ދިރާގު މޯލްޑިވްސް ގޭމިން ކޮންކުއެސްޓުގައި ބައިވެރިވުމުގެ ފުރުސަތު މާދަމާ ރޭގެ ނިޔަލަށް

ދިރާގުން އިންތިޒާމްކޮށްގެން ރާއްޖޭގައި މިހާތަނަށް ބާއްވަން ހަމަޖެހިފައިވާ އެންމެ ބޮޑު އެއް އީ-ސްޕޯޓްސް މުބާރާތް "ދިރާގު މޯލްޑިވްސް ގޭމިން ކޮންކުއެސްޓް" (ޑީއެމްޖީސީ) ގެ މޮބައިލް ލެޖެންޑް ކޮލިފަޔާސްގައި ބައިވެރިވުމުގެ ފުރުސަތު މުޅި ރާއްޖެއަށް ހުޅުވައިލައިފި އެވެ.

ދިރާގު ގޭމާސް ގިލްޑް (ޑީޖީޖީ) އިން އިންތިޒާމްކޮށްގެން ބާއްވާ އެ މުބާރާތުގައި ރަޖިސްޓްރީކުރުމުގެ ފުރުސަތު މާދަމާ ރޭގެ ނިޔަލަށް ލިބޭނެ އެވެ. އެ މުބާރާތަކީ ރާއްޖޭގެ ކޮންމެ ހިސާބަކުން ވެސް ބައިވެރިވެވޭ ގޮތަށް އޮންލައިން ފޯމެޓަށް ކުރިއަށްގެންދާ މުބާރާތެކެވެ. އެ މުބާރާތުގައި ބައިވެރިވާ ޓީމުތަކުގެ ތެރެއިން ޑީއެމްޖީސީއަށް ކޮލިފައި ވާނީ އެ މުބާރާތުގެ އެންމެ މޮޅު 8 ޓީމެވެ.

މޮބައިލް ލެޖެންޑް ކޮލިފަޔާސްގައި ބައިވެރިވެ ވަނަވަނައަށް ދާ ޓީމުތަކަށް ވަނީ ޖުމްލަ 15،000ރ. އަގުހުރި ފައިސާގެ އިނާމް ކަނޑައަޅައިފަ އެވެ. އޭގެ ތެރޭގައި ހިމެނެނީ އެއް ވަނަ އަށް ދާ ޓީމަށް 7،000ރ، ދެ ވަނަ އަށް ދާ ޓީމަށް 5،000ރ. އަދި ތިން ވަނަ އަށް ދާ ޓީމަށް 3،000ރ. އެވެ.

ޑީއެމްޖީސީއަކީ ދިވެހިރާއްޖޭގައި ތިބި އެންމެ ހުނަވެރި ގޭމަރުން އެއްތާކުން ފެނިގެންދާނެ ގޮތަށް ޕަބްޖީ، ރޮކެޓް ލީގް އަދި އެފްސީ 25 ގޭމްތައް ހިމަނައިގެން ކުރިއަށްގެންދާ ޗެމްޕިއަންޝިޕެކެވެ. މޮބައިލް ލެޖެންޑްސް ކޮލިފަޔާސް އަކީ ޑީއެމްޖީސީއާ ހަމައަށް ދިއުމަށް ހުޅުވާލާ ފުރުތަމަ މުބާރާތެވެ.

ޑީޖީޖީ އިން އަންނަނީ ރާއްޖޭގެ އެކި ކަންކޮޅުތަކުގައި އީ-ސްޕޯޓްސް ކުރިއަރުވަން ގިނަ މަސައްކަތްތަކެއް ކޮށް އެކި މުބާރާތްތައް ބާއްވަމުންނެވެ.