ކޮންމެ ފަހަރަކު އާސަންދަ ބަޖެޓް ހުސްވެ، އިގްތިސާދީ ބުރައަކަށްވޭ: ނާޒިމް

އާސަންދަ ނިޒާމަށް ދައުލަތުގެ ބަޖެޓުން ކޮންމެ އަހަރަކު ވަކި އަދަދެއް ހަމަޖައްސާފައިވީ ނަމަވެސް އެ ފައިސާ އިން މިހާތަނަށް އެއްވެސް އަހަރެއްގައި ފޫބެއްދިފައި ނުވާ ކަމަށާއި އެ ނިޒާމުވެފައި ވަނީ އިގްތިސާދީ ބުރައަކަށް ކަމަށް ހެލްތު މިނިސްޓަރު އަބްދުﷲ ނާޒިމް އިބްރާހިމް މިއަދު ވިދާޅުވެއްޖެ އެވެ.

ހުޅުމާލޭ ހޮސްޕިޓަލް ޓާޝަރީ ފެންވަރަށް ބަދަލުކުރުން ފާހަގަކުރަން ބޭއްވި ރަސްމިއްޔާތުގައި ހެލްތު މިނިސްޓަރު ވިދާޅުވީ އާސަންދަ ނިޒާމު ބޭނުންކުރާތާ މިވީ 15 އަހަރުވެގެ ތެރޭގައި ކޮންމެ އަހަރެއްގެ ބަޖެޓު ދިރާސާކޮށް ބަލާއިރު އެ ކަނޑައަޅާ އަދަދަށް ވުރެ ބޮޑު ހޭދައެއް ކުރަންޖެހޭ ކަމަށެވެ.

އެހެންވެ، އެ ނިޒާމުގައި އިސްލާހުކުރަންޖެހޭ ކަންތައްތަކެއް ހުރިކަން އެކަމުން ވެސް އެނގޭ ކަމަށް މިނިސްޓަރު ވިދާޅުވި އެވެ.

"މީގެން ވަރަށް މުހިއްމު މެސެޖެއް އަޅުގަނޑުމެންނަށް އެބަ ލިބޭ. މި ނިޒާމުގައި އަޅުގަނޑުމެން ސަމާލުކަން ދޭންޖެހޭ ކަންތައްތަކެއް ހުރިކަން އަޅުގަނޑުމެންނަށް އެބަ ނަމްބަރުތަކުން ހާމަވޭ،" ނާޒިމް ވިދާޅުވި އެވެ.

އޭނާ ވިދާޅުވީ، ލުއި ސިޔާސަތުތަކެއް ނުވަތަ ސިޔާސީ ގޮތުން އުފުލަންޖެހޭ ބުރަ ބޮޑުވެދާނެތީ އާސަންދަ ނިޒާމު އިސްލާހު ކުރުމަށް މިހާތަނަށް މަސައްކަތްތައް ނުކުރާ ކަމަށެވެ.

މި ސަރުކާރުން ވަނީ އާސަންދަ ނިޒާމުގެ އިސްރާފު ކުޑަކުރުމަށް ހާއްސަ ޕްލޭނެއް އެކަށައަޅައި ތަންފީޒު ކުރަން ފަށައިފަ އެވެ.

ހެލްތު މިނިސްޓަރު މިއަދު ވިދާޅުވި ގޮތުގައި، ސިއްހީ ނިޒާމަކީ ބޭސް ފަރުވާ ކޮށްދިނުމާއި އިމާރާތް އެޅުން އެކަންޏެއް ނޫނެވެ. އޭގެ ތެރޭގައި ވަށައިޖެހޭ ކަންތައްތަކެއް ކޮށް، ސިޔާސަތުތަކެއް ތަންފީޒު ކުރެވެން ޖެހޭނެ ކަމަށް ވިދާޅުވި އެވެ.

"އާސަންދައިގެ ތަފާސްހިސާބުތަކަށް ބަލާއިރު އެއްވެސް އަހަރެއްގައި ރައްޔިތުންގެ މަޖިލީހުން އެކަމަށް ފާސްކުރާ ބަޖެޓުން ނުފުދި، ކޮންމެ އަހަރަކު އެ އަށް ފައިސާ އަޅަ އަޅައި ތިބެން ޖެހުމުގެ ސަބަބުން މުޅި ނިޒާމު ވަނީ ދައުލަތުގެ އިގްތިސާދަށް ބޮޑު ބުރައަކަށްވެފައި،" ނާޒިމް ވިދާޅުވި އެވެ.

އާސަންދައިގެ ސަބަބުން އިގްތިސާދަށް ބުރައެއް ލިބުމަކީ ރައްޔިތުން އެދޭ ގޮތް ނޫން ކަމަށާއި ރައްޔިތުން ބޭނުން ވަނީ ސިއްހީ ނިޒާމަކީ އެންމެ ހައްގުވެރިންނަށް އެންމެ ފައިދާވާނެ ނިޒާމަކަށް ވުން ކަމަށް މިނިސްޓަރު ވިދާޅުވި އެވެ.

ނާޒިމް ވިދާޅުވީ އާސަންދައިގެ 60 ޕަސެންޓް ހޭދަ ކޮށްފައި އޮތީ ބޭސްތަކަށް ކަމަށެވެ. ރާއްޖޭގައި ބޭހުގެ އަގުތައް ދުނިޔޭގެ ނިސްބަތުން ބޮޑު ކަމަށާއި އެކަން އެހެން އޮތީ މި ނިޒާމު ބަލަހައްޓަން ޖެހޭ ވަރަށް ނުބެލުމުން ނުވަތަ އަޅަންޖެހޭ ފިޔަވަޅުތައް ނޭޅުމުން ކަމަށެެވެ. އެކަމަކު އެކަމާ ގުޅިގެން އަޅަންޖެހޭ ފިޔަވަޅުތައް މި ސަރުކާރުން އަޅަމުން އަންނަ ކަމަށް މިނިސްޓަރު ވިދާޅުވި އެވެ.

މި މަހު ސަރުކާރުން ވަނީ 200 އަށް ވުރެ ގިނަ ބޭހުގެ އަގު ކޮންޓްރޯލްކޮށްފަ އެވެ. އަދި އާސަންދަ ދޫކުރާނެ ގޮތަށް ވެސް ބަދަލުތަކެއް ވަނީ ގެނެސްފަ އެވެ.