ހަމާސް އަށް ލުބްނާންގެ އިންޒާރެއް

ލުބްނާންގެ ބިމުގައި އެ ގައުމުގެ ސަލާމަތަށް ނުރައްކާވާނެ އެއްވެސް ކަމެއް ނުކުރުމަށް، ލުބްނާންގެ ސަލާމަތީ ކަންކަމާ ބެހޭ އެންމެ އިސް އިދާރާއިން ހަމާސް ޖަމާއަތަށް އިއްޔެ އިންޒާރު ދީފި އެވެ.

ލުބްނާންގެ ދިފާއީ ކަންކަމާ ބެހޭ އެންމެ މަތީ މަޖިލީހުން މި އިންޒާރު ދިނީ ލުބްނާންގެ ތެރެއިން އިޒްރޭލަށް އަމާޒުކޮށް ދިން ރޮކެޓް ހަމަލާތަކަކަށް ފަހު އިޒްރޭލުން ރައްދުގައި ވަރުގަދަ ހަމަލާތަކެއް ދީފައި ވަނިކޮށެވެ.

ރައީސް ޖޯސެފް އައުން އިސްވެ ހުންނަވާ އެ ކައުންސިލުން ބުނީ "ލުބްނާނުގެ އިސްތިގުލާލަށް ނުރައްކާ އެއްވެސް އަމަލެއް ހިންގާ ނަމަ އެކަން ހުއްޓުވުމަށް އަޅަންޖެހޭ ކޮންމެ ފިޔަވަޅެއް އަޅާނެ" ކަމަށެވެ.

މިދިޔަ މަހު ލުބުނާނުގެ އަސްކަރިއްޔާއިން ވަނީ މިދިޔަ 22 ވަނަ ދުވަހާއ 28 ވަނަ ދުވަހު އިޒްރޭލާ ދިމާލަށް ރޮކެޓް ހަމަލާދިން ކަމަށް ތުހުމަތުކުރެވޭ ލުބްނާން ބަޔަކާއި ފަލަސްތީނުގެ ބަޔަކު ހައްޔަރުކޮށްފަ އެވެ.

މި ހަމަލާތަކުގެ ޒިންމާ އެއްވެސް ޖަމާއަތަކުން އުފުލާފައި ނުވާއިރު، މިދިޔަ އަހަރު އިޒްރޭލާ ދެކޮޅަށް ހަނގުރާމަކުރި ލުބުނާނުގެ ހިޒްބުﷲ އިން ވަނީ އެކަމުގައި އެއްވެސް ބައިވެރިވުމެއް ނެތް ކަމަށް ބުނެފަ އެވެ.

ލުބުނާނުގެ ސަލާމަތީ އޮފިޝަލުން އޭއެފްޕީއަށް ވިދާޅުވި ގޮތުގައި ސިފައިން ހައްޔަރުކުރި މީހުންގެ ތެރޭގައި ހަމާސްގެ ތިން މީހަކު ހިމެނެ އެވެ.

މީގެ ކުރިން ހަމާސް އިން ވަނީ އިޒްރޭލަށް ލުބްނާންގެ ތެރެއިން ދިން ބައެއް ހަމަލާތަކުގެ ޒިންމާ އުފުލައިފަ އެވެ.

ސަލާމަތީ ކައުންސިލުން ނެރުނު ބަޔާނުގައި ބުނީ ލުބްނާނަކީ ހަމަނުޖެހުން އުފައްދަން ބޭނުންކުރާ މައިދާނެއްގެ ގޮތުގައި ބޭނުންކޮށްގެން ނުވަތަ ބޭކާރު ހަނގުރާމަތަކުގެ ތެރެއަށް ވައްޓާލައިގެން ނުވާނެ ކަމަށެވެ.

ބޮޑުވަޒީރު ނަވާފް ސަލާމް ވަނީ ގާނޫނާ ހިލާފަށް ގެންގުޅޭ ހަތިޔާރު ވެސް ހަވާލުކުރަން ޖެހޭނެ ކަމަށާއި ހަމާސް އާއި ހަނގުރާމަވެރި އެހެން ޖަމާއަތްތަކުން ލުބްނާންގެ ސަލާމަތަށް ނުރައްކާވާ ކަންކަން ކޮށްގެން ނުވާނެ ކަމަށް ވިދާޅުވެފަ އެވެ.