ޝިމަން އާއި މަހްޒޫމަށް ކުރަނީ ސިޔާސީ ދައުވާއެއް: ފައްޔާޒް

މާލޭގެ އިމާރާތަކުން ވެއްޓުނު ހައްވާ ޔުމްނު ރަޝީދަށް އިންސާފު ހޯދަން ގޮވާލައި، ކުރި މުޒާހަރާގައި އިސްކޮށް އުޅުނު އައިޝަތު ޝިމަން އާއި އަބްދުﷲ މަހްޒޫމް މާޖިދުގެ މައްޗަށް ކުރަނީ ސިޔާސީ ދައުވާއެއް ކަމަށް ވިދާޅުވެ އެމްޑީޕީގެ ޗެއާޕާސަން ފައްޔާޒު އިސްމާއިލް ސަރުކާރަށް ފާޑުވިދާޅުވެއްޖެ އެވެ.

މިދިޔަ އޭޕްރީލް މަހުގެ 18 ވަނަ ދުވަހުގެ ރޭ ހ. ފެންޓެނޯއީގެއިން ހ. މިޓާޒްގޭގެ ފުރާޅު މައްޗަށް ޔުމްނު ވެއްޓުނު މައްސަލައިގެ ތަހުގީގުގައި ފުލުހުންގެ އިހުމާލު އޮތް ކަމަށް ބުނެ، އޭރު ކޮންމެ ރެއަކުން ޒުވާނުންތަކެއް ވަނީ ފުލުހުންގެ އިދާރާ ދޮށުގައި މުޒާހަރާކޮށްފަ އެވެ. އެ މުޒާހަރާގެ ރޫޅާލުމަށް ފަހު ޝިމަން އާއި މަހްޒޫމް އޭރު ހައްޔަރުކޮށް، ބަންދުގެ މުއްދަތު ވެސް ކޯޓުން ޖެހިޔަސް ފަހުން އެމީހުން ދޫކޮށްލީ އެވެ.

އެ މައްސަލާގައި ޝިމަންގެ މައްޗަށް ކުރަނީ ގާނޫނު ތަންފީޒުކުރާ މުވައްޒަފަކަށް ހުރަސް އެޅުމުގެ ދައުވާ އެވެ. މަހްޒޫމުގެ މައްޗަށް ކުރަނީ އަނިޔާކުރުމުގެ ދައުވާ އެވެ.

އެކަމުގެ ކަންބޮޑުވުން ފާޅުކުރައްވައި ފައްޔާޒު އެކްސްގައި ކުރެއްވި ޕޯސްޓެއްގައި ވިދާޅުވީ މަހްޒޫމާއި ޝިމަންގެ މައްޗަށް ޖިނާއީ ދައުވާއެއް ކުރަން ނިންމުމުން ހަރުކަށި އިބާރާތުން ކުށްވެރިކުރާ ކަމަށެވެ.

ފައްޔާޒު ވިދާޅުވީ ހިޔާލުފާޅުކުރުމުގެ މިނިވަންކަމާއި މުޒާހަރާ ކުރުމުގެ ހައްގު ބޭނުންކުރުމުން އެ މީހުން ޖިނާއީ އަދުލުގެ ނިޒާމުގެ ތެެރަށް ނުހައްގުން ވައްޓާލުމަކީ ތާކުންތާކުން ޖެހޭ ކަމެއް ނޫން ކަމަށެވެ.

ސިޔާސީ މަގުސަދެއް ހާސިލުކުރުމަށް ޝަރީއަތްތައް ބާއްވާތަން ފެނުމަކީ ހިތާމަކުރާ ކަމެއް ކަމަށާއި މިއީ ޒުވާނުންގެ އަޑުކަނޑުވާލުމަށް ސަރުކާރުން ކުރާ ވަރަށް ދަށު ދަރަޖައިގެ އަމަލެއް ކަމަށް ވެސް ވިދާޅުވި އެވެ.

