ބަރަހަނާ ފޮޓޯ ފޮނުވި ކަމަށް ބުނާ މައްސަލަ ބެލިއިރު ތުހުމަތުތަކާ ގުޅޭ ހެއްކެއް ނުފެނުނު: ޕޮލިސް

ދެކުނު ރަށެއްގައި އުމުރުން 14 އަހަރުގެ ކުއްޖަކަށް ބަރަހަނާ ފޮޓޯ އާއި ވީޑިއޯ ދައްކައި އެފަދަ ތަކެތި އެ ކުއްޖާގެ ފޯނަށް ފޮނުވި ކަމަށް ބުނާ މައްސަލަ ތަހުގީގުކޮށްފައިވާ ކަމަށާއި އެކަމަކު އެ ކުއްޖާ ބުނާ ބުނުން ފިޔަވައި އިތުރު އެއްވެސް ހެއްކެއް އަދި މިހާތަނަށް ލިބިފައިނުވާ ކަމަށް ފުލުހުން ބުނެފި އެވެ.

އެއީ ޖެނުއަރީ 22، 2022 ގައި ފުލުހުންނަށް ރިޕޯޓުކުރި މައްސަލަައެކެވެ. މިހާރު އުމުރުން 17 އަހަރުގެ އެ ކުއްޖާއަށް އިންސާފު ނުލިބޭ ކަމަށް ބުނެ ކުއްޖާ ދައްކާފައިވާ ވާހަކަތަކަކާ ގުޅިގެން ފުލުހުން ބުނީ އެ މައްސަލައިގެ ތަހުގީގުގައި ތުހުމަތުކުރެވޭ މީހާގެ ފޯނާއި ލެޕްޓޮޕް ފުލުހުންގެ ބެލުމުގެ ދަށަށް ގެންގޮސް ފޮރެންސިކް ތަހުލީލުތައް ކުރި ކަމަށެވެ.

އޭގެ އިތުރުން ހަ މީހެއްގެ ބަޔާނާއި ހެކި ބަސް އަދި އިތުރު ދެ މީހެއްގެ ބަޔާން ނަގާފައިވާ ކަމަށް ބުންޏެވެ.

"މަތީގައި ދެންނެވުނު [ފޯނާއި ލެޕްޓޮޕް އަދި މީހުންގެ ބަޔާން] ތަހުލީލުތަކުންނާއި ބަޔާންތަކުން، ކުއްޖާ ބުނާ ބުނުން ފިޔަވައި އެ މައްސަލައާ ގުޅުންހުރި އަދި ކުރާ ތުހުމަތުތަކަށް ބާރުލިބޭ އެެއްވެސް ހެއްކެއް ނުވަތަ ގަރީނާއެއް ލިބިފައެއް ނުވޭ،" މީީޑިއާ ގްރޫޕަށް ފުލުހުން ފޮނުވި މެސެޖުގައިވެ އެވެ.

ފުލުހުން ބުނީ އެ މައްސަލާގައި ތުހުމަތުކުރެވޭ މީހާ، ކުއްޖާގެ ފޯނަށް ފޮނުވާފައިވާ ކަމަށް ބުނާ މެސެޖުތަކާއި މައްސަލައާ ގުޅުންހުރި އެއްވެސް އެއްޗެއް އެ ކުއްޖާގެ ފޯނުގެ ފޮރެންސިކް ތަހުލީލުތަކުން ވެސް ފެނިފައިނުވާ ކަމަށެވެ.

ފުލުހުން ބުނި ގޮތުގައި އެ މައްސަލަ ތަހުގީގުކޮށް، އޭޕްރީލް 22، 2024 ވަނަ ދުވަހު ޕްރޮސެކިއުޓާ ޖެނަރަލްގެ މަޝްވަރާއަށް ފޮނުވުމުން ވަނީ ބައެއް އިސްލާހުތައް ގެނައުމަށް އެދިފަ އެވެ. އެ އިސްލާހުތައް ގެނައުމުގައި މައްސަލަ ހުށަހަޅާ ފަރާތުން އެއްބާރުލުން ލިބިފައިނުވާތީ މައްސަލަ މިހާތަނަށް އޮތީ ނުނިމި ކަމަށް ވެސް އެ އިދާރާ އިން ބުންޏެެވެ.

"މި މައްސަލައިގެ ތަހުގީގު ފުރިހަމަކުރުމަށް ކުރެވެންހުރި މަސައްކަތްތައް ފުލުހުން ދަނީ ކުރަމުން." ފުލުހުން ބުންޏެވެ.