ހެލްތު ސެންޓަރުތަކާއި ހޮސްޕިޓަލްތައް ހިންގާ އިސްވެރިންނަށް ތިން މަސް ދުވަހުގެ ތަމްރީނު ދޭން ފަށައިފި

ހެލްތު ސެންޓަރުތަކާއި ހޮސްޕިޓަލްތައް ހިންގާ އިސްވެރިންނަށް ތިން މަސް ދުވަހުގެ ތަމްރީނު ޕްރޮގްރާމެއް އިއްޔެ ފަށައިފި އެވެ.

ސަރުކާރުގެ މައުލޫމާތުތައް ގެނެސްދޭ ވެބްސައިޓުގައި ބުނީ ސިވިލް ސާވިސް ޓްރެއިނިން އިންސްޓިޓިއުޓާ ގުޅިގެން "މެނޭޖްމަންޓް ޑިވެލޮޕްމަންޓް ޕްރޮގްރާމް ފޯ ހޮސްޕިޓަލްސް އެގްޒެކެޓިވްސް" ތަމްރީނު ހިންގަނީ ސިއްހީ ހިދުމަތް ދޭ ތަންތަނުގެ މެނޭޖަރުންނާއި ޒިންމާދާރުވެރިންނަށް ކަމަށެވެ.

އެ ތަންތަން ހިންގަން ތިބޭ މެނޭޖަރުންނަކީ ސިޔާސީ ގޮތުން އައްޔަންކޮށްފައި ތިބޭ ބައެކެވެ. އެ މީހުންގެ ދަށުން އިސްވެރިންނަށް ތިބޭ ޒިންމާދާރުވެރިންނަކީ ސިވިލް ސާވެންޓުންނެވެ.

ހެލްތު މިނިސްޓްރީން ބުނީ އޮންލައިންކޮށް ގެންދާ ތަމްރީނުގައި 150 މީހުން ބައިވެރިވާ ކަމަށެވެ. އޭގައި ކިޔަވައިދޭނީ މެނޭޖީރިއަލް ޕްރޮފިޝެންސީ، ހެލްތު ކެއާ އޮޕަރޭޝަން ހަރުދަނާކުރުން، ފައިނޭންޝަލް މެނޭޖްމަންްޓް އަދި އިންފޮމޭޝަން ޓޭކްނޮލޮޖީގެ ދާއިރާއިންނެވެ.

ތަމްރީނު ޕްރޮގްރާމް ފައްޓަވައިދެއްވުމަށްފަހު ހެލްތު މިނިސްޓަރު އަބްދުﷲ ނާޒިމް އިބްރާހިމް ވިދާޅުވީ ތަމްރީނު ފުރިހަމަކުރާ ބައިވެރިންނަށް ލިބޭ މައުލޫމާތުތަކަށް ބިނާކޮށް ހޮސްޕިޓަލްތަކާއި ސިއްހީ މަރުކަޒުތަކުގެ ހިދުމަތުގެ ފެންވަރު ރަނގަޅުކުރަން އަދި ރޭވުންތެރިކަމާ އެކު މަސައްކަތްކުރާނެ ކަމަށް އުއްމީދު ކުރެވޭ ކަމަށެވެ. އެކަމުގެ ސަބަބުން ގާބިލް މުވައްޒަފުންތަކެއް އުފެދިގެންދާނެ ކަމަށް ގަބޫލުކުރައްވާ ކަމަށް ވެސް އޭނާ ވިދާޅުވި އެވެ.

ނާޒިމް ވިދާޅުވީ އެ ދާއިރާގައި މަސައްކަތް ކުރަން ޖެހޭނީ ސިއްހީ ހިދުމަތްދޭ ކޮންމެ ތަނަކަށް ވެސް ދަނީ ވަރަށް މުހިއްމު މީހެއްކަމަށް ދެކިގެން ކަމަށެވެ.

މިނިސްޓްރީން ވަނީ ސިވިލް ސާވިސް ޓްރެއިނިން އިންސްޓިޓިއުޓާއެކު އަހަރަކު އެއް ފަހަރު އެ ތަމްރީނު ގެންދާނެ ކަމަށެވެ.