"ފުޓްބޯޅަ އެނބުރި އަތުވެއްޖެ"؛ ޓީސީ އާއި އޮޑި އެއްވަރު

އަހަރަކަށް ވުރެ ގިނަ ދުވަސް ފަހުން ސީނިއާ ލެވަލްގައި ރާއްޖޭގައި ކުޅުނު ފުރަތަމަ މެޗުގައި ޓީސީ ސްޕޯޓްސް އާއި އޮޑި ސްޕޯޓްސް ލަނޑެއް ނުޖެހި އެއްވަރުވެއްޖެ އެވެ.

އެފްއޭއެމް ލީގު ކަޕްގެ ނަމުގައި ފުޓްބޯޅައިގެ ރަސްމީ ކަލަންޑަރުން ބޭރުން މުބާރާތް މިރޭ ފެށީ، މިދިޔަ މަހު ފަށަން މަސައްކަތް ކުރި ފުޓްބޯޅަ ސީޒަން ފީފާއިން އަންގައިގެން ފަސް ކުރުމަށް ފަހު އެވެ.

ބައެއް ޓީމުތައް ޕްރީ ސީޒަން ތަމްރީނުތައް ފެށި އެވެ. ބިދޭސީ ކޯޗުންނާއި ބިދޭސީ ކުޅުންތެރިން ގެނެސް ސްކޮޑް ހަމަ ކުރި އެވެ. އޭރު ޓީމުތަކުން ތައްޔާރު ވަމުން ދިޔައީ އެފްއޭއެމުން ފުޓްބޯޅަ ސީޒަން ފަށާނެ ކަމަށެވެ.

އެކަމަކު ފީފާއިން އެނގީ އެ އިދާރާގެ ނޯމަލައިޒޭޝަން ހާލަތުގައި އޮތް އެސޯސިއޭޝަން ނޯމަލައިޒް ކުރުމުގެ މަސައްކަތަށް އިސްކަން ދިނުމަށެވެ. އަދި އޭއެފްސީގެ ކަލަންޑަރާ އެއްގޮތަށް އޯގަސްޓް މަހު ސީޒަން ފަށަން ލަފާ ދީފައިވާ ކަމަށް ވެސް އެފްއޭއެމުން ކްލަބްތަކަށް ފޮނުވި މެމޯގައި ވެ އެވެ.

ފީފާގެ އެންގުމަށް ބޯލަނބައި އެފްއޭއެމުން ދެން މަސައްކަތް ފެށީ ކްލަބްތަކުގެ މަސައްކަތް ބޭކާރުވިޔަ ނުދިނުމަށް މުބާރާތެއް ބޭއްވުމަށެވެ. ރެލިގޭޝަނާއި ރޭންކިން އަށް ނުބަލައި މުބާރާތެއް ބޭއްވުމުގެ ހުއްދަ ފީފާއިން ދިނެވެ.

މުބާރާތުގައި ބައިވެރިވުމަށް ފުރަތަމަ ފުރުސަތު ހުޅުވާލީ އެއްވަނަ ޑިވިޝަނުގެ ޓީމުތަކަށެވެ. އެ ފުރުސަތު ބޭނުން ހިފީ ތިން ކްލަބަކެވެ. އެއީ ފުރަތަމަ މެޗުގައި ވާދަ ކުރި ޓީސީ އާއި އޮޑީގެ އިތުން މާޒިޔާ އެވެ. އެއްވަނަ ޑިވިޝަނުގެ ގިނަ ކްލަބްތަކުގެ ތަރުހީބު ކުޑަވުމުން ދެވަނަ ޑިވިޝަނަށް ހުޅުވާލި ފުރުސަތުގައި ނިއު ރޭޑިއަންޓާއި މަހިބަދޫ ސްޕޯޓްސްއިން ބައިވެރިވެ ޖުމުލަ ފަސް ޓީމު ހަމަ ކުރި އެވެ.

މުބާރާތް ބޭއްވުމަށް ފީފާއިން 50،000 ޑޮލަރު ވެސް އެފްއޭއެމަށް ޖަމާކޮށްދިނެވެ. އެކަމަކު އެ ފައިސާ ހަރަދުކުރަން ޖެހޭނީ އިނަމު ފައިސާ ދިނުމަށާއި މުބާރާތުގެ އިންތިޒާމުތަކަށް ކަމަށް ފީފާއިން އެފްއޭއެމަށް ކަނޑައަޅާފައިވާ އޮޑިޓް ފާމް "އެންކޫރާ" އިން ޝަރުތު ކުރި އެވެ.

ޓީސީ އާއި އޮޑިގެ މެޗު ނިމުނީ ލަނޑެއް ނުޖެހި އެއްވަރުވެގެންނެވެ. އެއީ މިދިޔަ އަހަރު ފެބްރުއަރީ މަހު ދެވަނަ ޑިވިޝަނުގެ ފައިނަލު މެޗަށް ފަހު އޮޑިން ކުޅުނު ފުރަތަމަ މެޗެވެ. ޓީސީން ސީނިއާ ލެވަލްގައި މީގެ ކުރިން މެޗެއް ކުޅުނީ ޑިސެމްބަރު 2023 ގަ އެވެ.

ސީނިއާ ލެވަލްގައި ކްލަބް ފުޓްބޯޅައިގެ ހަރަކާތެއް މިދިޔަ އެއް އަހަރުތެރޭގައި ނެތް ނަމަވެސް ޔޫތު މުބާރާތްތައް އެފްއޭއެމުން ބޭއްވި އެވެ.

މޯލްޑިވްސް ސޮކަ މޭޓްސް އާއި ގުޅިގެން މިދިޔަ އަހަރު ތިން އުމުރުފުރާއަށް ހާއްސަކޮށް ބޭއްވި ދިވެހި ޔޫތު ލީގަކީ، ޔޫތު ފުޓްބޯޅައިގެން އެންމެ ބޮޑު ހަރަކާތެވެ.

ސީނިއާ ލެވަލްގައި ރަސްމީ ކްލަބް ފުޓްބޯޅައިގެ ހަރަކާތް ގަލޮޅު ދަނޑުގައި މިދިޔަ އަހަރެއްހައި ދުވަހު ނެތަސް މިދިޔަ އަހަރު ބާއްވަން ފެށި ނައިންޓީ ޕްލަސް ގޯލްޑް ކަޕުގެ މެޗުތަކުން ގަލޮޅު ދަނޑަށް ފޯރި އާއި ޖޯޝު ގެނެސް ދިނެވެ. ހާއްސަކޮށް ބ. އޭދަފުއްޓާއި އައްޑޫ ސިޓީން ކުޅުނު ފައިނަލު މެޗުގައި ދަނޑުގެ ކެޕޭސިޓީ އެއްކޮށް ފުރިގެން ބަންޑުން ވިއެވެ. ފައިނަލު މެޗުގެ ޓިކެޓް ގިނަ ބަޔަކަށް ނުލިބިގެން އެ ހިތްހަމަނުޖެހުންތައް ވެސް ވަރަށް ބޮޑަށް ފެންމަތިވި އެވެ.