ކިޔެވުން ފެށުމުގެ ކުރިން ސްކޫލުތަކަށް ޓީޗަރުންނާއި ފޮތްތައް ހަމަވާނެ: މިނިސްޓަރު

އަންނަ ހޯމަ ދުވަހު މި އަހަރުގެ ދިރާސީ އާ އަހަރުގެ ކިޔެވުން ފަށާއިރު ހުރިހާ ސްކޫލަކަށް ޓީޗަރުންނާއި ދަރިވަރުންގެ ފޮތްތައް ހަމަވާނެ ކަމަށް އެޑިޔުކޭޝަން މިނިސްޓަރު ޑރ. އިސްމާއިލް ޝަފީއު މިއަދު ވިދާޅުވެއްޖެ އެވެ.

ދިރާސީ އަހަރުގެ ކިޔެވުން ފަށާއިރު ވެސް ދަރިވަރުންނަަށް ބޭނުންވާ ފޮތްތައް ހަމަޔަށް ސަރުކާރުން ފޯރުކޮށް ނުދެވުމަކީ އަބަދުވެސް ބެލެނިވެރިންގެ އޮންނަ ޝަކުވާއެކެވެ. ނަމަވެސް މިނިސްޓަރު "މިހާރު" އަށް ވިދާޅުވީ ދަރިވަރުންނަށް ބޭނުންވާ ފޮތްތައް ކިޔެވުން ފެށުމުގެ ކުރިން ހަމަކުރުމަށް ފޮތްތައް އަތޮޅުތަކަށާއި މާލެ ސަރައްދުގެ ސްކޫލުތަކަށް ބެހުމުގެ މަސައްކަތް މަސް ދުވަސް ކުރިން ފަށާފައިވާ ކަމަށެވެ.

މިނިސްޓަރު ވިދާޅުވީ މިހާރު ރަށްރަށަށް ފޮނުވަނީ ކުރިން ނުފޮނުވި ހުރި ގްރޭޑް 4 އަދި 5ގެ ފޮތްތައް ކަމަށެވެ.

"ހަމައެކަނި ގްރޭޑް 4 އަދި 5 ގެ ބައެއް ފޮތްތައް. އެ ގްރޭޑްތައް ނޫން އެހެން ހުރިހާ ގްރޭޑެއްގެ ފޮތްތައް ބަހައި ނިމިފައި މިހާރު ވަނީ. އެ ފޮތްތައް ވެސް ދެ ދުވަސް ތެރޭ ބަހާ ނިންމާލެވޭނެ،" އިސްމާއިލް ވިދާޅުވި އެވެ.

މިނިސްޓްރީން މީގެ ކުރިން ބުނެފައި ވަނީ މި އަހަރު ފޮތްތައް ފޮނުވާނީ ކޮންމެ ދަރިވަރެއްގެ ފޮތްބައި ވަކިން ހަމަކޮށްފައި ކަމަށެވެ.

ދިރާސީ އަހަރުގެ ކިޔެވުން ނިންމައި، ދަރިވަރުން ޗުއްޓީއަށް ދިޔައީ މިދިޔަ ފެބްރުއަރީ މަހުގެ 25 ވަނަ ދުވަހު އެވެ. މި އަހަރުގެ ބޮޑު ޗުއްޓީ ދިމާވީ ރޯދަ މަހާ އެވެ. ދިރާސީ އާ އަހަރުގެ ކިޔެވުން މި މަހުގެ ހަތް ވަނަ ދުވަހު ފަށާއިރު، އެ އަހަރު ނިމޭނީ ޑިސެމްބަރު މަހުގެ 28 ވަނަ ދުވަހު އެވެ.