ދުންފަތާ ދެކޮޅު ފިޔަވަޅުތަކަށް ފާޑުކިޔާތީ ރައީސްގެ ރައްދެއް

އަށަގަނެފައިވާ ގޯސް އާދަތަކުން ދުރުކުރުމަށް އެޅި ފިޔަވަޅުތަކަކީ އާއްމުންނަށް އުނދަގޫކުރަން ނިންމި ކަންކަމެއް ނޫން ކަމަށް ވިދާޅުވެ، ވޭޕް މަނާކުރުމާ ގުޅޭގޮތުން ދައްކަމުންދާ ވާހަކަތަކަށް ރައީސް ޑރ. މުހައްމަދު މުއިއްޒު މިއަދު ރައްދުދެއްވައިފި އެވެ.

ގއ. އާއި ގދ. އަށް ކުރައްވާ ދަތުރުފުޅުގައި ގދ. ވާދޫގައި ރައީސް ވިދާޅުވީ ތަރައްގީއަކީ ހަމައެކަނި ލޮލަށް ފެންނަ އަދި އަތުން ހިފޭ މަޝްރޫއުތައް އެކަނި ނޫން ކަމަށެވެ.

އެކަންކަން ވެސް ކުރަމުން، އަހުލާގު ރަނގަޅުކުރުމާއި ހެޔޮ ގޮތުގައި ދަރިން ތަރުބިއްޔަތުކުރުމާއި ހެޔޮ ކަންކަމަށް ބާރުއަޅާ މުޖުތަމައުއަކީ، ހަގީގީ ތަރައްގީ ކަމަށް އެ މަނިކުފާނު ވިދާޅުވި އެވެ.

ރައީސް ވިދާޅުވީ ޒަމާންތަކެއް ވަންދެން ވަކި ކަމެއް ގޯސްކޮށް ހިނގުމަކީ އެކަން އެގޮތަށް ދޫކޮށްލައިގެން ތިބެންޖެހޭ ކަމެއް ނޫންކަން ހިތުގައި ކަނޑައަޅައި އަމަލުން ދައްކަންޖެހޭ ކަމަށެވެ. އަދި ލޯ ކުރިމަތިން ގޯސްކަމެއް ފެނުމުން އެކަމަށް ނޫނެކޭ ބުނަންކެރޭ ބަޔަކަށް ވާންޖެހޭ ކަމަށް ރައީސް ވިދާޅުވި އެވެ.

"ސަރުކާރު މި އޮތީ އެގޮތުގައި ކުރިއަށްދާން. ވަރަށް އުނދަގޫ ބައެއް ނިންމުންތައް މި ވިސްނުމުގައި ކުރިއަށް އޮތް މުސްތަގުބަލަށްޓަކައި އަޅުގަނޑުމެންގެ ޖީލުތައް ސަލާމަތްކޮށްދީ ވަށާޖެހޭ ތަރައްގީއަކުން ތަރައްގީ ހާސިލްވެފައި އޮތް، ހަގީގީ މާނައިގައި ތަރައްގީވެފައި އޮތް ދިވެހިރާއްޖެއަކަށް ހަދައިދިނުމަށްޓަކައި ނިންމުންތައް ނިންމަމުން މި ދަނީ،" މިދިޔަ މަހުގެ 15 އިން ފެށިގެން ރާއްޖޭގައި ވޭޕް މަނާކުރުމާއި ސިނގިރޭޓުގެ އިމްޕޯޓު ޑިއުޓީ ބޮޑުކުރުން އަދި ސިނގިރޭޓު ވިއްކޭނެ އުމުރު 21 އަހަރަށް މަތިކުރުން ފަދަ ފިޔަވަޅުތަކަށް އިޝާރަތްކުރައްވައި ރައީސް ވިދާޅުވި އެވެ.

"އެކިއެކި ވަބާތަކުން ގައުމު ސަލާމަތްކުރުމާއި އަޅުގަނޑުމެންގެ ތެރޭގައި ހުރި އަށަގަނެފައި، މޫލާފައި ހުރި، ދެވިހިފާފައި ހުރި ބައެއް އާދަތަކުން ވެސް އަޅުގަނޑުމެން ހިތްވަރުލާފައި ސަލާމަތްކުރުމުގެ ނިޔަތުގައި ކުރާ ކަންތައްތައް. އެއީ އެއްގޮތަކަށް ވެސް ރައްޔިތުންނަށް ދަތިކުރުމަށް، އުނދަގޫ ކުރުމަށް ކުރާ ކަންކަމެއް ނޫން."

ރައީސް ވިދާޅުވީ އެ ފިޔަވަޅުތައް އެޅުމުގައި އެ މަނިކުފާނުގެ ނިޔަތް ވަރަށް ސާފު ކަމަށެވެ. އެއާއެކު، ވަށާޖެހޭ މާނައިގައި ތަރައްގީ ގެނައުމަށް ކުރާ މަސައްކަތުގައި އެއްބާރުލުން ދެއްވުމަށް އެ މަނިކުފާނު އެދިވަޑައިގެންނެވި އެވެ.

"އަޅުގަނޑުގެ ނިޔަތް ވަރަށް ސާފު މިކަމުގައި. އަޅުގަނޑު އެދެނީ ހުރިހާ ބޭފުޅުން ގުޅިވަޑައިގެން، މި ވިސްނުމުގައި އަޅުގަނޑުމެންގެ ގައުމު ތަރައްގީކުރުމުގައި ވަށާޖެހޭ މާނަވީ އަދި އަތުން ހިފޭ ތަރައްގީ ހާސިލްކުރުމުގައި ކުރިއަށްދާން އަޒުމްކަނޑައަޅަން. އޭރުން އިރާދަކުރެއްވިއްޔާ އަޅުގަނޑުމެން މި ގެންނަން ބޭނުންވާ ހަގީގީ ތަރައްގީ ރާއްޖެއަށް ލިބިގެންދާނެ." ރައީސް ވިދާޅުވި އެވެ.