އަތޮޅު ހޮސްޕިޓަލްތަކުގައި ސައިކޭޓްރީ އަދި ސްޕީޗް ތެރަޕީގެ ހިދުމަތް ފަށަނީ

ހުރިހާ އަތޮޅު ހޮސްޕިޓަލްތަކުގައި ސައިކޭޓްރީ އަދި ސްޕީޗް ތެރަޕީގެ ހިދުމަތް ފެށުމަށް ސަރުކާރުން ނިންމައިފި އެވެ.

ހޮސްޕިޓަލްތަކަށް، ހެލްތު މިނިސްޓަރު އަބްދުﷲ ނާޒިމް އިބްރާހިމް ފޮނުއްވި ލިޔުމެެއްގައި ވިދާޅުވީ ރާއްޖޭގައި ނަފްސާނީ އެކި އުނދަގޫތައް ދިމާވާ މީހުންގެ އަދަދު ކަންބޮޑުވާ ވަރަށް އިތުރުވަމުންދާ ކަމަށެވެ. އޭގެ ސަބަބުން ނަފްސާނީ ބަލި ހާލަތު ތަހައްމަލުކުރާ މީހުންނާއި އަމިއްލައަށް މަރުވާ މީހުން އަދި ނުކުޅެދުންތެރިކަމާ ކުރިމަތިލާ މީހުން އިތުރުވަމުންދާ ކަމަށެވެ.

އެ ހިދުމަތްތައް މިހާރު ލިބެނީ މާލޭގެ އިތުރުން ލެވެލް ތިނެއް ނުވަތަ ރީޖަނަލް ހޮސްޕިޓަލުތަކުގައި އެކަންޏެވެ. ނަމަވެސް، ރަށްރަށުގައި ނަފްސާނީ ފަރުވާ އަދި ތެރަޕީތައް ހޯދަން އުނދަގޫވުމުން ހިދުމަތްތައް ފުޅާކުރަން ނިންމީ ކަމަށް މިދިޔަ ހޮނިހިރު ދުވަހު ފޮނުއްވި ޕޮލިސީ ނިންމުމުގައި ވެ އެވެ.

"ތެރަޕީ އާއި ކައުންސެލިން ފަދަ ހިދުމަތްތައް މާލެ ސަރަހައްދަށް އެކަނި ސެންޓްރަލައިޒް ވެފައި ހުރުމާއެކު ހިދުމަތް ހޯދަން ބޭނުންވާ ފަރާތްތަކުގެ ވެއިޓްލިސްޓް ދިގުވުމާއި އަތޮޅުތަކުން މާލެ އައިސްގެން މެނުވީ މިފަދަ ހިދުމަތްތައް ލިބެން ނެތުމުން ވަރަށް ގިނަ ގޮންޖެހުންތަކާ އާއްމުން ކުރިމަތިލާން ޖެހިފައިވެ އެވެ،" އެ ލިޔުމުގައިވެ އެވެ.

އެހެންވެ، ގައުމީ ފެންވަރުގައި ސިއްހީ ނިޒާމުގެ ތެރެއިން ނަފްސާނީ ބަލިތަކަށް ފަރުވާ އަދި އެހީތެރިކަން ދެވޭ މިންވަރު އިތުރުކޮށް، ހިދުމަތް ޖޯދާ މީހުންގެ ވެއިޓްލިސްޓުގައި މަޑުކުރަންޖެހޭ މުއްދަތު ކުޑަކުރުމާއި ސައިކޮލޮޖިސްޓުންނާއި ސައިކޭޓްރިސްޓުންނާއި ކައުންސެލަރުންނާއި ތެރަޕިސްޓުން އަދި ސޯޝަލް ވޯކަރުންގެ އެހީތެރިކަން ހޯދަން ފަސޭހަ ގޮތެއް ގާއިމްކޮށް، ލެވެލް 2 ގެ ހޮސްޕިޓަލްތަކުގައި އެ ހިދުމަތް ފަށަން ނިންމީ ކަމަށް ނާޒިމް ވިދާޅުވި އެވެ.

އެނގިފައިވާ ގޮތުގައި ސަރުކާރުން މިހާރު ތައްޔާރުވަމުން އަންނަނީ ހއ. އަތޮޅު ހޮސްޕިޓަލާއި ށ. އަތޮޅު ހޮސްޕިޓަލާއި ނ. އަތޮޅު ހޮސްޕިޓަލާއި ބ. އަތޮޅު ހޮސްޕިޓަލާއި ޅ. އަތޮޅު ހޮސްޕިޓަލްާއި ފ. އަތޮޅު ހޮސްޕިޓަލާއި ދ. އަތޮޅު ހޮސްޕިޓަލާއި ތ. އަތޮޅު ހޮސްޕިޓަލާއި ގއ. އަދި ފުވައްމުލަކު ހޮސްޕިޓަލުގައި އަންނަ އަހަރުގެ ކުރީކޮޅު އެ ހިދުމަތްތައް ފެށުމަށެވެ. އޭގެ އިތުރުން ސަރުކާރުން އަންނަނީ އަތޮޅު ހޮސްޕިޓަލުތަކުގައި ޑައިލިސިސްގެ ހިދުމަތް ފެށުމަށް ވެސް ތައްޔާރުވަމުންނެވެ.