ދަރަނީގެ ހާލަތުގެ ބަހުސަކަށް ފައްޔާޒުގެ ދައުވަތު ސައީދަށް

ރާއްޖެ އަށް މިހާރު ކުރިމަތިވެގެން މި އުޅޭ މާލީ ދަތިކަމުގެ ޒިންމާ އިދިކޮޅު އެމްޑީޕީން ނަގަން ޖެހޭނެ ކަމަށް އިކޮނޮމިކް މިނިސްޓަރު މުހައްމަދު ސައީދު ދާދި ފަހުން ވިދާޅުވެފައިވާތީ، އެކަން ރައްޔިތުންނަށް ސާފުކޮށްދޭން، އެ ޕާޓީގެ ކަމާގުޅޭ ބޭފުޅުންނާ އެކު ބަހުސަކަށް ވަޑައިގަތުމުގެ ދައުވަތު ޗެއާޕާސަން ފައްޔާޒް އިސްމާއިލް އަރުވައިފި އެވެ.

ރޭ ބޭއްވި އެމްޑީޕީގެ ގައުމީ މަޖިލީހުގެ ޖަލްސާގެ ރިޔާސަތުގައި އިންނަވައި ވާހަކަ ދައްކަވަމުން ފައްޔާޒް ވިދާޅުވީ، މި ސަރުކާރުން ރައްޔިތުންނަށް އެއްވެސް ކަމެއް ކޮށް ނުދީ، ރައްޔިތުންގެ ޕްރެޝަރު ބޮޑުވާ ކޮންމެ ފަހަރަކު، އޮޅުވައިލުމުގެ ބޭނުމުގައި އެމްޑީޕީ ސަރުކާރާ ގުޅުވައި ވާހަކަތައް ދައްކަމުންދާ ކަމަށެވެ.

"އަޅުގަނޑު މިއަދުގެ އިކޮނޮމިކް މިނިސްޓަރަށް އަދި މާލީ ވަޒީރަށް މި ގޮވާލަނީ މުޅި ދިވެހިރާއްޖޭގެ ރައްޔިތުންގެ ކުރިމައްޗަށް ވަޑައިގެން، އަޅުގަނޑާއި އަޅުގަނޑުމެންގެ ކުރީގެ ފައިނޭންސް މިނިސްޓަރާ އެކީ ދަރަނީގެ ވާހަކަ ވަރަށް ރަނގަޅަށް ދައްކާލަން ވަޑައިގަންނަވާށޭ،" ފައްޔާޒް ވިދާޅުވި އެވެ.

"ކެރިވަޑައިގަންނަވާ ވަޑައިގަންނަވާށޭ، އަޅުގަނޑުމެން ވަރަށް ސާފުކޮށް ދަރަނީގެ ވާހަކަ އަޅުގަނޑުމެން ދައްކާލަދޭނަމޭ."

ފައްޔާޒް ވިދާޅުވި ގޮތުގައި، ދަރަނީގެ އިތުރުން، އެމްޑީޕީގެ ސަރުކާރުން ހިންގި ކަމަށް ތުހުމަތުކުރާ ކޮރަޕްޝަނާއި ގެދޮރުވެރިކަމުގެ ވާހަކަތައް ވެސް މި ސަރުކާރުގެ ވަޒީރުންނާ އެކު ދައްކާލަން އެމްޑީޕީ އޮތީ ތައްޔާރަށެވެ.

އަދި މި ބަހުސަށް އެމްޑީޕީގެ ފަރާތުން ރަސްމީކޮށް ދައުވަތު އަރުވާނެ ކަމަށް ވެސް މިދިޔަ އެމްޑީޕީ ސަރުކާރުގެ އިކޮނޮމިކް މިނިސްޓަރު ފައްޔާޒް ވިދާޅުވި އެވެ.

ފައްޔާޒް މިފަދަ ދައުވަތެއް ދެއްވާފައިމިވަނީ، ރާއްޖެ އަށް މިހާރު ކުރިމަތިވެގެން މިއުޅޭ ދަތި ހާލުގެ އެންމެ ބޮޑު ހިއްސާދާރަކީ އިދިކޮޅު އެމްޑީޕީ ކަމަށާއި އެ ޕާޓީގެ ވެރިކަން 2023 އަށް ނިންމައިލިއިރު 125.2 ބިލިއަން ރުފިޔާގެ ދަރަނި އޮތް ކަމަށް ސައީދު ވިދާޅުވެފައިވަނިކޮށެވެ.

"ރާއްޖެ 40 އަހަރުން އުފެއްދި ނޫނިއްޔާ 50 އަހަރުން އުފެއްދި ދަރަންޏަށް ވުރެ ބޮޑޭ ރައީސް އިބްރާހިމް މުހައްމަދު ސޯލިހުގެ [ސަރުކާރުގެ] ފަސް އަހަރުން އުފެއްދި ދަރަނި،" ޕީއެސްއެމްގެ ރާއްޖެ މިއަދު ޕްރޮގްރާމްގައި ވާހަކަ ދައްކަވަމުން ސައީދު މިދިޔަ ހޯމަ ދުވަހުގެ ރޭ ވިދާޅުވި އެވެ.

ކުރީގެ ރައީސް އަބްދުﷲ ޔާމީންގެ ވެރިކަމުގައި ވެސް އިކޮނޮމިކް މިނިސްޓަރުކަން ކުރެއްވި ސައީދު ވިދާޅުވީ، އެ ވެރިކަން ނިންމައިލިއިރު ދައުލަތުގެ ރިޒާވްގައި އެއް ބިލިއަން ޑޮލަރު ހުންނާނެ ކަމަށެވެ. އަދި ޔާމީންގެ ވެރިކަން 2018 އަށް ނިންމައިލިއިރު، ސޮވަރިން ޑިވެލޮޕްމަންޓް ފަންޑުގައި 250 މިލިއަން ޑޮލަރު ހުރި ކަމަށް މިނިސްޓަރު ވިދާޅުވި އެވެ.

އެކަމަކު، އޭނާ ވިދާޅުވީ ރައީސް އިބްރާހިމް މުހައްމަދު ސޯލިހު ވެރިކަމަށް ވަޑައިގެން އެންމެ ފަހު އަހަރު ނިންމައިލެެއްވީ ދައުލަތުގެ ބަޖެޓު 50 ބިލިއަން ރުފިޔާ އަށް އަރުވައި އަދި ގާނޫނުގައި "ތަޅު އަޅުވައި" އިތުރަށް އެތައް ހާސް ޑޮލަރެއް ޗާޕްކޮށްގެން ކަމަށެވެ.