24 ހޮސްޕިޓަލާ އެކު 90 ރަށެއްގައި މި އަހަރު ޕްރޮޖެކްޓް ފަށާނަން: ނާޒިމް

ސިއްހީ ހިދުމަތްތައް ރަނގަޅުކުރަން 24 ރަށެއްގައި އަލަށް ހޮސްޕިޓަލް އަޅަން ފެށުމާ އެކު މި އަހަރުގެ ތެރޭގައި އިތުރު 90 ރަށެއްގައި ޕްރޮޖެކްޓުތައް ހިންގާނެ ކަމަށް ހެލްތު މިނިސްޓަރު އަބްދުﷲ ނާޒިމް އިބްރާހިމް މިއަދު ވިދާޅުވެއްޖެ އެވެ.

ހެލްތު މިނިސްޓްރީން މިއަދު ވަނީ، ރ. އުނގޫފާރު ރީޖަނަލް ހޮސްޕިޓަލާއި ގދ. ތިނަދޫ އަބްދުއްސަމަދު މެމޯރިއަލް ހޮސްޕިޓަލް އަދި ޅ. ނައިފަރު ހުންނަ އަތޮޅު ހޮސްޕިޓަލުގެ ލޭބަރޫމް ކޮމްޕްލެކްސް އަދި އައިސީޔޫ ތަރައްގީކުރުމުގެ އެއްބަސްވުމުގައި ސޮއިކޮށްފަ އެވެ.

އެ ރަސްމިއްޔާތުގައި، ނާޒިމް ވިދާޅުވީ މި ފަހުން 10 ރަށެއްގައި ހޮސްޕިޓަލު އަދި 10 ރަށެއްގައި ހެލްތު ސެންޓަރުގެ އާ އިމާރާތުގެ މަސައްކަތް ސަރުކާރުގެ ކުންފުނިތަކާ ހަވާލުކޮށްފައިވާ ކަމަށެވެ.

އެހެންވެ، މި ވަގުތު 19 ހޮސްޕިޓަލާއި 15 ސިއްހީ މަރުކަޒުގެ އާ އިމާރާތް އަދި އެ ތަންތަނުގެ ޖާގަ އިތުރުކުރަން 21 މަޝްރޫއެއް ހިންގަ އެވެ.

ނާޒިމް ވިދާޅުވި ގޮތުގައި މަސައްކަތް އަދި ހަވާލުނުކުރާ ރަށްރަށުގެ މީހުން، އެ ރަށްރަށުގައި މަޝްރޫއު ފަށާނެ ދުވަހެއް ބަލަން ބޭނުންވެ އެވެ. އެކަމަށް ވެސް އޭނާ ވަނީ މިއަދު ޖަވާބު ދެއްވައިފަ އެވެ.

މިނިސްޓަރު ވިދާޅުވީ ތާވަލާ އެއްގޮތަށް ކުރިއަށްދާނަމަ މި އަހަރުގެ ތެރޭގައި 24 ރަށެއްގައި އާ ހޮސްޕިޓަލު އަޅަން ހަވާލުކުރާނެ ކަމަށެވެ. އޭގެ އިތުރުން ފަސް ސިއްހީ މަރުކަޒާއި ސިއްހީ ހިދުމަތްދޭ ތަންތަނުގެ ޖާގަ އިތުރުކުރުމުގެ 60 މަޝްރޫއެއް މި އަހަރު ކުރިއަށްގެންދާނެ ކަމަށް ނާޒިމް ވިދާޅުވި އެވެ.

"ރައީސްގެ ވަރަށް މުހިއްމު ތަސައްވުރެއް އަތޮޅު ތެރޭގެ ސިއްހީ ހިދުމަތް ފުޅާކޮށް، ހާއްސަކޮށް ރީޖަނަލް ހޮސްޕިޓަލްތައް ޓާޝަރީ ލެވެލްއަށް ހިދުމަތްތައް ބަދަލުކުރުން. އެ ތަންތަނަށް ސަބް-ސްޕެޝަލިޓީގެ ހިދުމަތްތައް ތައާރަފްކުރަން އެބަޖެހޭ. އެގޮތުން ނެފްރޮލޮޖީ، ކާޑިއޮލޮޖީ، ކެތު ލެބު ފަދަ ހިދުމަތްތައް އަންނާނެ ގޮތަށް ޓާޝަރީ ފެންވަރަށް އެ ތަންތަން ތަރައްގީކުރެވިގެންދާނެ." މިނިސްޓަރު ވިދާޅުވި އެވެ.

އޭނާ ވިދާޅުވި ގޮތުގައި އެ ހޮސްޕިޓަލުތައް ޓާޝަރީ ފެންވަރަށް ބަދަލުކުރާނީ ދެ ފިޔަވައްސަކަށް ބަހާލައިގެންނެވެ. ޖާގަ އިތުރުކުރުމާއި ހިދުމަތްތައް ދިނުމަށް ބޭނުންވާނެ މުވައްޒަފުން ހޯދުމުގެ މަސައްކަތް މި ވަގުތު ވަނީ ފަށައިފަ އެވެ.