ކާބޯތަކެތީގެ ރައްކާތެރިކަމަށް ސަރުކާރުން އަބަދުވެސް މަސައްކަތް ކުރަން: ރައީސް

ކޮންމެ ދުވަހަކު ކައި އުޅޭ ކާނާއަކީ ރައްކާތެރި ތަކެއްޗަށް ހެދުމަށް ސަރުކާރުން މަސައްކަތް ކުރާ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.

ކޮންމެ އަހަރެއްގެ ވެސް ޖޫން މަހުގެ 7 ވަނަ ދުވަހަކީ ދުނިޔޭގެ ކާބޯތަކެތީގެ ރައްކާތެރިކަމުގެ ދުވަހުގެ ގޮތުގައި ފާހަގަކުރާ ދުވަހެވެ.

މިއަދު ފާހަގަކުރާ އެ ދުވަހާ ގުޅިގެން އެކްސްގައި ކުރެއްވި ޕޯސްޓެއްގައި ރައީސް ވިދާޅުވީ ކާބޯތަކެތީގެ ރައްކާތެރިކަމަކީ ކޮންމެ ދުވަހެއްގެ ވެސް ދިރިއުޅުމާ ގުޅިފައިވާ މައްސަލައެއް ކަމަށެވެ.

އެއީ އާންމު ސިއްހަތާއި އިގްތިސާދީ ހަމަޖެހުމާ ވެސް ގުޅިފައިވާ ކަމެއްކަން ފާހަގަ ކުރައްވައި، ރައީސް ވިދާޅުވީ ކައި އުޅޭ ކާނާއަކީ ރައްކާތެރި އަދި ހަށިގަނޑަށް ފައިދާހުރި ކާނާއަކަށް ހެދުމަށް ސަރުކާރުން އަބަދުވެސް މަސައްކަތްކުރާ ކަމަށެވެ.

މިއަހަރުގެ ދުނިޔޭގެ ކާބޯތަކެތީގެ ރައްކާތެރިކަމުގެ ދުވަހުގެ ޝިއާރު، "ފުޑް ސޭފްޓީ: ސައިންސް އިން އެކްޝަން" އަށް އިޝާރާތް ކުރައްވައި، އެމަނިކުފާނު ވިދާޅުވީ ކާބޯތަކެތީގެ ޒަރިއްޔާއިން ޖެހޭ ބަލިތައް ދެނެގަނެ، އެކަންކަމުން ރައްކާތެރިވުމަށް ސައިންޓިފިކް ދިރާސާތައް ކުރުން ވަރަށް މުހިންމު ކަމަށެވެ.

މާލޭގައި ބިދޭސީން ސާފުތާހިރުކަން ކުޑަ ތަންތަނުގައި ކާބޯތަކެތި ތައްޔާރުކުރާ މައްސަލަތަކެއް ފެންމަތިވެފައިވެ މިދިޔަ އަހަރު ވަނީ ކާބޯތަކެއްޗާ ބެހޭ ގަވާއިދެއް އެކުލަވާލައިފަ އެވެ. އޭގެ ދަށުން ރާއްޖެއަށް އެތެރެ ކުރާ ކާބޯތަކެތި ޓެސްޓު ކުރުމާއި ގޭގައި ހަދައިގެން ވިއްކާ ތަކެތީގެ ރައްކާތެރިކަން ވެސް ބަލަން ޖެހެ އެވެ.

އޭގެ ދަށުން އެ ރަޖިސްޓްރީ ނުކޮށް ކާބޯތަކެތީގެ ހިދުމަތް ދޭނަމަ އެކަމެއްގެ ކުޑަބޮޑުމިނަށް ބަލައިގެން 10،000ރ. އާއި 500،000ރ. އާ ދެމެދުގެ އަދަދަކުން ޖޫރިމަނާ ވެސް ކުރެވެ އެވެ.