ފޮރިން މިނިސްޓަރު ހަލީލް މޯލްޓާ އަށް

ރާއްޖޭގެ ފޮރިން މިނިސްޓަރު ޑރ. އަބްދުﷲ ހަލީލް ރަސްމީ ދަތުރެއްގައި މިއަދު މޯލްޓާ އަށް ވަޑައިގެންފި އެވެ.

ފޮރިން މިނިސްޓްރީން ބުނީ، އޭނާގެ މި ދަތުރުގައި މޯލްޓާގެ ބޮޑުވަޒީރުގެ ނައިބު އަދި ފޮރިން މިނިސްޓަރު އިއަން ބޯގްއާ ބައްދަލުކުރައްވައި ދެ ގައުމުގެ ގުޅުން ބަދަހި ކުރެވޭނެ ދާއިރާތަކާ ގުޅޭ ގޮތުން މަޝްވަރާ ކުރައްވާނެ ކަމަށެވެ. އަދި މޯލްޓާގެ ކެބިނެޓުގެ އެހެން ބައެއް މިނިސްޓަރުންނާ ވެސް ހަލީލް ބައްދަލުކުރައްވައި ދެ ގައުމުން ގުޅިގެން މަސައްކަތް ކުރެވޭނެ ދާއިރާތަކާ ބެހޭ މަޝްވަރާތައް ބާއްވާނެ ކަމަށް ފޮރިން މިނިސްޓްރީން ބުންޏެވެ.

އޭގެ ތެރޭގައި ތިމާވެށި ހިމާޔަތްކުރުމާއި ދެމެހެއްޓެނެވި ތަރައްގީ އާއި އިޔާދަކުރަނިވި ހަކަަތައިގެ ދާއިރާ އާއި ވިޔަފާރި އާއި ޓޫރިޒަމްގެ ދާއިރާ އިން ގުޅުން ބަދަހިކުރުން ހިމެނޭ ކަމަށް ސަރުކާރުން ބުންޏެވެ.

މިނިސްޓަރު ހަލީލްގެ އަރިހުގައި މޯލްޓާ އަށް ވަޑައިގަތީ ސެކްރެޓަރީ ޑރ. ހާލާ ހަމީދާއި ސީނިއާ އަންޑާ ސެކްރެޓަރީ ހަސަން ހުސައިން ޝިހާބެވެ.