނގު މޫސުމުގެ ވިއްސާރަ ކުރަމުންދާ މި ދުވަސްކޮޅު ކަނޑުތައް ގަދަ އެވެ. ކ. ގުރައިދު އަށް 17 މީހުންނާ އެކު ދަތުރުކުރި ޑިންގީއެއް ވެސް ރޭ ވަނީ ބަންޑުން ޖަހާލައިފަ އެވެ. އޭގެއިން ދަތުރުކުރި އެންމެން ވަނީ ސަލާމަތްކޮށްފަ އެވެ.