އާއިލާއާ އެކު ކުރި ފުރަތަމަ އުމްރާ އަށް ފަހު މަރު!

ޗުއްޓީ ކައިރިވަމުން ދިޔަ ވަރަކަށް މަރިޔަމް ޝިޔާމާ އެންމެ ބޮޑަށް އިންތިޒާރު ކުރަމުން އައީ ހަޔާތުގައި ކުރާ ފުރަތަމަ އުމްރާ ދަތުރަށެވެ. މިދިޔަ ބުރާސްފަތި ދުވަހު ސްކޫލްތަކުގެ ފުރަތަމަ ޓާމު ނިންމައި ރިޕޯޓު ފޮތް ދީ، ސްކޫލުތައް ބަންދުވުމުން އާއިލާގެ ބައެއް މީހުންނާ އެކު، ހޮނިހިރު ދުވަހު އޭނާ އުމްރާގެ ދަތުރު ފެށީ އުފާވެރި މޫނަކާ އެކުގަ އެވެ.

އެކަމަކު، ރ. ފައިނު ސްކޫލުގައި ޓީޗަރަކަށް އުޅޭ މަރިޔަމްގެ ފުރަތަމަ އުމްރާ ވެގެން ދިޔައީ އޭނާގެ ފަހު ދަތުރަށެވެ.

މަރިޔަމް، 39، ނިޔާވީ ފުރަތަމަ އުމްރާ ނިންމައި، މަދީނާ އަށް ގޮސް އެނބުރި އައި މަގުމަތީގައި ގުބާ މިސްކިތުގައި ދެ ރަކުއަތުގެ ނަމާދެއް ކުރިތާ އިރުކޮޅެއް ފަހުންނެވެ. އެއީ ރާއްޖޭގެ ގަޑިން މިއަދުގެ މެންދުރު އެކެއް ޖަހާކަށްހާއިރެވެ.

ފައިނުން ވާހަކަ ދެއްކި މީހަކު ބުނީ، މަރިޔަމް އުމްރާ އަށް ފުރިއިރު ވެސް ސިއްހީ ބޮޑު މައްސަލައެއް ނެތް ކަމަށެވެ.

ރިޕޯޓު ފޮތް ދިން ދުވަހު ވެސް، އޭނާގެ މޫނު މަތިން އާއްމުކޮށް ފެންނަ ހިނިތުންވުމާ އެކު، ސްކޫލްގެ ކުދިންނާއި ބެލެނިވެރިންނާ ބައްދަލުކޮށް، ވާހަކަ ދެއްކި ކަމަށް ބުންޏެވެ.

"ކްލާސް ކޮންޓްރޯލް ކުރަން ވެސް މަރިޔަމް ވަރަށް މޮޅުވާނެ. އޭނަ ކިޔަވައިދޭ ގަޑިއެއްގައި ވިއްޔާ ކުދިން ތިބޭނެ ރަނގަޅަށް އަޑުއަހަން. ހުރިހާ ކުދިންނާ ވެސް ވަރަށް ލޯބިން ވާހަކަ ދައްކާނީ،" ފައިނުން ވާހަކަ ދެއްކި މީހަކު ބުންޏެވެ.

އޭނާ ބުނީ މަރިޔަމްގެ ކުއްލި ވަކިވުމަކީ އެ ރަށުގެ ސްކޫލަށް ލިބުނު ވަރަށް ބޮޑު ގެއްލުމެއް ކަމަށެވެ.