ބެޔާން ބަލި އެނދުގައި، އެކަމަކު ކޮމްޕެނީ އިތުބާރާ އެކު

އަނިޔާގެ މައްސަލަ ކުރިމަތިވެފައި ވިޔަސް އަމާޒަށް ބަދަލެއް ނާންނަ ކަމަށް ޗެމްޕިއަންސް ލީގުގެ ކުއާޓާ ފައިނަލުގައި މިރޭ އިޓަލީގެ އިންޓަ މިލާނާ ދެކޮޅަށް ނުކުންނަ ޖަރުމަނުގެ ބެޔާން މިއުނިކުގެ ކޯޗު ވިންސެންޓް ކޮމްޕެނީ ބުނެފި އެވެ.

ބެޔާނުގެ އެލިއަންޒް އެރީނާގައި މިރޭ ކުޅޭ މެޗުގައި އެ ޓީމުގެ ޖަމާލް މުސިއާލާ، އަލްފޮންސޯ ޑޭވިސް، ޑަޔޯ އުޕަމެކާނޯ، ހިރޮކީ އިޓޯ، މެނުއަލް ނޯޔާ، ކިންގްސްލީ ކޯމަން، އަދި އެލެކްސެންޑާ ޕަވްލޮވިޗް އަށް ނުކުޅެވޭނެ އެވެ. މީގެ ތެރެއިން ގިނަ ކުޅުންތެރިންނަށް އަންނަ ހަފުތާގައި އޮންނަ ދެ ވަނަ ލެގުގައި ވެސް ނުކުޅެވޭނެ އެވެ.

އެކަމަކު ކޮމްޕެނީ ބުނީ ޝަކުވާކުރަން ބޭނުންނުވާ ކަމަށެވެ.

"އަނިޔާގެ މައްސަލަ ދިމާވިޔަސް އަމާޒަށް ބަދަލު ގެންނަން ބޭނުމެއް ނޫން،" ކޮމްޕެނީ ބުންޏެވެ.

"އަނެއްކާ ހަނދާން ނައްތާލައިގެން ނުވާނެ މާދަން ރޭ (މިރޭ) ބަދަލުގައި އަރާ ކުޅުންތެރިންނަކީ މި ޓީމު މި ހިސާބަށް އައުމުގައި ހިއްސާވި ކުޅުންތެރިކަން ވެސް."

ކޮމްޕެނީ ބުނީ މިރޭ އަރާ ކުޅުންތެރިން މޮޅަށް ކުޅެ ނަތީޖާ ނެރޭ ކަމަށް އޭނާ ޔަގީންކުރާ ކަމަށެވެ.

އިންޓަގެ ކޯޗު ސިމޯނީ އިންޒާގީ ބުނީ ބެޔާން އަށް ދިމާވެފައިވާ މައްސަލައާ މެދު އޭނާ ހަމްދަރުދީވާ ކަމަށެވެ. ހާއްސަކޮށް މުސިއާލާ ފަދަ ދުނިޔޭގެ ފެންވަރުގެ ތަރިއަކަށް ނުކުޅެވުމަކީ ބެޔާނަށް ކުރިމަތިވާނެ ބޮޑު މައްސަލައެއް ކަމަށް އޭނާ ބުންޏެވެ.

އެކަމަކު އިންޒާގީ ބުނީ ބެޔާން އަކީ ރެއާލް މެޑްރިޑާ އެކު މުބާރާތުގެ ފޭވަރިޓުން ކަމަށާއި، ބަދަލުގައި އަރާނެ މޮޅު ކުޅުންތެރިން އެ ޓީމުގައި އެބަތިބި ކަމަށެވެ.

"އެކަމަކު އޭނާ (މުސިއާލާ) ނެތްތަން ތޯމަސް މުލާ ނޫނީ ސާޖް ގްނެބެރީ އަށް ފޫބެއްދޭނެކަން ވިސްނާލީމާ އެބަ އެނގޭ އެ ޓީމުގެ ވަރުގަދަކަން،" އިންޒާގީ ބުންޏެވެ.

އިންޒާގީ ބުނީ އިންޓަގެ ވެސް މުހިއްމު ބައެއް ކުޅުންތެރިންނަށް ނުކުޅެވޭ ކަމަށާއި، އެހެންކަމުން އެ ޓީމު ވެސް އޮތީ ދެރަ ހާލަތެއްގައި ކަމަށެވެ.

އިންޓަ އިން ނުކުޅެވެނީ ޑެންޒެލް ޑުމްފްރިސް އާއި، މެހްދީ ޓެރަމީ އާއި، ޕިޓްރީ ޒިއެލިންސްކީ އަށެވެ. އެ ޓީމުގެ އެންމެ މުހިއްމު ދިފާއީ ކުޅުންތެރިޔާ އަލެސަންދްރޯ ބަސްޓޯނީ އާއި، ފުލްބެކް ފެޑެރިކޯ ޑިމާކޯ އަށް ވެސް ކުޅެވޭނެކަމެއް ޔަގީނެއް ނޫނެވެ.

މިރޭގެ މެޗު ފަށާނީ ރާއްޖެ ގަޑިން މެންދަމު 12 ޖަހާއިރެވެ.