11.9 މިލިއަނަށް ތުލުސްދޫގައި އާ އިންޖީނުގެއެއް އަޅަން ހަވާލުކޮށްފި

ކ. ތުލުސްދޫގައި އަލަށް އިމާރާތް ކުރަން ނިންމާފައިވާ އިންޖީނުގެ އާއި ކަސްޓަމާ ސާވިސް ބިލްޑިންގް އަދި އިންޖީނުގޭގެ ވަށާފާރު އިމާރާތްކުރުމަށް އެއްބަސްވުމެއްގައި ސޮއި ކޮށްފި އެވެ.

ޖުމްލަ 175 ދުވަހުގެ ތެރޭގައި މަސައްކަތް ނިންމަން 11.9 މިލިއަން ރުފިޔާއަށް ހަވާލުކޮށްފައިވަނީ ސަން ވިލް ޕްރައިވެޓް ލިމިޓެޑް އާ އެވެ.

އެއްބަސްވުމުގައި ސޮއިކުރީ އިއްޔެ ސްޓެލްކޯގައި ބޭއްވި ހާއްސަ ރަސްމިއްޔާތެއްގަ އެވެ. ސްޓެލްކޯގެ ފަރާތުން ސޮއި ކުރެއްވީ އެ ކުންފުނީގެ މެނޭޖިންގް ޑިރެކްޓަރު ހުސައިން ފަހުމީ އެވެ. އަދި މަސައްކަތާ ހަވާލުވި ސަންވިލް ޕްރައިވެޓް ލިމިޓެޑްގެ ފަރާތުން ސޮއިކުރެއްވީ އެ ކުންފުނީގެ މެނޭޖިންގް ޑިރެކްޓަރު އަބްދުﷲ ރާފިއު އެވެ.

ތުލުސްދޫ ދާއިރާގެ މެމްބަރު އިބްރާހިމް ނަސީމް އަދި އެ ރަށު ކައުންސިލްގެ ރައީސް އަސްލަމް މޫސާ ބައިވެރިވެވަޑައިގެންނެވި ރަސްމިއްޔާތުގައި ވާހަކަ ދައްކަވަމުން ފަހުމީ ވިދާޅުވީ ތުލުސްދުއަކީ ސްޓެލްކޯއަށް ވަރަށް މުހިއްމު ރަށެއް ކަމަށެވެ.

ސްޓެލްކޯ ކުންފުންޏަކަށް ވުމަށްފަހު މާލޭ ސަރަހައްދު ފިޔަވައި، ހިދުމަތަށް ނެގި ފުރަތަމަ ރަށަކީ ތުލުސްދޫކަން ފާހަގަކުރައްވައި އޭނާ ވިދާޅުވީ، މިހާރުވެސް ހިންގަމުންދާ އިންޖީނުގެއަކީ ވަރަށް ފެންވަރު ރަނގަޅު ޕަވާހައުސްއެއް ކަމަށެވެ.

"މީހުން ދިރިއުޅޭ ސަރަހައްދުގަ ހުރި ޕަވާހައުސްއަކަށް ވާތީ، މީހުންނަށް އެންމެ ފަސޭހަކޮށް، އާބަން ސެންޓަރުތަކާ ދުރުގަ ޕަވާހައުސްތައް އެޅުމަށް ރައީސް ޑރ. މުހައްމަދު މުއިއްޒު ގެންގުޅުއްވާ ސިޔާސަތުގެ ދަށުން، އަޅުގަނޑުމެން ތުލުސްދޫ ޕަވާހައުސް މި ބަދަލުކުރަނީ އަލަށް ހިއްކާފައިވާ ސަރަހައްދަށް،" ފަހުމީ ވިދާޅުވި އެވެ.

އެ ދާއިރާގެ މެމްބަރު އިބްރާހިމް ނަސީމް ވިދާޅުވީ ތުލުސްދުއަށް ބޭނުންވާ ވަރަށް ކަރަންޓު ލިބުމުގައި ދަތިތަކެއް ހުރި ކަމަށެވެ.

"އެއީ އީދު ފަދަ ހާއްސަ ދުވަސްތަކުގައި ޕީކަށް އަރައިގެންދާ ވަގުތު ކޮންމެސް ވަރަކަށް ހިކްއަޕް އުޅޭ ވާހަކަ. އެ ކަންކަން އިރާދަކުރެއްވިއްޔާ މި އިންޖީނުގެއާއެކު ރަނގަޅުވެގެން ދާނެ،" ނަސީމް ވިދާޅުވި އެވެ.