ރައީސްގެ ޕޯލް: ގިނަ މީހުން ބޭނުންވަނީ 2000 ވަނަ އަހަރުން ފެށިގެން އުފަންވެފައިވާ މީހުންނަށް ދުންފަތް މަނާކުރަން

ދުންފަތުން ސަލާމަތް ވެފައިވާ ޖީލެއް ބިނާކުރަން ގިނަ މީހުން ބޭނުންވަނީ 2000 ވަނަ އަހަރުން ފެށިގެން އުފަންވެފައިވާ މީހުންނަށް ދުންފަތް މަނާކުރަން ކަމަށް ރައީސް ޑރ. މުހައްމަދު މުއިއްޒު ކުރިއަށް ގެންދެވި ސޯޝަލް މީޑިއާގެ ޕޯލުން ދައްކައިފި އެވެ.

ރާއްޖޭގެ ރައީސަކު ސޯޝަލް މީޑިއާގައި ފުރަތަމަ ފަހަރަށް ކުރިއަށް ގެންދެވި ޕޯލުގެ ކުރިން "ރައްޔިތުންނާ އެކު" ގެ ނަމުގައި ރައީސް އޮފީހުން ފަށާފައިވާ ޕޮޑްކާސްޓުގެ ފުރަތަމަ ޝޯގައި ރައީސް މުއިއްޒު ވިދާޅުވީ އަލަށް ދުންފަތުގެ އިސްތިއުމާލު ކުރަން ފަށާ މީހުން މަދުކޮށް، އެކަން ހުއްޓުވުމަށްޓަކައި "ޖެނެރޭޝަން ބޭން" ގެނައުމަށް ނިންމަވާފައިވާ ކަމަށެވެ.

ގިނަ ގައުމުތަކުގައި މިހާރު ވެސް އެފަދަ ފިޔަވަޅުތައް އަޅަމުން އަންނަ ކަމަށާއި ރާއްޖޭގައި އެ ފިޔަވަޅު އެޅުމަށް ނިންމާފައިވާ ގޮތުގެ ތަފްސީލުތައް ފަހުން ހާމަކުރައްވާނެ ކަމަށް މިދިޔަ މަހުގެ 27 ވަނަ ދުވަހު އެ މަނިކުފާނު ވިދާޅުވި އެވެ.

އޭގެ ފަހުން، ރައީސް ވަނީ މިދިޔަ ބުރާސްފަތި ދުވަހު ތިން އިހުތިޔާރަކާ އެކު، ޓުވިޓާ އާއި އިންސްޓަގްރާމް އަދި ފޭސްބުކްގައި އާއްމުންގެ ހިޔާލަށް ދޫކޮށްލައްވައިފަ އެވެ. އެ އިހުތިޔާރުތަކަކީ؛

- ޖެނުއަރީ 2007 އިން ފެށިގެން އުފަންވީ ހުރިހާ ކުދިންނާއި އުފަން ވާނެ ކުދިން، އެ ކުދިންގެ އުމުރުގެ ކުރިއަށް އޮތްތަނުގައި ސިނގިރޭޓާއި ދުންފަތް މަނާކުރުން

- ޖެނުއަރީ 2004 ވަނަ އަހަރުން ފެށިގެން އުފަންވެފައިވާ އަދި އުފަންވާނެ ހުރިހާ ކުދިން ސިނގިރޭޓް، ނޫނީ ދުންފަތުގެ އިސްތިއުމާލުކުރުމުން ދުރުކުރުން

- ޖެނުއަރީ 2000 ވަނަ އަހަރުގެ ޖެނުއަރީ މަހުން ފެށިގެން މިހާތަނަށް އުފަންވި ކުދިންނާއި އުފަންވާނެ ކުދިންނަށް ދުންފަތުގެ އިސްތިއުމާލް ކުރުން މަނާކުރުން

ސޯޝަލް މީޑިއާގެ ހުރިހާ ޕްލެޓްފޯމުތަކުގެ ޕޯލްގެ މުއްދަތު މިއަދު ހަމަވިއިރު އެންމެ ގިނަ މީހުން ބޭނުންވަނީ 2000 ވަނަ އަހަރުން ފެށިގެން އުފަން ވެފައިވާ އަދި އުފަން ވާނެ ކުދިންނަށް ދުންފަތުގެ ބާވަތްތައް މަނާކުރަން ކަމަށް ޕޯލުގެ ނަތީޖާ އިން ދައްކަ އެވެ.

އެކްސްގައި ކުރިއަށް ގެންދިޔަ ޕޯލަށް ބަލާއިރު 5،501 މީހުން ވަނީ ވޯޓުލައިފަ އެވެ. އެ ނަތީޖާ އިން ދައްކަނީ 51.1 ޕަސެންޓު މީހުން ބޭނުންވަނީ 2000 ވަނަ އަހަރުން ފެށިގެން އުފަން ވެފައިވާ އަދި އުފަން ވާނެ ކުދިންނަށް ދުންފަތުގެ ބާވަތްތައް މަނާކުރާށެވެ.

