މަގު ހުރަސްކުރަނިކޮށް ސައިކަލަކުން ޖައްސައި، ދިން އަނިޔާގެ ވޭނުގައި އަހަރެއް: އިންސާފުގެ ކޮޅެއް ވެސް ނެތް!

ހަދީޖާ އިބްރާހިމް (ހައްޖަ) ކުޑަކޮށް ކެއްސާތީ ޑޮކްޓަރަށް ދައްކަން ދިޔަ ދުވަހެކެވެ. އެ ދުވަހުގެ އިރުއޮއްސުނު ވަގުތެވެ. ހެންވޭރު ކޮޅުގައި ހުންނަ ސެނަހިޔާ ހޮސްޕިޓަލަށް އޭނާ ދިޔައީ ގާތް އެކުވެރިޔާ މަރިޔަމް ޝަހީދާއާ އެކުގަ އެވެ. އޭނާ ދުއްވި ސައިކަލު ލޮނުޒިޔާރަތް ޕާކާ ޖެހިގެން އޮންނަ ޕާކިން ޒޯނުގައި ބެހެއްޓުމަށް ފަހު، ހޮސްޕިޓަލާ ދިމާލަށް ދެ މީހުން ހިނގައިގަތެވެ.

ސެނަހިޔާ ހޮސްޕިޓަލްގެ ކުރިމަތީގައި އޮންނަ ކަފިހުރަހުން މަގު ހުރަސްކުރަން އުޅުނު ދަނޑިވަޅުވީ ދެ އެކުވެރިންގެ މުޅި ދިރިއުޅުން އެފުށްމިފުށަށް ޖަހާލި ވަގުތުކޮޅަށެވެ. ބާރު ސްޕީޑުގައި ދުއްވި ސައިކަލަކުން ޖެހި ދެ މީހުން ދިޔައީ ވިއްސައިގެންނެވެ. ވިއްސައިގެން ގޮސް ޖެހުނު ގޮތުން ބޮލަށް ވަރަށް ބޮޑަށް އަނިޔާވެ، ދެ މީހުން ވެސް ވަގުތުން ހޭނެތުނެވެ.

"އަޅުގަނޑުމެން ޒިބްރާ ކްރޮސް އަށް އަރާފައި، ކިރިޔާ ދެ ވަނަ ލޭނަށް އެރޭނީހެން ހީވަނީ، މިހާރު އެ ވަގުތުކޮޅު އަޅުގަނޑުގެ ސިކުނޑިން ބްލޭންކް [ހަނދާނެއް ނުވޭ]،" އެ ބިރުވެރި ވަގުތުކޮޅު ހަނދާން އާކުރަމުން ހައްޖަ ކިޔައިދިނެވެ.

ހައްޖައަށް ރަނގަޅަށް ހޭވެރިކަންވީ އެކްސިޑެންޓަށް ފަހު ސެނަހިޔާގައި ފަރުވާދީ، އިތުރު ފަރުވާ އަށް އޭޑީކޭ ހޮސްޕިޓަލަށް ވެސް ގެންދިޔަ ފަހުންނެވެ. ސެނަހިޔާގައި އޮތްއިރު މީހުން ދައްކާ ވާހަކަ ކޮންމެވެސް ވަރަކަށް އޭނާ އަށް އަޑު އިވުނެވެ. ކިޔަނީ ކޮން ނަމެއްތޯ މީހަކު އެހި ހަނދާންވެ އެވެ. އެކަމަކު، ޖަވާބު ދޭން ހައްޖަ އޮތީ ނުކުޅެދިފަ އެވެ.

"އަމިއްލައަށް މިހާރު އިހުސާސް ކުރެވެނީ އޭރު އޮތީ ކަނޑު އަޑީގައޭ، އެ ކަހަލަ އިހުސާސެއް ކުރެވެނީ،" އޭނާ ބުންޏެވެ.

