ދަރިވަރުންނަށް ޖަވާބު ދިނުން އަވަސްކުރަން ހަޔާ އެޑިއުކޭޝަން މިނިސްޓްރީން ޕޯޓަލެއް ތައާރަފު ކުރަނީ

ސްޓޫޑެންޓް ލޯނާއި ފްރީ ޑިގްރީ ޕްރޮގްރާމްގެ ދަށުން މަތީ ތައުލީމު ހާސިލު ކުރަމުން އަންނަ ދަރިވަރުން ފޮނުވާ ސުވާލުތަކަށް މިނިސްޓްރީން ޖަވާބު ދިނުން ލަސްވާ މައްސަލަ ހައްލު ކުރުމަށް ޕޯޓަލެއް ތައާރަފްކުރުމުގެ މަސައްކަތް ކުރަމުން އަންނަ ކަމަށް ހަޔާ އެޑިއުކޭޝަން މިނިސްޓްރީން ބުނެފި އެވެ.

ރައްޔިތުންގެ މަޖިލިހުގެ ހިތަދޫ މެދުދާއިރާގެ ޕީއެންސީގެ މެމްބަރު އަހުމަދު އަޒާން މަރުޒޫގު ލިޔުމުން ހަޔާ އެޑިއުކޭޝަން މިނިސްޓަރު ޑރ. އަލީ ހައިދަރަށް ހުށަހެޅުއްވި ސިޓީގެ ޖަވާބު މަޖިލިހުގެ މިއަދުގެ ޖަލްސާ އަށް އިއްވާފައިވާއިރު، މިނިސްޓަރު ވިދާޅުވީ އެ މިނިސްޓްރީގެ ސްކޮލަޝިޕް ސެކްޝަނާއި ލޯނު ސެކްޝަނާއި ފްރީ ޑިގްރީ ސެކްޝަނަށް ދުވާލެއްގެ މައްޗަށް 600 އަށް ވުރެ ގިނަ ސިޓީ އާއި އީމެއިލް ލިބޭ ކަމަށެވެ.

ދަރިވަރުންނަށް ލޯނު ދޫކުރުމުގައި އުފެދުނު ބައެއް ނުތަނަވަސްކަމާ އެކު، މިނިސްޓްރީ އަށް އަމާޒުވި ސުވާލުތައް އިތުރުވެ، ސެކްޝަނުން ކުރަން ހަމަޖެހިފައިވާ މަސައްކަތްތައް ކުރަމުން އެ ހުރިހާ ސުވާލުތަކަށް ޖަވާބު ނުދެވި، ބޮޑެތި ލަސްތަކަކާ ކުރިމަތިވި ކަމަށް މިނިސްޓަރު ވިދާޅުވި އެވެ.

އެކަމަކު، މިނިސްޓްރީން މަސައްކަތް ކުރަމުން ދިޔައީ ގިނަ ވެގެން ހަތް ދުވަހުގެ ތެރޭގައި ޖަވާބު ދިނުމަށް ކަމަށާއި އަދި އެ މުއްދަތު ތިން ދުވަހަށް ކުރު ކުރުމަށް އަމާޒު ހިފާފައިވާ ކަމަށް ވެސް ހައިދަރު ވިދާޅުވި އެވެ.

މިނިސްޓަރު ވިދާޅުވިގޮތުގައި، މި މައްސަލަ އިތުރަށް ހައްލު ކުރުމުގެ ގޮތުން ދަރިވަރުންގެ މައުލޫމާތު ބަލަހައްޓާނެ ޕޯޓަލެއް އުފެއްދުމުގެ މަސައްކަތް މިހާރު ވަނީ ފަށައިފަ އެވެ.

މި ޕޯޓަލްގެ މަސައްކަތް ނިންމައި އަންނަ އޮކްޓޯބަރު މަހު ބޭނުން ކުރަަން ފަށާނެ ކަމަށާއި އޭރުން ދަރިވަރުންގެ ރިކުއެސްޓުތަކަށް ޖަވާބުދިނުން ވަރަށް ބޮޑަށް އަވަސް ވާނެ ކަމަށް އޭނާ ވިދާޅުވި އެވެ.