އުރީދޫ 5ޖީ ހިދުމަތް ފުޅާކޮށްފި، ރާއްޖޭގެ 80 ޕަސެންޓަށް މިހާރު ހިދުމަތް ލިބޭނެ

އުރީދޫ މޯލްޑިވްސްގެ 5ޖީ ހިދުމަތް ރާއްޖޭގެ އެކި އަތޮޅުތަކަށް ފުޅާކޮށް، 80 ޕަސެންޓް ރަށްތަކަށް މި ހިދުމަތް ދޭން ފަށައިފި އެވެ.

އުރީދޫން ބުނީ އެ ކުންފުނިން މިހާރު މީހުން ދިރިއުޅޭ 79 ރަށާއި އަށް ރިސޯޓަށް އެ ހިދުމަތް ދެމުންދާ ކަމަށެވެ. އަދި ރާއްޖޭގެ އެކި ހިސާބުތަކުގައި 225 5ޖީ ސައިޓު ގާއިމުކޮށްފައި ވާނެ ކަމަށް ވެސް ބުންޏެވެ.

އުރީދޫން ބުނީ މި ހިދުމަތް ކުރިއަށް ވުރެ ފުޅާކޮށް ދެވުމަކީ އެ ކުންފުންޏަށް ލިބުނު ކާމިޔާބީއެއް ކަމަށެވެ.

އަދި އެ ކާމިޔާބީއާ އެކު އުރީދޫ 5ޖީ އަކީ ރާއްޖޭގެ އެންމެ ވަރުގަދަ އަދި އެންމެ ފުޅާ 5ޖީ ނެޓްވޯކަށް ވެ، ހަލުއި އިންޓަނެޓް ސްޕީޑާއެކު ކުރިއަށްވުރެ ގިނަ ބަޔަކަށް 5ޖީ ތަޖުރިބާ ކުރުމުގެ ފުރުސަތު ލިބިގެން ދާނެ ކަމަށް ވެސް ބުންޏެވެ.

އުރީދޫން ބުނީ އެ ކުންފުނިން އަބަދުވެސް މަސައްކަތް ކުރަމުން ދަނީ އަމިއްލަ ފަރުދުންނާއި ވިޔަފާރިތަކާއި ސިނާއަތްތައް ޒަމާނީ ޓެކްނޮލޮޖީ އާއެކު ބާރުވެރި ކުރުވައި، އެކި ދާއިރާތަކުން އިނޮވޭޝަން، އެފިޝަންސީ އަދި ޑިޖިޓަލް ޓްރާންސްފޮމޭޝަން އަށް މަގުފަހިކޮށްދިނުމަށް ކަމަށެވެ.

އުރީދޫން 5ޖީގެ ހިދުމަތް ރާއްޖޭގެ 60 ޕަސެންޓަށް ފުޅަކޮށް އިއުލާނު ކުރީ މިދިޔަ އަހަރުގެ އޮގަސްޓު މަހުގެ ތެރޭގަ އެވެ. އެ ކުންފުނިން މަސައްކަތް ކުރަމުން ދަނީ މި ހިދުމަތް މުޅި ރާއްޖެއަށް ފޯރުކޮށް ދިނުމަށެވެ.