ބަދުއަހުލާގީ އަމަލު ހިންގަން އުޅުނު ޓީޗަރު ރާއްޖެ ނާދެވޭ ގޮތަށް ފޮނުވާލަނީ

ބ. ގޮއިދޫ ސްކޫލްގައި އިނގިރޭސި ކިޔަވައިދޭ އިންޑިއާ ޓީޗަރެއްގެ ބަދުއަހުލާގީ މައްސަލަތަކެއް ފެންމަތިވެފައި ވާތީ އޭނާ ބްލެކް ލިސްޓުކޮށް، ރާއްޖެއަށް ނާދެވޭ ގޮތަށް ފޮނުވާލުމުގެ މަސައްކަތް ކުރަމުން އަންނަ ކަމަށް އެޑިޔުކޭޝަން މިނިސްޓްރީން މިއަދު ބުނެފި އެވެ.

ގޯރީސަންކަރު ޕީޖީ ނަމަކަށް ކިޔާ އެ ފިރިހެން ޓީޗަރު ބަދުއަހުލާގީ އަމަލު ހިންގުމަށް އެދި އެހެން ފިރިހެނުންނަށް މެސެޖުކޮށްފައި ހުރި ޗެޓްލޮގްތަކެއް މިދިޔަ ހޯދަ ދުވަހު ސޯޝަލް މީޑިއާގައި އާންމުވެފައިވެ އެވެ. އެ ޗެޓްލޮގުތައް އާންމުކުރި އެކައުންޓުން ބުނެފައިވާ ގޮތުގައި އެ ޓީޗަރުގެ މައްސަލަ އެ މައްސަލަ ފަޅާއެރި ރޭ ފުލުހުންނަށް ވަނީ ހުށަހަޅައިފަ އެވެ.

އެޑިއުކޭޝަން މިނިސްޓަރު ޑރ. އިސްމާއިލް ޝަފީއު އެކަމާ ގުޅޭ ގޮތުން "މިހާރު" އަށް ވިދާޅުވީ އެފަދަ ކަންކަމަކީ ޓީޗަރެއްގެ ކިބައިން އެއްވެސް ވަރަކަށް ބަލައިގަނެވޭނެ އަމަލުތަކެއް ނޫން ކަމަށެވެ.

މިނިސްޓަރު ވިދާޅުވީ އެ މައްސަލަ މިނިސްޓްރީއަށް ހުށަހެޅި ހިސާބުން، ޓީޗަރު ވަޒީފާއަށް ނުކުތުން ހުއްޓުވައި ރާއްޖެއިން ފޮނުވާލުމުގެ މަސައްކަތް ފަށާފައިވާ ކަމަށެވެ.

"އެ ޓީޗަރަށް ދެން ރާއްޖެ ނާދެވޭ ގޮތަށް ބްލެކް ލިސްޓުކޮށް ފޮނުވާލުމުގެ މަސައްކަތް ކުރެވެމުންދަނީ،" މިނިސްޓަރު ވިދާޅުވި އެވެ.

މި މައްސަލައާ ބެހޭ ގޮތުން ފުލުހުން ކުރިން ބުނެފައިވާ ގޮތުގައި އެ މައްސަލަ ހުށަހެޅުމުން ބަލަމުން އަންނައިރު އެކަމާ ގުޅުންހުރި އެހެން އިދާރާތަކުގެ ސަމާލުކަމަށް ވެސް މައްސަލަ ވަނީ ގެނެސްފަ އެވެ.