އިރާނުގެ އިތުރު ކޮމާންޑަރަކު ވެސް އިޒްރޭލުން އަވަހާރަކޮށްލައިފި ކަމަށް ބުނެފި

އިރާނުގެ އަސްކަރިއްޔާގެ އިތުރު ކޮމާންޑަރެއް ވެސް އިޒްރޭލުން މަރާލާފައިވާ ކަމަށް އިޒްރޭލްގެ ފޮރިން މިނިސްޓަރު ގިޑިއޯން ސާ މިއަދު ބުނެފި އެވެ.

އޭނާ ބުނިގޮތުގައި އިޒްރޭލުގެ އަސްކަރިއްޔާއިން ދިން ހަމަލާތަކުގައި އަވަހަރަކޮށްލާފައި ވަނީ ސައީދު އިޒާދީ ނަމަކަށް ކިޔާ ކޮމާންޑަރެކެވެ. ގިޑިއޯން ސާ ބުނީ އިޒާދީ އަވަހާރަކޮށްލީ އިރާނުގެ ގުމް ސިޓީ އަށް ދިން ހަމާލަތަކުގައި ކަމަށެވެ.

އެކަމަކު އެކަމާ ބެހޭގޮތުން އިރާނުގެ ސަރުކާރުން މިހާތަނަށް އެއްވެސް އެއްޗެއް ބުނެފައެއް ނުވެ އެވެ.

އިޒްރޭލްގެ ފޮރިން މިނިސްޓަރު ބުނީ އިޒާދީއަކީ ފަލަސްތީނުގެ ހަމާސް އަށް އިރާނުގެ ފަރާތުން މުއާމަލާތް ކުރާ ކޮމާންޑަރު ކަމަށެވެ.

މި މަހުގެ 13 ވަނަ ދުވަހު އިޒްރޭލުން އިވެސް އިރާނަށް ދޭން ފެށި ހަމަލާތަކުގައި އެ ގައުމުގެ އަސްކަރީ އިސް ތިން އޮފިޝަލަކު މީގެކުރިން ވަނީ އަވާހަރަކޮށްލައިފަ އެވެ.

މިދިޔަ ހޯމަ ދުވަހުގެ ރޭ ދިން ހަމަލާތަކުގައި ރިވޮލިއުޝަނަރީ ގާޑްގެ ލަޝްކަރުގެ ކޮމާންޑަރު އަލީ ޝަދްމާނީ އަވަހާރަކޮށްލި އެވެ. ރިވޮލިއުޝަނަރީ ގާޑްގެ ލަޝްކަރުގެ ކޮމާންޑަރަކަށް އޭނާ ހަމަޖެއްސީ އޭގެ ކުރިން އެ މަގާމުގައި ހުންނެވި ހުސައިން ސަލާމީ ވެސް އިޒްރޭލުން އަވަހާރަކޮށްލުމުންނެވެ. އިޒްރޭލުން ވަނީ އިރާނުގެ އަސްކަރިއްޔާގެ ޗީފް އޮފް ސްޓާފް ގްލާމް އަލީ ރާޝިދު ވެސް މިދިޔަ ހަފުތާގައި އަވަހާރަކޮށްލައިފަ އެވެ.