މީރާއަށް މިދިޔަ އަހަރު ބަލައިގަތް 28.1 ބިލިއަންގެ 98.9 ޕަސެންޓު އޮންލައިންކޮށް!

މޯލްޑިވްސް އިންލެންޑް ރެވެނިއު އޮތޯރިޓީ (މީރާ)އަށް މިދިޔަ އަހަރު ބަލައިގަތް އާމްދަނީގެ 98.9 ޕަސެންޓު ބަލައިގެންފައިވަނީ އޮންލައިން ވަސީލަތްތައް މެދުވެރިކޮށް ކަމަށް އެ އޮތޯރިޓީގެ އަހަރީ ރިޕޯޓުގައި ބުނެފި އެވެ.

މީރާގެ 2024 ވަނަ އަހަރުގެ އަހަރީ ރިޕޯޓުގައި ބުނެފައިވާ ގޮތުގައި، މީރާއަށް ޖުމްލަ 28.1 ބިލިއަން ރުފިޔާ ވަނީ ބަލައިގެންފަ އެވެ.

އޭގެތެރޭގައި ހިމެނެނީ، ޓެކްސް އާމްދަނީގެ ގޮތުގައި ބަލައިގަތް 22.77 ބިލިއަން ރުފިޔާ އާއި ޓެކްސް ނޫން އާމްދަނީގެ ގޮތުގައި 5.33 ބިލިއަން ރުފިޔާ އެވެ.

ޓެކްސް އާމްދަނީގެ ގޮތުގައި ލިބުނު އަދަދަކީ، މިދިޔަ އަހަރު ލިބޭނެކަމަށް އަންދާޒާކުރި ވަރަށް ވުރެ 9.7 ޕަސެންޓު އިތުރު އަދަދެކެވެ. އަދި މިއީ 2023 ވަނަ އަހަރު ލިބުނު ވަރަށް ވުރެ 10.5 ޕަސެންޓު އިތުރު އަދަދެއް ކަމަށް އަހަރީ ރިޕޯޓުގައި ބުނެފައިވެ އެވެ.

ޓެކްސް އާމްދަނީ އިތުރުވުމުގެ މައިގަނޑު ސަބަބުތަކުގެ ތެރޭގައި، ޓޫރިޒަމް ދާއިރާގެ ޖީއެސްޓީ ރޭޓު ވަނީ 16 ޕަސެންޓަށް ބޮޑުކުރުމާއި، މިދިޔަ އަހަރު ޓެކްސް ކުރެވުނު މުއްދަތުގައ،ި ރާއްޖެއަށް ޓޫރިސްޓުން ޒިޔާރަތްކުރި މިންވަރު 8.76 ޕަސެންޓުން އިތުރުވުން ވެސް ހިމެނެ އެވެ.

މީގެއިތުރުން، 2023 ވަނަ އަހަރާ އަޅައިބަލާއިރު، މިދިޔަ އަހަރުގެ ޓެކްސް ކުރެވުނު މުއްދަތުގައ،ި ޓެކުހާ ނުލައި ރިޕޯޓުކޮށްފައިވާ ޖުމުލަ ސޭލްސްގެ މިންވަރު ވަނީ 3.6 ޕަސެންޓު އިތުރުވުމާއި، ޓެކުހާ ނުލައި ރިޕޯޓު ކޮށްފައިވާ ޓެކްސް ބިނާކުރެވޭ ސޭލްސްގެ މިންވަރު 3.9 ޕަސެންޓު އިތުރުވުން ހިމެނެ އެވެ.

އަދި މިދިޔަ އަހަރު ޖީއެސްޓީގެ ގޮތުގައި ރިޕޯޓުކޮށްފައިވާ މިންވަރު 2023 ވަނަ އަހަރާ އަޅައިބަލާއިރު ފަސް ޕަސެންޓު އިތުރުވެފައިވާ ކަމަށް ވެސް މީރާއިން ބުންޏެވެ.

ޓެކްސް ނޫން އާމްދަނީގެ ގޮތުގައި ބަލައިގެންފައިވަނީ، މިދިޔަ އަހަރަށް ލަފާކުރި މިންވަރަށް ވުރެ 38.5 ޕަސެންޓު އިތުރު އަދަދެއް ކަމަށް ވެސް މީރާއިން ބުނެފައިވެ އެވެ.