އަމީން ސީޕީއަށް ގުޅިޔަސް ތަހުގީގަށް އަސަރެއް ނުކުރޭ: ކޮމިޝަން

މާލޭގެ އިމާރާތަކުން ޒުވާން އަންހެނަކު ވެއްޓުނު ހާދިސާގައި، ޓްރާންސްޕޯޓް މިނިސްޓަރު މުހައްމަދު އަމީންގެ އަމިއްލަ މަސްލަހަތު އޮތް މައްސަލައެއްގައި، ފުލުހުންގެ އެއްވެސް އޮފިސަރަކަށް ގުޅައި، މައްސަލައާ މެދު އެއްވެސް ވާހަކައެއް ދެއްކެވުމަކީ ބަލައިގަންނަން ދަތިކަމެއް ކަމަށް އެ ހާދިސާ ތަހުގީގުކުރަން އުފެއްދި ހާއްސަ ކޮމިޝަނުގެ ރިޕޯޓުގައި ބުނެފި އެވެ.

މިދިޔަ އޭޕްރީލް މަހުގެ 18 ވަނަ ދުވަހުގެ ރޭ މާލޭގެ އިމާރާތެއްގެ މަތިން ހައްވާ ޔުމްނު ރަޝީދު ވެއްޓުނު މައްސަލާގައި، އޭރުގެ ޕޮލިސް ކޮމިޝަނަރު އަލީ ޝުޖާއު އަށް ގުޅުއްވި ކަމަށާއި އެއީ ދިރިއުޅުއްވާ ގެ ބަލައި ފާސްކުރަން ކޯޓު އަމުރެއް ބޭނުން ނުވާނެ ކަމަށް ދަންނަވަން ކަމަށް އަމީން ވަނީ މީގެ ކުރިން އެއްބަސްވެވަޑައިގެންފަ އެވެ.

ޔުމްނު ވެއްޓުނު ރޭ އެންމެ ފުރަތަމަ ޒުވާނުންތަކެއް ޕާޓީކޮށްފައިވަނީ އަމީން ދިރިއުޅުއްވާ މއ. މާންދޫގޭދެކުނުގެ ޓެރެސްގައި ކަމަށް އެ ކޮމިޝަނުން ދާދި ދެންމެ އަކު ނެރުނު ރިޕޯޓުގައި ބުންޏެވެ.

އެ ރިޕޯޓު އެއްވެސް ކަހަލަ ސެންސަރު ކުރުމެއް ނެތި އާންމު ކުރަން ރައީސް ޑރ. މުހައްމަދު މުއިއްޒު އެންގެވުމާ ގުޅިގެން ރައީސް އޮފީހުން ވަނީ ރިޕޯޓު އޮތް ގޮތަށް އާންމުކޮށްފަ އެވެ.

ޔުމްނުއާ އެއްކޮށް އެ ޓެރެސް މަތީގައި އުޅުނު މީހުންގެ ތެރޭގައި، މި ހާދިސާގައި އެންމެ ބޮޑު ތުހުމަތެއް ކުރެވޭ ރައުދު އަހުމަދު ޒިލާލްގެ ބޭބެ ދާއޫދު އަހުމަދު ހިމެނޭ ކަމަށް ބުނެފައިވެ އެވެ. ދާއޫދަކީ، އެ ރިޕޯޓުގައި ފާހަގަކޮށްފައިވާ ގޮތުގައި 2023 ވަނަ އަހަރުގެ ރިޔާސީ އިންތިހާބުގައި އަމީންގެ ޓީމުގައި ހިމެނޭ މީހެކެވެ.

މީގެ އިތުރުން، އަމީނަށް ބޮޑުބޭބެ ކިޔާ ދެ ކުއްޖަކު ވެސް އެ ޓެރެސް މަތީގައި ޔުމްނުއާ އެކު ޕާޓީ ކުރިކަން އެނގޭއިރު، މިއީ ފުލުހުންގެ ތަހުގީގުން ބަލަމުންދިޔަ ކަންކަން ކަމަށް ވާތީ، މި މައްސަލައާ ގުޅިގެން ފުލުހުން ބޭއްވި ނޫސްވެރިންގެ ބައްދަލުވުމެއް ލައިވްކޮށް ކުރިއަށް ގެންދަނިކޮށް، ފުލުހުންގެ އެއްވެސް އޮފިސަރަކަށް ގުޅައި، މައްސަލައާ ގުޅޭ އެއްވެސް ވާހަކައެއް ދެއްކުމަކީ، އާންމު މީހެއްގެ ވިސްނުމުން ބެލިޔަސް، ބަލައިގަންނަން ދަތިކަމެއް ކަމުގައި ރިޔާސީ ކޮމިޝަނަށް ފެންނަ ކަމަށް ބުނެފައިވެ އެވެ.

