އެގްރޯނެޓްގެ މަސައްކަތް އަލުން ފަށަނީ

އުވާލަން ނިންމައި، މަސައްކަތް މެދުކަނޑާލާފައި އޮތް އެގްރޯ ނެޝަނަލް ކޯޕަރޭޝަން (އެގްރޯނެޓް)ގެ މަސައްކަތް އަލުން ފަށަން ސަރުކާރުން ނިންމައިފި އެވެ.

ސަރުކާރުން ދަނޑުވެރިކަމުގެ ވިޔަފާރިކުރަން ކުރީގެ ރައީސް އިބްރާހިމް މުހައްމަދު ސޯލިހުގެ ސަރުކާރުން 2020 ގައި އުފެއްދި ކުންފުނި އުވާލައި އެ ކުންފުނީގެ ދަށުން ކުރާ މަސައްކަތް މޯލްޑިވްސް އިންޑަސްޓްރިއަލް ޑިވެލޮޕްމެންޓް ފްރީ ޒޯން (އެމްއައިޑީއެފްސީޒެޑް) ގެ ދަށަށް ގެންދަން ނިންމީ، މިދިޔަ ސެޕްޓެމްބަރު މަހު އެވެ.

އެ ނިންމުމާއެކު، ކުންފުނިން ދަނޑުވެރިންނާ އެކު ހިންގަމުން ދިޔަ މުއާމަލާތްތައް ހުއްޓާލާފައިވަނީ މިދިޔަ އަހަރުގެ ނޮވެންބަރު މަހު އެވެ.

ދަނޑުވެރިކަމާ ބެހޭ މިނިސްޓްރީން "ސަރުކާރު" ހަބަރުގައި ބުނީ އެ ނިންމުން ބަދަލު ކުރެއްވުމަށް ނިންމަވައި ރައީސް ޑރ. މުހައްމަދު މުއިއްޒު ކެބިނެޓަށް ހުށަހަޅުއްވާފައިވާ ކަމަށެވެ.

މިނިސްޓްރީން ބުނެފައިވާ ގޮތުގައި އެގްރޯނެޓު އަލުން ހިންގަން ހަމަޖެހިފައިވަނީ މިނިސްޓްރީން ވިލަރެސް ކުރާ ގޮތަށް، އެމްއައިޑީއެފްސީޒެޑްގެ ސަބްސިޑަރީ ކުންފުންޏެއްގެ ގޮތުގަ އެވެ.

މިއީ ދަނޑުވެރިކަމުގެ ސިނާއަތުގެ މަސައްކަތްތައް އިތުރަށް ހަރުދަނާކޮށް، ދަނޑުވެރިން ހައްދާތަކެތި ވިއްކޭނެ އިތުރު މަގުތައް ފަހިކޮށް، ދަނޑުވެރިކަމުން އިތުރު އާމްދަނީ ހޯދޭނެ ގޮތްތައް ފަހިކުރުމަށް ނިންމި ނިންމުމެއް ކަމަށް މިނިސްޓްރީން ބުންޏެވެ.