ސްޓޫޑެންޓު ލޯނުގެ މައްސަލާގައި މިނިސްޓަރާ ސުވާލުކުރަނީ

ސްޓޫޑެންޓު ލޯނާއި ސްކޮލަޝިޕްގައި ކިޔަވާ ކުދިންގެ ފައިސާ ޖަމާކޮށްދިނުން ލަސްވާ މައްސަލައިގައި ހަާ އެޑިއުކޭޝަން މިނިސްޓަރު ޑރ. އަލީ ހައިދަރު އަހުމަދާ ސުވާލުކުރަން ރައްޔިތުންގެ މަޖިލީހަށް ހުށަހަޅައިފި އެވެ.

ހިތަދޫ މެދުދާއިރާގެ ޕީއެންސީގެ މެމްބަރު އަހުމަދު އަޒާން މަރުޒޫގު މިއަދު ފޮނުއްވި ނޯޓިސްގައި ވިދާޅުވީ، ސްޓޫޑެންޓު ލޯނު އަދި ސްކޮލަޝިޕްތަކުގައި ކިޔަވާ ދަރިވަރުންގެ ސްޓައިޕެންޑު ފައިސާ ޖަމާކުރުމާއި ޓިއުޝަން ފީތައް ދެއްކުން ލަސްވާކަމުގެ ކަންބޮޑުވުންތައް ބެލެނިވެރިން ހިއްސާ ކުރަމުންދާ ކަމަށެވެ.

އެހެންވެ، ސްޓައިޕެންޑު ފައިސާ ޖަމާކުރުމާއި ދައްކަންޖެހޭ ޓިއުޝަން ފީތައް ދެއްކުން ލަސްވާ ސަބަބާއި އެ ދަތިތައް ނައްތާލަން ކުރާ މަސައްކަތްތައް ސާފުކޮށްދިނުމަށް އޭނާ އެދިވަޑައިގެންނެވި އެވެ.

އޭގެ އިތުރުން ދަރިވަރުން ފޮނުވާ އީ-މެއިލް އަދި ސިޓީތަކަށް ޖަވާބުދިނުން ލަސްވާކަމުގެ ޝަކުވާތައް ލިބޭތީ އެކަން ހައްލުކުރަން އަޅާ ފިޔަވަޅުތައް ހިއްސާކޮށްދިނުމަށް ވަކިވަކިން ފޮނުއްވި ދެ ވަނަ ނޯޓިސްގައި އަޒާން އެދިވަޑައިގެންފައިވެ އެވެ.

މަތީ ތައުލީމުގެ ލޯނުގައި ކިޔަވާ ދަރިވަރެއްގެ އާއިލާއިން "މިހާރު" އަށް ބުނީ ކޯސް ފީ ދެއްކުން ލަސްވާތީ އެކަމާ ގުޅޭގޮތުން ހަޔާ އެޑިއުކޭޝަން މިނިސްޓްރީ އަށް ގުޅުމުން، ލޯނުގެ ފައިސާ ދޫކުރެވޭނީ އަންނަ މަހުގެ ތެރޭގައި ކަމަށް އަންގާފައިވާ ކަމަށެވެ.

"މިއަދު ކޯސް ފީ ދައްކަންޖެހޭ. އެކަމަކު، މިނިސްޓްރީން ބުނީ އަންނަ މަހުގައި ކަމަށް ލޯނު ފައިސާ ދޫކުރެވޭނީ،" އާއިލާ އިން ވާހަކަ ދެއްކި މީހާ ބުންޏެވެ.