ހައްޖަގެ ބޯ ފަޅައިގެން ގޮސް، ލޭތައް ދިޔައީ ފައިބަމުންނެވެ. އޭނާގެ ވާތު އުޅަނބޮށީގެ ކަށިގަނޑު އޮތީ ބޭރަށް ފެންނާށެވެ. އޭނާގެ އެކުވެރިޔާ ޝާހިދާގެ ބޮލުގެ ކަނާތު ފަޅިން އޮތީ ބައެއް ނުކުމެފަ އެވެ.

އެ ބިރުވެރި ހާދިސާ އަށް އަންނަ އާދިއްތަ ދުވަހު އަހަރެއް ވާނެ އެވެ؛ ދެ އެކުވެރިން އަދިވެސް ތިބީ އެ ވޭނުގަ އެވެ. އެ ބިރުވެރިކަމުގަ އެވެ. ނުވިތާކަށް އިންސާފުގެ ކައިވަތެއް ވެސް ނުލިބެ އެވެ.

އެ އެކްސިޑެންޓުގައި ހައްޖަ އަށް ލިބުނު އަނިޔާގެ ސަބަބުން އޭނާ އަށް ގިނައިރު ކޮޅަށް ނުހުރެވެ އެވެ. އަނބުރައިގަންނަނީ އެވެ. ތެދުވެލާއިރަށް ހީވަނީ މުޅިތަން އެކޮޅުކޮޅުން ޖެހޭހެންނެވެ. އެނދުން ނުތެދުވެވި، އަދި އަމިއްލައަށް އެއްވެސް ކަމެއް ނުކުރެވި މަހަކަށް ވުރެ ގިނަ ދުވަހު އެނދުމަތިވެފައި އޮންނަން ޖެހުނެވެ.

"މިހާރު ވެސް ވަރަށް ގިނައިން އަނބުރައިގަނޭ، ކުޑަކުޑަ ކަމެއް ވިޔަސް. ލޮލަށް އަނދިރިވާގޮތް ވޭ. އެކަމަކު ދެން އުޅެވޭ ވަރުވޭ،" ހައްޖަ ބުންޏެވެ.

"އަޅުގަނޑަށް މިހާރު އެކަނި މަގު ހުރަސްކުރަން ވެސް ނުކުރޭ. ރޮއެވެސް ގަނެވޭ، ހަޅޭވެސް ލެވެނީ، ނޫނީ ޕްލީޒް ބުނެފައި އާދޭސް ވެސް ކުރަން މަގު މެދުގައި ހުއްޓިގެން ހުރެގެން. އެ ކަހަލަ ޓްރައުމާއެއްގައި [މި އުޅެނީ]."

އެހެންވެ، ޑޮކްޓަރުން ވަނީ ތެރަޕީ ނަގަން އޭނާއަށް ލަފާ ދީފަ އެވެ.

ހައްޖަ ބުނި ގޮތުގައި، ދެ އެކުވެރިން ގައިގައި ޖެއްސި ސައިކަލުގައި ޒުވާން ދެ ފިރިހެނުން ތިއްބެވެ. އެ އެކްސިޑެންޓަށް ފަހު ފުލުހުން އެ ދެމީހުން ހައްޔަރުކުރި ނަމަވެސް މިހާރު ތިބީ ދޫވެފަ އެވެ. ފުލުހުން މިހާރު ވަނީ އެ ކޭސް ވެސް ފައިލް ކޮށްފަ އެވެ. އިންސާފު ލިބޭނެ ކަމުގެ އުއްމީދެއް ނެތުމުން ހައްޖަގެ އާއިލާ އަށް ވެސް ގޮތްހުސްވީ އެވެ.

"އެ މީހުން [ސައިކަލު ދުއްވި މީހުން] ކުރިހާ ވެސް ކަމަކީ އަޅުގަނޑު އޭޑީކޭގައި އޮތްއިރު ބިލަށް އެރި ދިހަ، ފަނަރަ ހާސް ރުފިޔާގެ ބިލު ދެއްކުން. އެކަމަކު އެއީ ކޮން ކަހަލަ އިންސާފެއްތޯ؟ އަޅުގަނޑުގެ ބިލަށް އެރި ބޮޑު އަދަދަށް ވުރެ މާ ބޮޑު އަނިޔާއެއް ނޫންތޯ މި ދިނީ. އެ މީހުން މިނިވަންކަމާ އެކު އުޅޭއިރު، އަޅުގަނޑަށް މި ޖެހެނީ މުޅި އުމުރު މި ބިރެއްގައި އުޅެން،" އޭނާ ބުންޏެވެ.

