ޕްރިމިއަމް ސީޓު ތައާރަފު ކުރިޔަސް އިކޮނޮމީގެ ޓިކެޓް ގަންނަން ދައްޗެއް ނުވާނެ: މޯލްޑިވިއަން

ރާއްޖޭގެ އެތެރޭގެ ދަތުރުތަކަށް ޕްރިމިއަމް އިކޮނޮމީ ތައާރަފުކުރި ނަމަވެސް އިކޮނޮމީ ކްލާހުގެ ޓިކެޓު ގަންނަން ދައްޗެއް ނުވާނެ ކަމަށް މޯލްޑިވިއަން އެއާލައިން ހިންގާ އައިލެންޑް އޭވިއޭޝަނުން އިއްޔެ ބުނެފި އެވެ.

އެ ކުންފުނިން އެހެން ބުނީ، ޕްރިމިއަމް ސީޓުތަކެއް ވިއްކަން ފެށުމާ އެކު، އިކޮނޮމީ ކްލާހުން ނުވަތަ އަގުހެޔޮކޮށް ޓިކެޓް ނުލިބޭނެ ކަމަށް ބުނެ އާންމުން ކަންބޮޑުވުން ފާޅުކުރަމުންދާތީ އެވެ.

"އަޅުގަނޑުމެން އިކޮނޮމީ ކްލާހުގެ ދަތުރުތައް ހުއްޓައެއް ނުލަން. މިހާރު ވެސް ހުރި ފްލައިޓުތަކަކަށް ވަކި އަދަދެއްގެ ސީޓުތަކަކަށް ޕްރިމިއަމް އިކޮނޮމީގެ ނަމުގައި ގިނަ ހިދުމަތްތަކެއް މި ތައާރަފްކުރީ. އެއީ މިހާރަށް ވުރެ ރަނގަޅަށް ދަތުރުގެ ތަޖުރިބާ ފުރިހަމަ ކޮށްދިނުމުގެ ގޮތުން ތައާރަފްކުރި ހިދުމަތެއް." އައިލެންޑް އޭވިއޭޝަންގެ އޮފިޝަލަކު ވިދާޅުވި އެވެ.

އޭނާ ވިދާޅުވިގޮތުގައި، ޕްރިމިއަމް އިކޮނޮމީ ތައާރަފްކުރި ނަމަވެސް ދަތިކަމެއް ނެތި އިކޮނޮމީ ސީޓުތައް އަދިވެސް ބުކް ކުރެވޭނެ އެވެ.

އެ ކުންފުނިން ބުނީ، އެކި ރޫޓުތަކަށް ޕްރިމިއަމް އިކޮނޮމީ ކްލާހުގެ ސީޓުތައް ހުންނާނީ އެކި އަގުތަކުގައި ކަމަށެވެ. އަދި ބުކިން ހައްދާއިރު، ކޮންމެ ކަސްޓަމަރަކަށް ވެސް އިނޮކޮމީ ނުވަތަ "ޕްމިއަމް އިކޮނޮމީ" ހިޔާރުކުރުމުގެ ފުރުސަތު ލިބޭނެ ކަމަށް ބުންޏެވެ.

"އެހެންވީމާ އިކޮނޮމީކް ކްލާހުން ސީޓު ބޭނުންވާ ބޭފުޅުންނަށް އެ ފުރުސަތު ނުގެއްލޭނެ،" އޮފިޝަލް ވިދާޅުވި އެވެ.

މޯލްޑިވިއަންއިން އެތެރޭގެ އުދުހުންތަކަށް ޕްރިމިއަމް އިކޮނޮމީ ތައާރަފްކުރީ މިދިޔަ ބުދަ ދުވަހު އެވެ. ޕްރިމިއަމް އިކޮނޮމީ ޓިކެޓްތަކުގައި ދަތުރު ކުރަން ފަށާނީ އަންނަ މަހުގެ 13 ވަނަ ދުވަހުން ފެށިގެންނެވެ.

ޕްރިމިއަމް އިކޮނޮމީގެ ދަށުން ދަތުރުކުރާ ފަސިންޖަރުންނަށް 25 ކިލޯގެ ބެގޭޖު އުފުލޭނެ އެވެ. ދަތުރުގެ ދުވަސް ބަދަލު ކުރުމާއި ޗެކިން ކުރުމުގައި ހާއްސަ އިސްކަމެއް ދޭނެ އެވެ. ޕްރިމިއަމް އިކޮނޮމީގައި ދަތުރުކުރާ ނަމަ "މޫނިމާ ލައުންޖް" ގައި މަޑުކޮށްލައި ކެއުމުގެ އިންތިޒާމުތައް ވެސް ހަމަޖެއްސޭނެ ކަމަށް އެ އެއާލައިނުން ބުންޏެވެ.

މާލޭގެ އިތުރުން ދަރަވަންދު އާއި އިފުރުން ދަތުރުކުރާ ފަސިންޖަރުންނަށް ވެސް ލައުންޖުގެ ހިދުމަތްތައް ލިބޭނެ ކަމަށް މޯލްޑިވިއަން އިން ބުންޏެވެ. ދަތުރުގައި އިކޮނޮމީ ޓިކެޓުގައި ދަތުރުކުރާ ފަސިންޖަރުންނަށް ވުރެ ފެންވަރު ރަނގަޅު ކެއުންތައް ލިބޭނެ އިންތިޒާމު ވެސް މޯލްޑިވިއަން އިން ވަނީ ހަމަޖައްސައިފަ އެވެ. އަދި ދަތުރު ނިމުމަށް ފަހު، އެންމެ ފުރަތަމަ ފޮށި، ދަބަސް ވެސް ލިބޭނީ ޕްރިމިއަމް އިކޮނޮމީގައި ދަތުރު ކުރާ ފަސިންޖަރުންނަށެވެ.

މޯލްޑިވިއަން އިން އެންމެ ފުޅާދާއިރާއެއްގައި ހިންގަނީ ޑޮމެސްޓިކް ދަތުރުތައް ކަމަށް ވާއިރު، އެ ދަތުރުތަކުގެ ފެންވަރު ރަނގަޅު ކުރުމަށް ވަރަށް ބޮޑު އިސްކަމެއް ދެ އެވެ. އެ އެއާލައިން އިން ޑޮމެސްޓިކް ދަތުރުތަކުގައި ބޭނުން ކުރާ ހުރިހާ ބޯޓެއް މި އަހަރުގެ ތެރޭގައި އާ ކުރުމަށް ވެސް ވަނީ ނިންމައިފަ އެވެ. އެހެންވެ، އިތުރު ތިން އޭޓީއާރް ގެނައުމަށް ވެސް ވަނީ ޕްލޭންކޮށްފަ އެވެ. އިތުރު ތިން ބޯޓާ އެކު، އޭޓީއާރްގެ އަދަދު 8 އަށް އިތުރު ކުރާނެ ކަމަށް މޯލްޑިވިއަން އިން ބުންޏެވެ.