އައިޖީއެމްއެޗްގެ 75 އެނދުގެ މަލްޓި ސްޕެޝަލިޓީ ސާޖިކަލް ވިންގް ރައީސް ހުޅުވައިދެއްވައިފި

އައިޖީއެމްއެޗުގައި ގާއިމުކޮށްފައިވާ 75 އެނދުގެ މަލްޓި ސްޕެޝަލިޓީ ސާޖިކަލް ވިންގް، ރައީސް ޑރ. މުހައްމަދު މުއިއްޒު ހުޅުއްވައި ދެއްވަައިފި އެވެ.

މަލްޓި ސްޕެޝަލިޓީ ސާޖިކަލް ވިންގްގައި ޖެނަރަލް ސާޖަރީތަކާއި ނިއުރޯ ސާޖަރީތަކާއި ޕްލާސްޓިކް ސާޖަރީތަކާއި އޯތޯ ސާޖަރީތަކާއި ޔޫރޮލޮޖީގެ ސާޖަރީތައް ކުރާ ބަލި މީހުން އެޑްމިޓްކުރެވޭނެ އެވެ. އެ ވިންގްއާ އެކު އައިޖީއެމްއެޗްގެ އެނދުގެ ޖުމްލަ އަދަދު ވަނީ 510 އަށް އިތުރުވެފަ އެވެ.

އެ ހަފްލާގައި މާލޭ ސިޓީ ގްރޫޕް އޮފް ހޮސްޕިޓަލުގެ ޗީފް އެގްޒެކްޓިވް އޮފިސަރު އިބްރާހިމް އަބްދުއްރައްޒާގު ހަލީމް ވިދާޅުވީ ފާއިތުވި ދޮޅު އަހަރެއްހާ ދުވަހުގެ ތެރޭގައި ސިއްހީ ދާއިރާގެ ކުރިއެރުމަށް ރައީސް މުއިއްޒު މަސައްކަތް ކުރައްވާފައިވާ ކަމަށެވެ.

މިދިޔަ ދޮޅު އަހަރުގެ ތެރޭގައި 194 އެނދު އިތުރުކުރެވިފައިވާ ކަމަށް އޭނާ ވިދާޅުވި އެވެ.

ހަލީމް ވިދާޅުވީ ސިއްހީ ދާއިރާގެ އިންސާނީ ވަސީލަތްތައް ތަރައްގީކުރުމަށް ވެސް މަސައްކަތްތައް ކުރައްވާފައިވާ ކަމަށެވެ. ދާއިރާއިން ބޭނުންވާ 411 މުވައްޒަފުން ރެކްރޫޓްކުރުމުގެ ހުއްދަ ލިބިފައިވާ ކަމަށް ވެސް ވިދާޅުވި އެވެ.