އެކްސްގައި ކުރިއަށް ގެންދިޔަ ޕޯލަށް ބަލާއިރު ދެ ވަނަ އަށް އެންމެ ގިނަ މީހުން، 40.8 ޕަސެންޓު މީހުން ބޭނުންވަނީ 2007 ވަނަ އަހަރުން ފެށިގެން އުފަން ވެފައިވާ އަދި އުފަން ވާނެ ކުދިންނަށް އެ ބާވަތްތައް މަނާކުރާށެވެ. ދެހާސް ސާދަ ވަނަ އަހަރުން ފެށިގެން އުފަންވެފައިވާ އަދި އުފަން ވާނެ ކުދިންނަށް ދުންފަތުގެ ބާވަތްތައް މަނާކުރަން ފެންނަ ކަމަށް އެކްސްގައި ވޯޓު ދިނީ 8.2 ޕަސެންޓް މީހުންނެވެ.

ފޭސްބުކްގައި ރައީސް ކުރިއަށް ގެންދެވި ޕޯލްގައި ވޯޓުލީ މީހުންގެ 72 ޕަސެންޓު މީހުން ބޭނުންވަނީ 2000 ވަނަ އަހަރުން ފެށިގެން އުފަން ވެފައިވާ އަދި އުފަން ވާނެ ކުދިންނަށް ދުންފަތުގެ ބާވަތްތައް މަނާކުރާށެވެ. ފޭސްބުކް ޕޯލްގެ 23 ޕަސެންޓު މީހުން ބޭނުންވީ 2007 ވަނަ އަހަރުން ފެށިގެން އަދި ހަތަރު ޕަސެންޓު މީހުން ތާއީދުކުރީ 2004 ވަނަ އަހަރުން ފެށިގެން އުފަން ވެފައިވާ އަދި އުފަން ވާނެ ކުދިންނަށް ދުންފަތުގެ ބާވަތްތައް މަނާކުރާށެވެ.

އިންސްޓަގްރާމްގެ ޕޯލްގައި ބައިވެރިވި މީހުންގެ ތެރެއިން ވެސް 45 ޕަސެންޓު މީހުން ބޭނުންވަނީ 2000 ވަނަ އަހަރުން ފެށިގެން އުފަން ވެފައިވާ އަދި އުފަން ވާނެ ކުދިންނަށް ދުންފަތުގެ ބާވަތްތައް މަނާކުރާށެވެ. އިންސްޓަގްރާމްގައި ރައީސް ކުރިއަށް ގެންދެވި މި ޕޯލްގައި ވޯޓު ދިން 43 ޕަސެންޓު މީހުން ތިބީ 2007 ވަނަ އަހަރުން ފެށިގެން އުފަން ވެފައިވާ އަދި އުފަން ވާނެ ކުދިންނަށް ދުންފަތުގެ ބާވަތްތައް މަނާކުރަން ތާއީދު ކޮށްގެންނެވެ. އެ ޕޯލްގައި ބައިވެރިވި މީހުންގެ ތެރެއިން 13 ޕަސެންޓު މީހުން ބޭނުންވަނީ 2004 ވަނަ އަހަރުން ފެށިގެން އުފަން ވެފައިވާ އަދި އުފަން ވާނެ ކުދިންނަށް ދުންފަތުގެ ބާވަތްތައް މަނާކުރާށެވެ.

ގާނޫނުގައި މިހާރު އޮންނާނީ އުމުރުން 21 އަހަރުން މަތީގެ މީހުންނަށް ދުންފަތުގެ ބާވަތްތައް ވިއްކޭ ގޮތަށެވެ. ޖެނެރޭޝަން ބޭން ގެނެސްފި ނަމަ އެ އަހަރަކުން ފެށިގެން އުފަންވެފައިވާ އެއްވެސް މީހަކަށް ދުންފަތުގެ އެއްވެސް ބާވަތެއް ނުވިއްކޭނެ އެވެ.

ދުންފަތުން ސަލާމަތްވެފައިވާ ޖީލެއް ބިނާކުރަން ހެލްތު މިނިސްޓްރީން ވަނީ ޑަބްލިއުއެޗްއޯ އަދި ޔުނިސެފާއެކު މިއަދު މަޝްވަރާކޮށްފަ އެވެ. އެކަމުގައި ގޮތެއް ނިންމާނީ ކަމާގުޅޭ ފަރާތްތަކުގެ ހިޔާލާއެކު ކަމަށް ރައީސް ވަނީ ވިދާޅުވެފަ އެވެ.

ޖެނެރޭޝަން ބޭންގެ މަޝްވަރާތައް ފެށިއިރު، މިދިޔަ އަހަރުގެ ޑިސެމްބަރު މަހުގެ 15 އިން ފެށިގެން ރާއްޖެއަށް ވޭޕް އެތެރެކުރުން ވެސް ވަނީ މަނާކޮށްފަ އެެވެ. ވޭޕް ބޭނުންކުރާ ނަމަ، ބޮޑެތި އަދަދުތަކުން ޖޫރިމަނާކުރަން ގާނޫނުގައި ހިމަނާފައިވެ އެވެ.

ދުންފަތުން ސަލާމަތްވެފައިވާ ޖީލަކަށް ހެދުމަށްޓަކައި ކުރިއަރާފައިވާ ބައެއް ގައުމުތަކުގައި މިހާރު ވެސް، ވަކި އުމުރަކުން ފެށިގެން އުފަންވެފައިވާ މީހުންނަށް ދުންފަތުގެ ބާވަތްތައް ވިއްކުން މަނަލެވެ.