ރައްޔިތުންނަށް އުނދަގޫވާ މަސައްކަތްތައް ބަދަލުކުރަން ބަނޑިދޫ ފަޅުން ބައެއް ހިއްކަނީ

ދ. ބަނޑިދޫގައި ރައްޔިތުންނަށް އުނދަގޫވާ ގޮތަށް ކުރަމުންދާ ފައިބަރު މަސައްކަތް ފަދަ، ބައެއް ކަންކަން ބަދަލުކުރުމަށް ހާއްސަ ސަރަހައްދެއް ކަނޑައެޅުމުގެ ގޮތުން ފަޅުން ބައެއް ހިއްކަން ނިންމައިފި އެވެ.

ދ. އަތޮޅަށް މިހާރު ކުރައްވަމުން ގެންދަވާ ދަތުރުފުޅުގައި ބަނޑިދޫ ރައްޔިތުންނާ ބައްދަލުކުރައްވައި ރައީސް ޑރ. މުހައްމަދު މުއިއްޒު ވިދާޅުވީ ރަށުގެ ފަޅުން ހިއްކެން އޮތް އެންމެ ބޮޑަކަށް ހިއްކުމުގެ މަސައްކަތް ކުރައްވާނެ ކަމަށެވެ.

މި އަހަރުގެ ބަޖެޓުގައި އެކަން ހިމެނިފައި ނެތުމުން އަންނަ އަހަރުގެ ތެރޭގައި އެ މަސައްކަތް ނިންމަވާލައްވާނެ ކަމަށް ރައީސް ވިދާޅުވި އެވެ.

"މި ރަށުގެ ރައްޔިތުންގެ އުއްމީދެއް އެއީ ރަށު ތެރޭގައި އުނދަގޫވާ ގޮތަށް ފައިބަރު މަސައްކަތް ކަހަލަ ކުނި ކޮށި ކަހަލަ ރައްޔިތުންގެ ތެރޭގައި ހުރުމުން ދަތިވާ ކަހަލަ އުނދަގޫވާ ކަންކަން ބަދަލުކުރެވޭނެ ކަހަލަ ބިމެއް ހިއްކިގެން ދިއުން،" ރައީސް ވިދާޅުވި އެވެ.

ރައީސް ވިދާޅުވީ ފައިބަރުގެ މަސައްކަތްކުރާ ސަރަހައްދު، އާންމުން އުޅޭ ސަރަހައްދުގައި ހުރުމުން އޭގެ ނުރައްކާތެރިކަން އެބަ އޮތް ކަމަށާއި އެހެންވެ، ހިއްކާ ސަރަހައްދަށް އެތަން ބަދަލުކުރުމާއި ކުނި ކޮށި އެ ސަރަަހައްދަށް ބަދަލުކުރުން ހިމެނޭ ކަމަށެވެ.

ރައީސް ވިދާޅުވީ ބިން ހިއްކުމުގެ މަސައްކަތްކުރާ އިރު އެ ރަށުން ގިރާ ސަރަހައްދު ހިމާޔަތްކުރުމުގެ މަސައްކަތް ވެސް ކުރިއަށް ދާނެ ކަމަށެވެ.

"އަމަލީ ގޮތުން މީގެ ނަތީޖާއަކަށް ވާނީ ބިން ހިއްކި، މި ދެންނެވި ހުރިހާ މަގްސަދެއް ހާސިލުވާ ގޮތަށް ޖާގަ ބާއްވައިގެން މި ރަށުގެ އެ މަސައްކަތްކުރާ ތަންތަން ބަދަލުކުރުމުގެ މަޝްރޫއުއެއް މި އަންނަ އަހަރުގެ ބަޖެޓުގެ ތެރޭގައި ހިމަނައިގެން އެ މަސައްކަތް އަޅުގަނޑު ނިންމައިދޭނަން،" ރައީސް ވިދާޅުވި އެވެ.

އެ ރަށުގެ ރައްޔިތުންގެ ކަންބޮޑުވުންތައް ހިއްސާކުރައްވަމުން ރައީސް ވިދާޅުވީ ބޭރު ތޮށި ބަދަލުކޮށްދިނުމަށް ވެސް ރައްޔިތުން އެދިފައިވާ ކަމަށެެވެ. މަސްވެރިންނާއި ކުދި ދޯނި ބޭނުންކުރާ ފަރާތްތަކަށް އެއީ ވަރަށް މުހިއްމު ކަމެއް ކަމަށާއި ބޭރު ތޮށި ބަދަލުކުރުމުން ބަނދަރުގެ ޖާގަ އިތުރުވާނެތީ އެކަން ވެސް ކޮށްދެއްވާނެ ކަމަށެވެ.

ރައީސް ވިދާޅުވި ގޮތުގައި އެކަމަކީ ދިގު ރާސްތާ އިންވެސްޓްމަންޓެކެވެ. އަންނަ އަހަރުގެ ބަޖެޓުގެ ދަށުން އެކަން ވެސް ކޮށްދެއްވާނެ ކަމަށް ވިދާޅުވި އެވެ.

ރައީސް ވަނީ ސްކޫލު މަޝްރޫއު އާއި ސިއްހީ މަރުކަޒުގެ ޖާގަ އިތުރުކުރުމާއި ވަސީލަތްތައް އިތުރުކުރުން ފަދަ ކަންކަން މިއަހަރުގެ ބަޖެޓުގެ ދަށުން ކޮށްދެއްވާނެ ކަމަށް ވެސް ވިދާޅުވެފަ އެެވެ.