އިހަވަންދޫގައި ޕާސްޕޯޓާއި އައިޑީކާޑު ހެއްދުމުގެ ހިދުމަތް ފަށައިފި

ދިވެހި ރައްޔިތެއްކަން އަންގައިދޭ ކާޑާއި ޕާސްޕޯޓު، ހއ. އިހަވަންދޫން ލިބޭނެ އިންތިޒާމު ސަރުކާރުން މިއަދު ހަމަޖައްސައިފި އެވެ.

އާބާދީގައި 3،000އަށްވުރެ ގިނަ މީހުން ދިރިއުޅޭ އެ ރަށުގައި އެ ހިދުމަތް ފައްޓަވައި ދެއްވީ ރައީސް ޑރ. މުހައްމަދު މުއިއްޒު އެ އަތޮޅަށް ކުރައްވާ ދަތުރުފުޅުގައި، އެ ރަށު ރައްޔިތުންނާ ބައްދަލުކުރައްވަން ބޭއްވި ޖަލްސާގައި ހޯމް މިނިސްޓަރު އަލީ އިހުސާން އެވެ.

އެ ޖަލްސާގައި ވަނީ އިސްލާމިކް ބޭންކުން އިހަވަންދޫގައި އޭޓީއެމްގެ ހިދުމަތް ދިނުމުގެ އެއްބަސްވުމެއްގައި ވެސް ސޮއި ކޮށްފަ އެވެ. އެ އެއްބަސްވުމުގައި ސޮއި ކުރެއްވީ އެ ރަށު ކައުންސިލްގެ ރައީސް އަހުމަދު ސޮބާހާއި އެމްއައިބީގެ ހެޑް އޮފް ޑިސްޓްރިބިއުޝަން އިބްރާހިމް ސުހައިލް އެވެ.

ސަރުކާރުން ވަނީ ޕާސްޕޯޓުގެ ހިދުމަތް މި އަހަރު މުޅި ރާއްޖެ އަށް ފުޅާކުރަން ނިންމާފައިވާކަން އިއުލާސް ކޮށްފަ އެވެ.

މާލޭ ފިޔަވައި މިހާރު ޕާސްޕޯޓުގެ ހިދުމަތް ލިބޭ ތަންތަނުގެ ތެރޭގައި ހިމެނެނީ:

- ހުޅުމާލެ 1

- ހުޅުމާލެ 2

- ވިލިމާލެ

- ލ. ފޮނަދޫ

- ދ. ކުޑަހުވަދު

- ރ. އުނގޫފާރު

އައިޑީކާޑުގެ ހިދުމަތްދޭ ރަށްތައް:

- ހުޅުމާލެ 1

- ހުޅުމާލެ 2

- ވިލިމާލެ

- ހދ. ކުޅުދުއްފުށި

- ހއ. ދިއްދޫ

ޕާސްޕޯޓުގެ ހިދުމަތް މުޅި ރާއްޖެއަށް ފުޅާ ކުރުމުގެ ވިސްނުން ސަރުކާރުން ގެންގުޅޭއިރު، މައުލޫމާތުގެ ރައްކާތެރިކަމާއި އައިޑީކާޑާއި ޕާސްޕޯޓު ފަދަ ސެކިއުއާ ޑޮކިއުމަންޓްތަކެއް ބައިނަލްއަގްވާމީ މިންގަނޑުތަކާ އެއްގޮތަށް ބެލެހެއްޓޭނެ ނިޒާމެއް ގާއިމުކުރުމަކީ އެންމެ ބޮޑު ގޮންޖެހުން ކަމަށް ކުރިން ހޯމް މިނިސްޓަރު އަލީ އިހުސާން ވިދާޅުވެފައިވެ އެވެ.

އެހެން ސަރުކާރުތަކަށް ވެސް އެކަން ނުކުރެވި އޮތީ އެފަދަ ގޮންޖެހުންތަކާ އެކު ކަމަށް ގަބޫލުކުރައްވާ ކަމަށާއި އެކަމަކު ރައީސް މުއިއްޒުގެ ދުރުވިސްނުންފުޅާ އެކު، ސަލާމަތާއި ރައްކާތެރިކަން ކަށަވަރުކުރެވޭނެ ގޮތަށް މިނިސްޓްރީއެއް އެކުލަވާލާފައި އޮތުމުން އެ މަގު ފަހިވެފައިވާ ކަަމަށް އިހުސާން އޭރު ވިދާޅުވި އެވެ.