"ނަމަވެސް، މިނިސްޓަރު މުހައްމަދު އަމީންގެ ފޯނު ކޯލުގެ ސަބަބުން އެކަމާ ގުޅިގެން، މި މައްސަލައިގެ ތަހުގީގަށް އެއްވެސް އަސަރެއް ކޮށްފައިވާކަމަށް މި ކޮމިޝަނަށް ނުފެނެ އެވެ،" އެ ރިޕޯޓުގައި ބުންޏެވެ.

ހޯމް މިނިސްޓަރު ސީނަށް ދާކަށް ނުޖެހޭ

އަމީންގެ އިތުރުން، ޔުމްނު ވެއްޓުނު ހާދިސާގައި ފުލުހުންގެ ތަހުގީގަށް ހޯމްލޭންޑް މިނިސްޓަރު އަލީ އިހުސާނު ނުފޫޒު ފޯރުވި ކަމަށް ތުހުމަތު ކުރެވޭތީ އެކަން ހިނގައިދިޔަ ގޮތް ވެސް ކޮމިޝަނުން ތަހުގީގުކޮށް، ރިޕޯޓުގައި ވަނީ ހިމަނައިފަ އެވެ.

މިގޮތުން، އެ ހާދިސާ ހިނގި ކުށުގެ ވެއްޓަށް އިހުސާން ޒިޔާރަތް ކުރައްވައި، ފޮޓޯ ނަންގަވައި ސީން އޮތް ގޮތް ބެލުމުގައި އޭނާ ހަރަކާތްތެރިވެވަޑައިގެންފައިވާ ކަމަށް ރިޕޯޓުގައި ފާހަގަކޮށްފައިވެ އެވެ.

ނަމަވެސް، އެއީ ގާނޫނުއަސާސީގެ ދަށުން ވެސް އަދި ފުލުހުންގެ ގާނޫނުގެ ދަށުން ވެސް ހޯމްލޭންޑް މިނިސްޓަރުގެ މަގާމުގެ މަސްއޫލިއްޔަތުތަކުގެ ތެރޭގައި ހިމެނޭ ކަމެއް ކަމަށް ނުފެންނަ ކަމަށާއި ކުށުގެ ވެއްޓަށް ވަޑައިގެން، މައްސަލައެއްގައި ގާތުން މަސައްކަތް ކުރުމަށް އެކަމަށް ހާއްސަ އިޖުރާއަތުތަކެއް ކަނޑައެޅުން މުހިންމު ކަމަށް ކޮމިޝަނުން ދެކޭ ކަމަށް ރިޕޯޓުގައި ބުންޏެވެ.

ޔުމްނު ވަނީ ގަސްދުގައި ވައްޓާލާފައި ކަމަށް ނޫނީ އޭނާ އަމިއްލަ އިހްތިޔާރުގައި ފުންމާލާފައިވާ ކަމަށް ކަނޑައެޅެން ނެތް ކަމަށް އެ ރިޕޯޓުގައި އިތުރަށް ބުންޏެވެ.

ރިޕޯޓުގައި ބުނީ، ޔުމްނު ވެއްޓުނު ވަގުތުގެ ސީސީޓީވީ ފުޓޭޖް އެ ފަންގިފިލާގައި ކެމެރާ ނެތުމުގެ ސަބަބުން ލިބެން ނެތް ކަމަށާއި ޔުމްނުގެ ބަހެއް ހޯދަން ކޮމިޝަނުން ކުރި މަސައްކަތް ކާމިޔާބު ނުވި ކަމަށެވެ.

އަދި އެ ރޭ ޔުމްނުއާ އެކު އުޅުނު ރައުދު، އެ ރޭ ހިނގި ކަންކަން ހަނދާނުގައި ނެތް ކަމަށް ބުނެ ކޮމިޝަނަށް ބަޔާން ދީފައިވާތީ، އެ ކަންކަމުގެ މައްޗަށް ބަލައި ކޮމިޝަނުން ބުނީ، ސިޑި ގޮޅީގައިވާ ކުޑަދޮރުން ރައުދު ގަސްދުގައި ޔުމްނު ވައްޓާލީ ކަން ނުވަތަ ނޫން ކަން ކަނޑައެޅެން ކޮމިޝަނަށް ނެތް ކަމަށެވެ.

ނަމަވެސް، ކޮމިޝަނަށް ފާހަގަކުރެވުނު ކަންކަމަށް ބަލާއިރު ޔުމްނު ވައްޓާލުމުގެ ފުރުސަތު ހަނިކަމަށް ކޮމިޝަނަށް ފެންނަ ކަމަށް ރިޕޯޓްގައި ބުނެފައިވެ އެވެ.