ކުއްލިއަކަށް ޕަވަ ބޭންކެއް ގޮވައި އަލިފާނުގެ ބޮޑު ހާދިސާއެއް

ދ. ކުޑަހުވަދޫގައި 16 އަހަރުގެ ކުއްޖަކު ކިޔަވަން އިން ކޮޓަރި ތެރޭގައި ކުއްލިއަކަށް ޕަވަ ބޭންކެއް ގޮވައި އަލިފާނުގެ ބޮޑު ހާދިސާއެއް މިއަދު ހިނގައިފި އެވެ.

އެ އަތޮޅު ކައުންސިލްގެ ރައީސް އަހުމަދު ޝާފިއު "މިހާރު" އަށް ވިދާޅުވީ އެ ޕަވަ ބޭންކު ގޮވީ އޭނާގެ ދޮށީ އަންހެން ދަރިފުޅުގެ ކޮޓަރީގައި ކަމަށެވެ.

އޭރު ޕަވަ ބޭންކު ބާއްވާފައި އޮތީ އެއްވެސް އެއްޗަކަށް ނުގުޅާ އެނދުމަތީގައި ކަމަށް އޭނާ ވިދާޅުވި އެވެ. އަދި އެ ވަގުތު އެ ގޭ ހުންނަ ސަރަހައްދުގައި ކަރަންޓެއް ވެސް ނެތެވެ.

އެ ހާދިސާގައި އެ ކުއްޖާއަށް އެއްވެސް އަނިޔާއެއް ނުވެ އެވެ. އެކަމަކު، "މިހާރު" އަށް ލިބިފައިވާ ފޮޓޯއިން ފެންނަ ގޮތުގައި، ކޮޓަރިއަށް ވަނީ ބޮޑު ގެއްލުންތަކެއް ލިބިފަ އެވެ.

އޭގެ ތެރެއިން ފަރުނީޗަރުތަކާއި ކޮޓަރީގައި ހުރި އެހެން ސާމާނުތައް ވަނީ ވަރަށް ބޮޑަށް ހަލާކުވެފަ އެވެ.

އެނގިފައިވާ ގޮތުގައި ޕަވަ ބޭންކު ގޮވީ އަންނަ އާދިއްތަ ދުވަހު ފަށާ އޯ ލެވެލް/އެސްއެސްސީ އިމްތިހާނުގެ އިސްލާމް ޓެސްޓަށް ތައްޔާރުވުމަށް އޭނާ ފޮތް ކިޔަން އިން ވަގުތެވެ. އެ ހާދިސާގައި ފޮތްތަކާއި ޔުނީފޯމުތައް ވެސް ވަނީ ބޭނުން ނުކުރެވޭ ވަރަށް ހަލާކުވެފަ އެވެ.