އެ މުޒާހަރާތަކާ ގުޅިގެން މަހްޒޫމާއި ޝިމަންއަށް ދައުވާކުރަން ނިންމި މައްސަލާގައި ގިނަ ބަޔަކު ފާޑުކިޔަމުންދަނިކޮށް ޕްރޮސެކިއުޓާ ޖެނަރަލް އޮފީހުގެ ތަރުޖަމާނު އަދި ގާނޫނީ ވަކީލު އަހުމަދު ޝަފީއު ވިދާޅުވީ އެ ދެމީހުންނަށް ވެސް ނަސޭހަތުގެ އެއްބަސްވުމެއް ހެދުމުގެ ފުރުސަތު ކުރިން ދިން ކަމަށާއި އަދި އެ ފުރުސަތު މިހާރު ވެސް އެބަ އޮތް ކަމަށެވެ.

އެކަމަކު ދެ މީހުން ވެސް އެ ހުށަހެޅުމަށް އިންކާރުކޮށްފައިވާ ކަމަށް ޝަފީއު ވިދާޅުވި އެވެ.

ނަސޭހަތުގެ އެއްބަސްވުމަކީ އިތުރު ކުށެއް ނުކުރަން ޝަރުތު ކުރުމަށް ފަހު ދައުވާ ނުކޮށް ދޫކޮށްލަން ހަދާ އެއްބަސްވުމެކެވެ.

ޔުމްނު ވެއްޓުނު މައްސަލަ ތަހުގީގު ކުރަން ރައީސް ޑރ. މުހައްމަދު މުއިއްޒު އުފެއްދެވި ހާއްސަ ކޮމިޝަނުގެ ރިޕޯޓުގައިވާ ގޮތުން އޭނާ ގަސްދުގައި ވައްޓާލާފައި ކަމަށް ނޫނީ އޭނާ އަމިއްލަ އިހްތިޔާރުގައި ފުންމާލާފައިވާ ކަމަށް ކަނޑައެޅެން ނެތެވެ.

ޔުމްނުއާ އެކު އުޅުނު އެ ރޭ އެންމެ ފަހުން އުޅުނު ގ. އެރިޔަދޫ، ރައުދު އަހުމަދު ޒިލާލު ކޮމިޝަނަށް ބަޔާން ދިނީ އެ ރޭގެ ކަންކަން ހަނދާނުގައި ނެތް ކަމަށް ބުނެ އެވެ. އެ ކަންކަމުގެ މައްޗަށް ބަލައި ކޮމިޝަނުން ބުނީ ސިޑި ގޮޅީގައިވާ ކުޑަދޮރުން ރައުދު ގަސްދުގައި ޔުމްނު ވައްޓާލީ ކަން ނުވަތަ ނޫން ކަން ކަނޑައެޅެން ކޮމިޝަނަށް ނެތް ކަމަށެވެ.

ކޮމިޝަނުން މިގޮތަށް ކަނޑައެޅިއިރު ޕްރޮސިކިއުޓާ ޖެނަރަލްގެ އޮފީހުން ވަނީ އެހީއަށް ބޭނުންވެފައިވާ މީހަކަށް އެކަށީގެންވާ ސަބަބެއް ނެތި އެހީތެރިކަން ފޯރުކޮށްނުދިނުމުގެ ދައުވާ އުފުލައިފަ އެވެ. އޭނާ މިހާރު ހުރީ ބަންދުން ވެސް ދޫކޮށްލައިފަ އެވެ.

އެ ދައުވާގެ އަސާސީ އަދަބަކީ އެއް މަހާއި ހަ ދުވަހުގެ ޖަލު ހުކުމެކެވެ.

ރައުދަށް އެ ދައުވާކުރަނީ ޔުމްނު ވެއްޓުނުކަން އެނގި ހުރެ، އޭނާއަށް އެހީތެރިކަންދީފައި ނުވާތީ އާއި އޭނާއަށް އެހީތެރިކަން ހޯދުމަށް އެދި ކަމާ ގުޅުން ހުރި އެއްވެސް އިދާރާއަކަށް ވެސް ރިޕޯޓު ކޮށްފައި ނުވާތީ ކަމަށް ޕީޖީ އޮފީހުން ބުނެފައިވެ އެވެ.