ވެރިކަން ވައްޓާލުމަކީ އެމްޑީޕީން ކުރާނެ ކަމެއް ނޫން، ކުރުވާނީ ޖަވާބުދާރީ: ފައްޔާޒް

ވެރިކަމެއް ވައްޓާލުމަކީ އެމްޑީޕީން ކުރާނެ ކަމެއް ނޫން ކަމަށާއި މަގުސަދަކީ ސަރުކާރު ޖަވާބުދާރީ ކުރުވުން ކަމަށް އެ ޕާޓީގެ ޗެއާޕާސާން ފައްޔާޒު އިސްމާއިލް ރޭ ވިދާޅުވެއްޖެ އެވެ.

އަންނަ އަންގާރަ ދުވަހު އެމްޑީޕީން މާލޭގައި ބާއްވާ "ގާނޫނުއަސާސީގެ ދިފާއުގައި ރައްޔިތުން"ގެ ޖަލްސާއަށް ތައްޔާރުވުމުގެ ގޮތުން ރޭ ބޭއްވި އެ ޕާޓީގެ ޖަގަހަ ޖަލްސާގައި ފައްޔާޒު ވަނީ ސަރުކާރަށް ވަރަށް ބޮޑަށް ފާޑުވިދާޅުވެފަ އެވެ. މި ސަރުކާރުގެ ސިޔާސަތުތައް ހުރީ އާންމު ރައްޔިތުންނަށް ވަރަށް އުނދަގޫވާ ގޮތަށް ބައްޓަންކޮށްފައި ކަމަށާއި އެ އުސޫލު ކަންކަން ކުރުން ހުއްޓާލަންޖެހޭ ކަމަށް އޭނާ ވިދާޅުވި އެވެ.

ފައްޔާޒު ވިދާޅުވީ ސަރުކާރުގެ މެޖޯރިޓީ އޮންނަ ރައްޔިތުންގެ މަޖިލީހުން ގާނޫނުއަސާސީއާ "ހިތުހުރި ގޮތަކަށް" ކުޅެމުން އަންނަ ކަމަށާއި އެއީ އެ ގާނޫނުއަސާސީ ގެންނަން އެމްޑީޕީން ކުރި ބުރަ މަސައްކަތާ މުޅިން ދެކޮޅު ކަންތައްތައް ކަމަށެވެ. އެހެންވެ، އެމްޑީޕީން މި ނުކުންނަނީ އެ ގާނޫނުއަސާސީގެ ދިފާއުގައި ކަމަށް އޭނާ ވިދާޅުވި އެވެ.

ސަރުކާރަށް ވިސްނައިދެވޭތޯ އެކިއެކި ފޯރަމްތަކުގައި، އެކި ގޮތްގޮތަށް މަސައްކަތް ކުރެވިއްޖެ ކަމަށާއި އެކަމަކު އެކަން ނުވި ކަމަށް އޭނާ ވިދާޅުވި އެވެ.

"އެކަމަކު އަޅުގަނޑުމެންނަށް ފެންނަނީ އެގޮތަކަށް ނޫން. އަޅުގަނޑުމެން މަގުމަތިން ދާއިރުގައި، މިސްކިތަކަށް އަރާއިރުގައި، ހޮޓަލަކަށް ވަންނައިރުގައި، މުސްކުޅި އުމުރުން ފެށިގެން އައިސް ޒުވާނުންނަށް ދަން ދެން މި ބުނަނީ މި މީހުން މި ވެރިކަމުން ބާލަން އެބަޖެހޭނުންހޭ،" ފައްޔާޒް ވިދާޅުވި އެވެ.

"އާދެ، އަޅުގަނޑު އެބަ ދަންނަވަން، އަޅުގަނޑުމެންނަކީ މީހުން ވެރިކަމުން ބާލާ ބައެއް ނޫނޭ. އަޅުގަނޑުމެންނަކީ ހަމަ މަގަށް މީހުން އަޅުވާ ބައެކޭ. އަޅުގަނޑުމެން ކުރަން މި އުޅޭ މަސައްކަތަކީ ގާނޫނު އަސާސީގެ އިމުގެ ތެރެއިން މި ސަރުކާރު ޖަވާބުދާރީކުރުވުން."

ސަރުކާރު ޖަވާބުދާރީ ކުރުވަން ޖެހެނީ ޖަލްސާ ބާއްވައިގެން ކަމަށް ވިޔަސް ނުވަތަ މަގުމައްޗަށް ނުކުމެ މުޒާހަރާ ކޮށްގެން ކަމަށް ވިޔަސް، އެމްޑީޕީން އެކަން ކުރާނެ ކަމަށް ފައްޔާޒް ވިދާޅުވި އެވެ.

މިދިޔަ މަހުގެ 20 ވަނަ ދުވަހު ގާނޫނުއަސާސީއަށް އިސްލާހު ހުށަހަޅައި ހަމަ އެ ދުވަހު ފާސްކޮށް އަދި ތަސްދީގުކުރި ކަންކަމުގެ ތެރެއިން ފާޑުކިޔުން އެންމެ ބޮޑަށް އަމާޒުވެފައި ވަނީ ރައްޔިތުންގެ މަޖިލީހުގެ ގޮނޑި ގެއްލޭ ގޮތެވެ. ރައްޔިތުންގެ މަޖިލީހަށް އިންތިހާބުވި އިރު ހުރި ސިޔާސީ ޕާޓީ ބަދަލުކޮށްފި ނަމަ ނުވަތަ ޕާޓީން ވަކިކޮށްފި ނަމަ އަދި އަމިއްލަ ގޮތުން ހޮވުމަށް ފަހު ޕާޓީއަކަށް ވަދެއްޖެ ނަމަ މަޖިލީހުގެ މެންބަރުކަން ގެއްލޭ ގޮތަށް ގާނޫނުއަސާސީ ވަނީ އެ ދުވަހު ބަދަލުކޮށްފަ އެވެ.

"ގާނޫނުއަސާސީގެ ދިފާއުގައި ރައްޔިތުން" ގެ ނަމުގައި އެމްޑީޕީން ޖަލްސާ ބާއްވަން ނިންމާފައި ވަނީ ޑިސެމްބަރު 10 ވާ އަންނަ އަންގާރަ ދުވަހުގެ ރޭ ކާނިވާ ސަރަހައްދުގަ އެވެ. އެއީ ރާއްޖޭގެ މަސްވެރިންގެ ދުވަހާއި ބައިނަލްއަގްވާމީ އިންސާނީ ހައްގުތަކުގެ ދުވަސް ވެސް މެ އެވެ.