ތިލަފުށީގެ ލޭންޑް ޔޫސް ޕްލޭން ބަދަލުކުރާތީ ސިނާއީ ބޭނުމަށް ބިން ދޫކުރަން ކުރި އިއުލާންތައް ބާތިލުކޮށްފި

ތިލަފުށީގެ ލޭންޑް ޔޫސް ޕްލޭނަށް ބަދަލު ގެންނަން ޖެހޭތީ، ސިނާއީ ބޭނުމަށް އެ ރަށުން ބިން ދޫކުރަން ކުރި އިއުލާންތައް އެޗްޑީސީން މިއަދު ބާތިލުކޮށްފި އެވެ.

އެ ކުންފުނިން ކުރި އިއުލާނެއްގައި ބުނީ ތިލަފުށީގެ ބިމުގެ ޖާގަ އޮތް މިންވަރަށް ބަލައި، ތިލަފުށި މާސްޓަޕްލޭނާއި އެ ކުންފުނީގެ އުސޫލުތަކުގައިވާ ގޮތުން މަތިން އެ ރަށުން ބިން ކުއްުޔަށް ދޫކުރުމަށް މިދިޔަ އަހަރުގެ ޖުލައި މަހުގެ ތިންވަނަ ދުވަހާއި 14 ވަނަ ދުވަހު ކޮށްފައިވާ އިއުލާންތައް މިހާރު ވަނީ ބާތިލުކޮށްފައި ކަމަށެވެ.

އެ އިއުލާންތައް ބާތިލުކުރަން ޖެހުނީ، ތިލަފުށިން އިތުރަށް ބިން ހިއްކައި، ތިލަފުށީގެ މާސްޓަޕްލޭނަށް ގެނެސްފައިވާ ބަދަލުތަކުގެ ސަބަބުން، އެ ރަށުގެ ލޭންޑް ޔޫސް ޕްލޭނަށް ބަދަލު ގެނައުމުގެ މަސައްކަތް ކުރަން ޖެހުމުގެ ސަބަބުން ކަމަށް އެޗްޑީސީން ބުންޏެވެ.

އެހެންވެ، ތިލަފުށިން ބިން ކުއްޔަށް ދޫކުރަން ކުރި އިއުލާންތަކާ ގުޅިގެން އެކި ފަރާތްތަކުން އެ ކުންފުންޏަށް ހުށަހަޅާފައިވާ ޕްރޮޕޯސަލްތަކާއި އެ ފަރާތްތަކަށް ފޮނުވާފައިވާ އޮފާތައް ބާތިލްކޮށްފައިވާ ކަމަށް އެޗްޑީސީން ބުންޏެވެ.

"މިފަދަ ކަންކަމުގައި އާންމު ރައްޔިތުންނާއި ވިޔަފާރިތަކުގެ ފަރާތުން މި ކޯޕަރޭޝަނަށް ދެއްވާ އެއްބާރުލުން ފާހަގަކޮށް މި ފުރުސަތުގައި ޝުކުރު ދަންނަވަމެވެ،" އެޗްޑީސީގެ އިއުލާނުގައިވެ އެވެ.

ކުރީގެ ރައީސް އިބްރާހިމް މުހައްމަދު ސޯލިހުގެ ސަރުކާރުގައި އެޗްޑީސީން ވަނީ އިންޑަސްޓްރިއަލް ހަބެއްގެ ގޮތުގައި ތިލަފުށި ތަރައްގީކުރަން ނިންމައި މާސްޓަޕްލޭނެއް އެކުލަވާލައިފަ އެވެ. އެ މާސްޓަޕްލޭންގެ ދަށުން ވަނީ ތިލަފުށިން 151 ހެކްޓަރުގެ ބިން ހިއްކައިފަ އެވެ.