މަންދީގެ ވާހަކައިން ރައީސްގެ ދަރިކަލެއްގެ އަބުރު ގެއްލުނު، ފައްޔާޒާއި އެމްޑީޕީ ޒިންމާއެއް ނުކުރެވޭނެ: ސިވިލް ކޯޓް

އެމްޑީޕީގެ މުޒާހަރާއެއްގައި ރައީސް ޑރ. މުހައްމަދު މުއިއްޒުގެ ދަރިކަލަކާ ބެހޭގޮތުން އެމްޑީޕީގެ އެކްޓިވިސްޓް މަރިޔަމް ޒުބައިރު (މަންދީ) ދެއްކި ވާހަކަތަކުގެ ސަބަބުން އެ ކުއްޖާގެ އަބުރު ގެއްލުނުކަން ސާބިތުވާ ކަމަށާއި ނަމަވެސް އެމްޑީޕީ އާއި އެ ޕާޓީގެ ޗެއާޕާސަން ފައްޔާޒް އިސްމާއިލް އެކަމަށް ޒިންމާވާން ނުކުރެވޭނެ ކަމަށް ސިވިލް ކޯޓުން މިއަދު ހުކުމްކޮށްފި އެވެ.

އެމްޑީޕީން މިދިޔަ މާޗް މަހު ބޭއްވި މުޒާހަރާއެއްގައި، ރާއްޖޭގައި ވޭޕް މަނާކުރަން ރައީސް ނިންމެވި ނިންމެވުން ރައީސްގެ ދަރިކަލަކާ ގުޅުވައިގެން މަންދީ ވާހަކަ ދެއްކި މައްސަލާގައި މަންދީގެ އިތުރުން އެމްޑީޕީ އާއި ފައްޔާޒްގެ މައްޗަށް އަބުރުގެ ދައުވާ ކުރެއްވީ ފަސްޓްލޭޑީ ސާޖިދާ މުހައްމަދެވެ.

އެ މައްސަލާގައި ސިވިލް ކޯޓުން މިއަދު ކުރި ހުކުމުގައިވަނީ މަންދީ ދެއްކި ވާހަކަތަކުގެ ސަބަބުން ރައީސްގެ ދަރިކަލެއްގެ އަބުރު ގެއްލިފައިވާކަން ސާބިތުވާ ކަމަށެވެ. އަދި އެކަމުން ސަބަބުން ލިބުނު ގެއްލުމުގެ ބަދަލު ހޯދުމަށް ދައުވާ ކުރުމުގެ ހައްގު ސާޖިދާއަށް ލިބިވަޑައިގަންނަވާ ކަމަށް ހުކުމުގައިވެ އެވެ.

ނަމަވެސް އެކަމަކީ ފައްޔާޒާއި އެމްޑީޕީން ސީދާ ގޮތެއްގައި ކުރި ކަމަކަށް ނުވާތީ އާއި ވައިކޭރިއަސް ލައިބިލިޓީގެ ދަށުން އެމްޑީޕީ އާއި ފައްޔާޒްގެ ފަރާތުން އެ އަމަލަށް ޒިންމާވާން ޖެހޭ ކަމެއް އެ މައްސަލާގައި ފާހަގަނުވާ ކަމަށް ހުކުމުގައިވެ އެވެ. އަދި ފައްޔާޒާއި އެމްޑީޕީގެ ފަރާތުން ދިފާއުއެއް ހުށަހަޅާފައި ނުވާތީ، އެ ފަރާތްތަކުގެ ޣައިރު ހާޒިރުގައި ހުކުމްކުރަން ފަސްޓްލޭޑީގެ ފަރާތުން އެދިފައިވިޔަސް، ޣައިރު ހާޒިރުގައި ކުރާ ހުކުމެއްގައި ފައްޔާޒާއި އެމްޑީޕީ އެކަމަށް ޒިންމާ ނުކުރެވޭނެ ކަމަށް ހުކުމުގައިވެ އެވެ.

އެ މައްސަލާގައި ފަސްޓްލޭޑީގެ ފަރާތުން އެދިވަޑައިގެންފައި އޮތީ މަންދީ ދެއްކި ވާހަކަތަކާ ގުޅިގެން މާފަށް އެދުމަށް މަންދީ އާއި ފައްޔާޒް އަދި އެމްޑީޕީގެ މައްޗަށް އަމުރުކޮށް ދިނުމަށެވެ. ނަމަވެސް ކޯޓުގެ ހުކުމުގައިވަނީ މަޖުބޫރު ކޮށްގެން މާފަށް އެދެން އެންގުން، މާފުކުރަން އެދުމުގެ ތަބީއަތާ ހިލާފް ކަމަށެވެ. އަދި އެހެން ގައުމުތަކުގައި ވެސް މައާފަށް އެދެން އެންގުމަކީ، އާންމުކޮށް ގާނޫނުތަކުގެ ދަށުން ކުރެވޭ ކަމަކަށް ވާއިރު، ރާއްޖޭގައި އެފަދަ ގާނޫނެއް ނެތުމުން މާފަށް އެދެން އަމުރު ނުކުރެވޭނެ ކަމަށް އެ ހުކުމުގައިވެ އެވެ.

ސިވިލް ކޯޓުން އެގޮތަށް ހުކުމް ކުރިއިރު، މަންދީ ދެއްކި ވާހަކަތަކުގެ މައްސަލަ ފުލުހުން ވެސް ކުރިން ބެލި އެވެ.