އުމުރު ހަމަވެފައިވާ އުޅަނދުތައް ރަޖިސްޓްރީކުރަން އިތުރު މުއްދަތެއް

އުޅަނދު އުފެއްދި ދުވަހުން ފެށިގެން ރަޖިސްޓްރީކުރަން ޖެހޭ އުމުރު ނުވަތަ މުއްދަތު މިދިޔަ އަހަރުގެ ނިޔަލަށް ހަމަވެފައިވާ ހަތަރު ފުރޮޅުލީ އުޅަނދުތައް ރަޖިސްޓްރީކުރަން އިތުރު މުއްދަތެއް ޓްރާންސްޕޯޓް މިނިސްޓްރީން މިއަދު ދީފި އެވެ.

ޓްރާންސްޕޯޓް މިނިސްޓްރީން ކުރި އިއުލާނެއްގައި ބުނީ މިދިޔަ އަހަރުގެ ނިޔަލަށް ރާއްޖެއަށް އެތެރެކޮށްފައިވާ ހަތަރު ފުރޮޅުލީ އެއްގަމު އުޅަނދުތަކުގެ ތެރެއިން، ރަޖިސްޓަރީ ކުރުމަށް ކަނޑައަޅާފައިވާ އުމުރު ހަމަވެފައިވާ އުޅަނދުތަކުގެ ތެރެއިން ރަޖިސްޓްރީ ނުކޮށް ހުރި އުޅަނދުތައް ރަޖިސްޓްރީކުރަން އިތުރު މުއްދަތެއް ދޭން ނިންމާފައިވާ ކަމަށެވެ.

އެފަދަ އުޅަނދުތައް ރަޖިސްޓްރީކުރުމަށް ހަ ދުވަހުގެ މުއްދަތެއް ވަނީ ދީފަ އެވެ. އެ މުއްދަތު ހަމަވާނީ އަންނަ ބުދަ ދުވަހަށެވެ.

އެ އުޅަނދުތައް ރަޖިސްޓަރީކުރުމަށް ބޭނުންވާ ލިޔެކިޔުންތަކާ އެކު، ޓްރާންސްޕޯޓް މިނިސްޓްރީގެ ޕޯޓަލް eportal.mta.gov.mv މެދުވެރިކޮށް ހުށަހެޅޭނެ އެ އިއުލާނުގައި ބުންޏެވެ.

އެއްގަމު އުޅަނދު ރަޖިސްޓަރީކުރުމުގެ ގަވާއިދުގައި ބުނެފައިވާ ގޮތުގައި، އިންޖީނުލީ އެއްގަމު އުޅަނދުތައް ރަޖިސްޓްރީކޮށްދެވޭނީ އެ އުޅަނދެއް އުފެއްދި އަހަރުން ފެށިގެން ވަކި މުއްދަތެއް ހަމަވެފައި ނުވާ ނަމަ އެވެ. އެގޮތުން އެކި ބާވަތުގެ ވެހިކަލްތަކަށް އެކި މުއްދަތު އެ ގަވާއިދުގައި ކަނޑައަޅާފައިވާއިރު، އެންމެ ގިނަވެގެން ލިބޭ މުއްދަތަކީ 15 އަހަރެވެ.