ޒަކިއްޔާގެ މަރުގެ މައްސަލަ މަޖިލީހުގެ 241 ކޮމިޓީއަށް ހުށަހަޅައިފި

ނ. ހޮޅުދޫގައި މިދިޔަ އަހަރު ޒަހަމްތަކާއެކު މަރުވެފައި އޮއްވާ ފެނުނު ޒަކިއްޔާ މޫސާގެ މަރުގެ މައްސަލާގައި އުފެދިފައިވާ ނުތަނަވަސްކަމާ ގުޅިގެން އެ މައްސަލަ ރައްޔިތުންގެ މަޖިލީހުގެ ސަލާމަތީ ހިދުމަތްތަކާ ބެހޭ ކޮމެޓީ، (241) ކޮމިޓީން ބަލައިދިނުމަށް އެދިއްޖެ އެވެ.

މި މައްސަލަ 241 ކޮމިޓީއަށް ހުށަަޅުއްވާފައިވަނީ ގަލޮޅު އުތުރު ދާއިރާގެ އެމްޑީޕީގެ މެންބަރު މުހައްމަދު އިބްރާހިމް (ކުޑޫ) އެވެ.

މަޖިލީހުގެ ރައީސް އަބްދުއްރަހީމް އަބްދުﷲ އަށް ކުޑޫ ފޮނުއްވި ސިޓީގައި ވިދާޅުވީ އެ މަރުގެ ތަހުގީގު އެކަށީގެންވާ ގޮތެއްގައި ކުރިއަށް ނުދާ ކަމަށް ބުނެ އެ ރަށުގެ ގިނަ ރައްޔިތުން އަޑު އުފުލަމުން އަންނަ ކަމަށެވެ.

ޒަކިއްޔާ މަރުވިއިރު ހަށިގަނޑުގައި ހުރި ޒަހަމްތަކެއް ހުރި ނަމަވެސް އެއީ މީހަކު ކުރިކަމެއް ކަމުގެ ހެއްކެއް ނެތް ކަމަށް ފުލުހުން ބުނުމަށްފަހު ތަހުގީގާ ގުޅޭ އެކަށީގެންވާ މައުލޫމާތު ފުލުހުން އާންމު ނުކުރުމަކީ އެ ރަށުގެ ރައްޔިތުންގެ ކަންބޮޑުވުމެއް ކަމަށް ސިޓީގައިވެ އެވެ.

އެ މަރުގެ ހަގީގަތް ދެނެނުގަނެވި، ދިގު މުއްދަތެއް ފާއިތުވެގެން ގޮސްފައިވާތީ އެކަމުގެ ފަހަތުގައި ތިބި ބަޔަކު އިންސާފުގެ ކުރިމައްޗަށް ގެނައުމަށް ހުރަސްތަކެއް ކުރިމަތިވެގެން ދާނެކަމުގެ ބިރު އޮތް ކަމަށް ވެސް ސިޓީގައިވެ އެވެ.

އެ މަރަށް އެކަށީގެންވާ ސަމާލުކަމެއް ކަމާބެހޭ އިދާރާތަކުން ނުދޭކަމުގެ ޝަކުވާ ރައްޔިތުންގެ އޮތްއިރު، ހޮޅުދޫ އޮތީ ބިރުވެރިކަމެއްގެ ތެރޭގައި ކަން ވެސް އެ ސިޓީގައި ފާހަގަކޮށްފައިވެ އެވެ.

ކޫޑޫ އެދިވަޑައިގެންފައިވަނީ 241 ކޮމިޓީ މެދުވެރިކޮށް އެ މައްސަލަ ބަލައި، ހޮޅުދޫ ރައްޔިތުންނަށް ދިމާވެފައިވާ ހިތްދަތި ކަމަށް އަވަސް ހައްލެއް ހޯދައިދިނުމަށެވެ.

ޒަކިއްޔާގެ މަރާ ގުޅިގެން އެ ރަށުގައި އުފެދިފައިވާ ހިތްހަމަނުޖެހުންތަކާ ގުޅިގެން މަޖިލީހުގެ އިއްޔެގެ ޖަލްސާއަށް ކުއްލި މައްސަލަތަކެއް ހުށަހެޅި ނަމަވެސް އެ މައްސަލަ ބަލައިގެންފައެއް ނުވެ އެވެ.

ޒަކިއްޔާ އަށް އިންސާފު ހޯދައިދޭން އެދި ކުރާ މުޒާހަރާގައި ހޮޅުދޫގެ ބައެއް ރައްޔިތުން ތުހުމަތުކުރާ ގޮތުގައި އެ މަރުގެ ފަހަތުގައި އޭނާ ފިރިމީހާ އަށް ތުހުމަތުތަކެއް ކުރެވެ އެވެ. އަދި އޭނާ ހައްޔަރު ކުރަން ވެސް ގޮވާލާފައިވެ އެވެ. އެކަމާ ގުޅިގެން ހޯމް މިނިސްޓަރު އަލީ އިހްސާނާއި ޕޮލިސް ކޮމިޝަނަރު އަލީ ޝުޖާއު ވެސް އެރަށަށް ވަޑައިގެން، ރައްޔިތުންނާ ބައްދަލު ކުރެއްވި އެވެ.

ޒަކިއްޔާ އޮޓޯޕްސީ ނުހަދައި، އޭނާ ވަޅުލާފައިވުމަކީ ފުލުހުން ހެދި ގޯހެއް ކަމަށް މިނިސްޓަރު އިހުސާން ވެސް ވިދާޅުވެފައިވެ އެވެ.