ގޮވާމުން ފިތުރު ޒަކާތް ބަލައިގަންނަން ފަށާނީ އަންނަ ހޮނިހިރު ދުވަހުން ފެށިގެން

މާލޭގައި އަންނަ ހޮނިހިރު ދުވަހުން ފެށިގެން ގޮވާމުން ފިތުރު ޒަކާތް ބަލައިގަންނަން ފަށާނެ ކަމަށް އިސްލާމިކް މިނިސްޓްރީން މިއަދު ބުނެފި އެވެ.

އެ މިނިސްޓްރީން ބުނީ، އެހެން އަހަރުތަކެކޭ އެއްގޮތަށް މި އަހަރު ވެސް ގޮވާމުގެ ބާވަތްތަކުން ފިތުރު ޒަކާތް ދެއްކުމަށް ބޭނުންވާ މީހުންނަށް އެ ފުރުސަތު އަންނަ ހޮނިހިރު ދުވަހުން ފެށިގެން މި މަހުގެ 27 ވަނަ ދުވަހުގެ ނިޔަލަށް އޮންނާނެ ކަމަށެވެ.

ޒަކާތް ބަލައިގަންނާނީ އެ މުއްދަތުގައި ކޮންމެ ދުވަހެއްގެ ވެސް މެންދުރު 1:00 އިން ހަވީރު 4:00 އާ ދެމެދުގަ އެވެ.

ފިތުރު ޒަކާތުގެ ގޮތުގައި ދައްކާނީ އެ ބަޔަކު އާންމު ގޮތެއްގައި ކެއުމަަށް ބޭނުންކުރާ ގޮވާމުގެ ބާވަތްތަކުން ބޮލަކަށް 2.4 ކިލޯގެ މިންވަރެވެ.

މިނިސްޓްރީން ބުނި ގޮތުގައި މާލޭގައި ފިތުރު ޒަކާތް ބަލައިގަންނާނީ މަޖީދިއްޔާ ސްކޫލުގެ ސަލާހުއްދީން ހޯލުގައި ކަމަށެވެ. ފިތުރު ޒަކާތް ދެއްކުމަށްދާ މީހުން، އަމީރު އަހުމަދު މަގުގައިވާ ގޭޓު ބޭނުންކުރުމަށް މިނިސްޓްރީން އިރުޝާދު ދެ އެވެ.

ފިތުރު ޒަކާތުގެ ގޮތުގައި ބަލައިގަންނަ ތަކެތި:

- އާދައިގެ ހަނޑޫ

- ތައިލެންޑް ހަނޑޫ

- ބާސްމަތީ ހަނޑޫ

- ރަތް ހަނޑޫ

- ގޮދަން ފުށް