ޑޮމިނިކަން ރިޕަބްލިކްގައި ނައިޓްކްލަބެއްގެ ފުރާޅު ވެއްޓި 100 މަރު

ޑޮމިނިކަން ރިޕަބްލިކްގައި އަންގާރަ ދުވަހުގެ ރޭ ނައިޓްކްލަބެއްގެ ފުރާޅު ވެއްޓި މަރުވި މީހުންގެ އަދަދު 100 އަށް އަރާނެ ކަމަށް، މީހުން ސަލާމަތްކުރުމުގެ މަސައްކަތުގައި އުޅޭ މީހުން ބުނެފި އެވެ.

މީހުން ސަލާމަތްކުރުމުގެ މަސައްކަތުގައި 24 ގަޑިއިރު ވެގެން ގޮސްފައި ވާއިރު، ވެއްޓިފައިވާ ބައިތައް ނެގުމުގެ މަސައްކަތް އަދިވެސް ދަނީ ކުރަމުންނެވެ. އެ ތަންތަނުން މިހާތަނަށް ފެނުނު މީހުންގެ އަދަދު 98 އަށް އަރާފައި ވާއިރު، އިތުރު އެތައް ހަށިތަކެއް އަދި ނުފެނި ވާނެ ކަމަށް ވެސް ބެލެވެ އެވެ.

ޖެޓް ސެޓް ނައިޓް ކްލަބްގެ ފުރާޅު ވެއްޓުނު އިރު، ޑޮމިނިކަން ރިޕަބްލިކްގެ މަޝްހޫރު ލަވަކިޔުންތެރިޔާ ޕެރޭޒް ނައިޓްކްލަބްގެ ސްޓޭޖުގައި ލަވަކިޔަން ހުރި ކަމަށާއި މަރުވި މީހުންގެ ތެރޭގައި އޭނާ ވެސް ހިމެނޭ ކަމަށް ޕެރޭޒްގެ މެނޭޖަރު ވަނީ ބުނެފަ އެވެ.

އަންގާރަ ދުވަހުގެ ރޭ ދަންވަރު 12:44 ހާއިރު މި ހާދިސާ ހިނގިއިރު ކްލަބުގައި 500 އާއި 1000 އާ ދެމެދުގެ އަދަދަކަށް މީހުން ތިބި ކަމަށް އެ ގައުމުގެ މީޑިއާތަކުން ބުނެ އެވެ. މިއީ އިށީނދެގެން 700 މީހުން އަދި ކޮޅަށް ހާހެއްހާ މީހުންނަށް ތިބެވޭ ޖާގަ އޮންނަ ތަނެކެވެ.

މަރުވި މީހުންގެ އަދަދަކީ 15 ކަމަށް މި ހާދިސާ ހިނގި ވަގުތު ބުނި ނަމަވސް މި އަދަދު މަތިވަމުން ގޮސް، ޑޮމިނިކަލް ރިޕަބްލިކަށް ބުދަ ދުވަސް ފެށުނު އިރު 98 އަށް އަރާފައިވާ ކަމަށް އިމަޖެންސީ އޮޕަރޭޝަން ސެންޓަރުގެ ޑިރެކްޓަރު ހުއާން މެނުއަލް މެންޑޭޒް ވިދާޅުވި އެވެ.

"އެންމެ މީހަކު ސަލާމަތްކުރެވޭނެ ކަމުގެ އުންމީދު އޮއްވައި ވެސް، މީހުން ސަލާމަތްކުރުމުގެ މަސައްކަތް ހުއްޓައެއްނުލާނަން،" އޭނާ ވިދާޅުވި އެވެ.

ފުރާޅާ އެކު ވެއްޓިފައިވާ ގާތަކާއި ދަގަނޑާއި ޓިނު ފަދަ ތަކެތީގެ ދަށުވެފައިވާ މީހުން ހޯދުމުގެ މަސައްކަތުގައި ގާތްގަނޑަކަށް 370 މީހުން ހަރަކާތްތެރިވަމުންދާ ކަމަށް ވަނީ ބުނެފަ އެވެ.