"އެތައް ބޭހަކާއި ފަރުވާއަކަށް ފަހު ތެދުވެ މިހާރު އުޅުނު ކަމުގައި ވިޔަސް، އެ ޓްރައުމާއިން އަޅުގަނޑަށް ވެސް، އާއިލާއަށް ވެސް ނުނިކުމެވޭ."

ހައްޖަގެ މި ހިތްދަތި އިހުސާސްތައް އޭނާ ބަންޑުކޮށްލީ، ހުޅުމާލެ ސެންޓްރަލް ޕާކު ކައިރީގައި ރޭ މެންދަމު ސްޕޯޓްސް ކާރަކާއި ސައިކަލެއްގެ ޖެހި ހިނގި ނުރައްކާތެރި އެކްސިޑެންޓެއްގައި ޒުވާނަކު މަރުވުމުންނެވެ. ރޭ މެންދަމު ތިނެއް ޖަހަން އުޅެނިކޮށް ހިނގި އެ އެކްސިޑެންޓުގައި މަރުވީ ސައިކަލު ދުއްވަން އިން ލ. އިސްދޫ، ބީޗްހައުސް އުމުރުން 23 އަހަރުގެ ހަސަން ސަމާހު އެވެ.

އެ ސްޕޯޓްސް ކާރު ދުއްވި ސ. ހިތަދޫ ވައިލެޓްފެހި މުހައްމަދު ވިސާމް ސިދުގީ، 26، ހައްޔަރުކޮށް މިހާރު ވަނީ ޝަރީއަތް ނިމެންދެން ބަންދުކޮށްފަ އެވެ.

"މިއަދު އަޅުގަނޑަށް އިހުސާސްކުރެވޭ، އެ އާއިލާއިން ތަހައްމަލު ކުރާނެ ވޭން، ވާނެ ދެރަ، އުފުލާނެ ތަކުލީފު،" ހައްޖަ ބުންޏެވެ.

"މި ކަހަލަ ކިތައް މީހުން، ކިތައް އާއިލާ، ކިހާ ލޯބިވާ މީހުން ދުނިޔެ ދޫކޮށް އެ ދިޔައީ. ކޮބާ އިންސާފު؟ އެއްކަލަ ބާރު ސްޕީޑުގައި ދުއްވާ މީހުން ހަމަ އަދިވެސް އެމީހުންގެ މިނިވަންކަމުގައި ބާރު ސްޕީޑުގައި ދުއްވާލަ، ދުއްވާލަ."

ހައްޖަ ބުނި ގޮތުގައި، މީގެ ދެތިން އަހަރު ދުވަސް ކުރިން ވެސް، ގަވާއިދާ ހިލާފަށް ދުއްވި ސައިކަލެއްގެ ސަބަބުން އޭނާ އަށް އެކްސިޑެންޓަކާ ކުރިމަތިލާން ޖެހުނެވެ. އެ ދުވަހު އޭނާ އިނީ ފިރިމީހާއާ އެކު ސައިކަލުގަ އެވެ. ވަންވޭއެއް ފަޅާލާފައި އައި ސައިކަލެއް އެމީހުން ސައިކަލުގައި ޖެއްސީ އެވެ. އެ އެކްސިޑެންޓުގައި އޭނާގެ ފަޔަށް ވަރަށް ބޮޑަށް އަނިޔާވި އެވެ.

އެ ފަހަރު ވެސް ގަވާއިދާ ހިލާފަށް ސައިކަލު ދުއްވި މީހާގެ ލައިސަންސް އެންމެ ދެ ހަފުތާއަށް ހިފެހެއްޓުން ފިޔަވައި އިތުރު އެއްވެސް ފިޔަވަޅެއް ނާޅަ އެވެ. އޭނާ ވެސް ދޫވީ އެވެ.