Roadha Mihaaru

ދިރާގު "ފުވައްމުލައް ރަން" ގެ ބިބް އަދި ރޭސް ކިޓް ފުވައްމުލަކުން ދޫކުރަނީ

ދިރާގު ފުވައްމުލައް ރަން (ޑީއެފްއާރް)ގެ ބިބް އަދި ރޭސް ކިޓް މިއަދު އެ ރަށުގައި ދޫކުރަން ފަށައިފި އެވެ.

ފުވައްމުލައް ރަންގެ ބިބާއި ރޭސް ކިޓް އެ ރަށުން ދެނީ
އައިޝަތު ޖަޒްލީ
އައިޝަތު ޖަޒްލީ

29 އެޕްރީލް 2025

ދިރާގު ފުވައްމުލައް ރަން (ޑީއެފްއާރް)ގެ ބިބް އަދި ރޭސް ކިޓް މިއަދު އެ ރަށުގައި ދޫކުރަން ފަށައިފި އެވެ.

މިއަދާއި މާދަމާ ބިބް އަދި ރޭސް ކިޓު ދޫކުރާނީ ފުވައްމުލައް ސިޓީ ކައުންސިލް އޮފީހުގެ ކުރެނދުމާ މާލަމުގަ އެވެ. މިއަދު ބިބް އެކްސްޕޯ ކުރިއަށް ދާނީ މެންދުރު 2:30 އިން ހަވީރު 6 އަށް އަދި ރޭގަނޑު 8 އިން 10 އަށެވެ. މާދަމާ އެ އެކްސްޕޯ ކުރިއަށް ދާނީ ހެނދުނު 9 އިން މެންދުރު 12 އަށާއި މެންދުރު 2 އިން ހަވީރު 6 އަށް އަދި ރޭގަނޑު 8 އިން 10 އަށެވެ.

މި ދުވުމުގައި މާލެއިން ބައިވެރިވާ ފަރާތްތަކަށް ހާއްސަކޮށް މާލޭގައި ވެސް ބިބް ދޫކުރުމުގެ އެކްސްޕޯއެއް ވަނީ މި މަހުގެ 20 ވަނަ ދުވަހާއި 21 ވަނަ ދުވަހު ކުރިއަށް ގެންގޮސްފަ އެވެ.

ކޮންމެ ރޭސް ކިޓެއްގައި ވެސް ޓައިމިން ޗިޕް އެކުލެވޭ ބިބް، ޓީޝާޓު، ސްޓްރިންގް ބޭގް އަދި ހަތަރު ނަރުދަތި ހިމެނޭނެ އެވެ. ދިރާގުން ރޭސް ކިޓް ހަވާލުކުރާނީ ދުވުންތެރިޔާގެ އައިޑީ ކާޑު (ނުވަތަ އައިޑީ ކާޑުގެ ފޮޓޯއެއް) އަދި ބިބް ނަންބަރު ހުށަހެޅުމުންނެވެ.

ދިރާގު މޯލްޑިވްސް ރޯޑް ރޭހަކީ ރާއްޖޭގައި ބާއްވާ ހަމައެކަނި ބައިނަލްއަގުވާމީ ދުވުމެވެ. މިއީ އެސޯސިއޭޝަން އޮފް އިންޓަނޭޝަނަލް މެރަތަންސް އެންޑް ޑިސްޓަންސް ރޭސަސް (އެއިމްސް) ގައި ލިސްޓުކޮށް ވޯލްޑް ރަނިން ކަލަންޑަރުގައި ހިމެނޭ އަދި ވޯލްޑް އެތްލެޓިކްސް ސެޓިފައިޑް ރޫޓެއް ހިމެނޭ ދުވުމެކެވެ. ދިރާގު ރޯޑް ރޭހުގެ ދަށުން ބައްވާ ފުވައްމުލައް ރަން ވެސް މިހާރު ވަނީ އެއިމްސްގެ ކަލަންޑަރުގައި ލިސްޓުކޮށްފަ އެވެ. މި ދުވުން އޮންނާނީ އަންނަ މަހުގެ ދެ ވަނަ ދުވަހު އެވެ.